Epesus 5:1-33
5 Emaka, jadilah kalak si ngusih Dibata selaku anak-anak si ikelengi,
2 janah teruslah buktiken kekelengen i bas geluh kena bali bagi Kristus nggo ngkelengi kita* janah iberekenna dirina guna kita* jadi persembahen ras korban si merim man Dibata.
3 Ula sempat belasken kena kerna perbahanen seks si salah,* ras kerina si najis ntah pe si merangap, perban enda la patut man kalak si badia,
4 bage ka pe perbahanen si pemela-melaken, ranan si la erguna ntah pe cakap kotor,* sebap kerina enda la patut. Tapi ngata bujurlah man Dibata.
5 Iteh kena janah sadar kena maka kalak si ngelakoken perbahanen seks si salah,* ntah kalak si najis ntah pe kalak si merangap, kalak enda seri ras si nembah berhala. Emaka la pagi datna warisen i bas Kerajan Dibata si iperentah Kristus.
6 Ula pediat ise pe nipu kena alu ranan si la erguna, erkiteken e banci erban merawa Dibata man kalak si la patuh.
7 Emaka, ula erteman ras kalak si bage.
8 Mbarenda kena i bas gelap, gundari kena i bas terang erkiteken nggo ersada kena ras Tuan. Teruslah nggeluh selaku anak-anak terang,
9 sebap asil* i bas terang e nari eme kerina si mehuli, si adil, ras si benar.
10 Teruslah pastiken kai si ngena ate Tuhan.
11 Ula nai lakoken perbahanen si la erguna si lit hubungenna ras kegelapen. Tapi banlah kerina si e teridah.
12 Kai si ilakoken kalak e alu erbuni-buni, tuhu-tuhu man kemelanken guna icakapken.
13 Kerinana icidahken terang, alu bage kerina si icidahken terang e jadi terang.
14 Lit tertulis, “Medakkenlah, o kena si sangana medem. Kekekenlah i bas si mate nari, janah iterangi Kristus me kena.”
15 Perdiatekenlah cara kena nggeluh, gelah kena nggeluh selaku kalak pentar, labo selaku kalak si la pentar.
16 Gunakenlah waktu kena alu mehuli, sebap wari-wari enda jahat.
17 Emaka ula nai kena la masuk akal. Tapi teruslah perdiateken kai peraten Jahwe.
18 Ula kena mabuk iban anggur, sebap banci ceda geluh kena. Tapi teruslah kena dem alu kesah si badia.
19 Ercakap-cakaplah kena sada ras si debanna* alu masmur, alu puji-pujin man Dibata, bage pe alu lagu-lagu rohani. Rendelah man Jahwe alu musik i bas pusuh kena nari.
20 I bas kai pe, teruslah ngata bujur man Dibata eme Bapakta i bas gelar Tuanta Jesus Kristus.
21 Patuhilah sada ras si debanna erkiteken mehamat kel kena man Kristus.
22 O kena ndehara, patuhilah perbulangen kena bali bagi kena patuh man Tuan,
23 erkiteken perbulangen eme takal ndeharana, bali bagi Kristus pe takal runggun si nelamatken daging e.
24 Situhuna, bali bagi runggun patuh man Kristus, ndehara pe arus patuh man perbulangenna i bas kai pe.
25 O kena perbulangen, teruslah kelengi ndehara kena, bali bagi Kristus pe ngkelengi runggun janah ikorbankenna dirina man kalak e,
26 gelah banci ipebadiakenna kalak e, ibersihkenna alu lau, eme kata Dibata.
27 Alu bage banci mejile ibanna runggun e i lebe-lebena, la ringut ntah pe la lit si ceda tapi badia janah la lit cacatna.
28 Perbulangen pe arus bage. Arus ikelengina ndeharana bali bagi ia ngkelengi dagingna. Kalak si ngkelengi ndeharana ngkelengi dirina kap.
29 Labo pernah lit kalak segat atena dirina tapi iberena man janah ikelengina bali bagi Kristus nandangi runggun,
30 sebap kita kap anggota dagingna.
31 “Eme sebapna sekalak dilaki nadingken bapakna ras mamakna, jenari ersada ia ras ndeharana, janah duana ia jadi sada daging.”
32 Seh kel pentingna rahasia si badia enda. Gundari aku ngerana kerna Kristus ras runggun.
33 Aminna pe bage, tiap perbulangen arus ngkelengi ndeharana bali bagi ngkelengi dirina, janah tiap ndehara arus tuhu-tuhu mehamat man perbulangenna.
Cataten i teruh
^ Ntah banci saja “kena.”
^ Ntah banci saja “kena.”
^ Bahasa Junani, porneia. Nen Kamus.
^ Ntah “kai pe si lit hubungenna ras porno.”
^ Bahasa Junani, porneia. Nen Kamus.
^ As. “buah.”
^ Ntah banci saja “man diri sendiri.”
