Galati 2:1-21
2 Kenca 14 tahun, mulihken ka aku ku Jerusalem ras Barnabas janah kubaba Titus.
2 Lawes aku ku je erkiteken ipebetehken Tuan maka arus aku lawes janah i je kuberitaken berita si meriah, berita e me si kuberitaken man bangsa si deban. Tapi si e kulakoken i lebe-lebe senina-senina si ihamati ngenca, guna mastiken maka pelayanenku si mbarenda ras si gundari la sia-sia.
3 Aminna pe Titus si ikut ras aku e kalak Junani, labo lit si maksa ia gelah isunat.
4 Tapi, si e ipermasalahken turang senina si palsu si erbuni-buni masuk bali bagi mata-mata, si atena meteh kerna kebebasen si inanami kita erkiteken ersada ras Kristus Jesus, gelah banci kita iperbudak kalak e.
5 Aminna pe bage, la kami nggit talu ntah pe patuh man kalak e, sitik pe lang, gelah kebenaren si lit i bas berita si meriah tetap lit bas kena.
6 Ugapa pe mbarenda keadan senina-senina si ianggap penting e, labo lit pengaruhna man bangku, erkiteken si inen Dibata labo kai si teridah. Labo lit kai pe si mbaru si kudatken i bas kalak si ihamati e nari.
7 Tapi idah kalak e maka nggo kualoken pendahin erberita si meriah man kalak si la isunat, bali bagi Petrus nggo ngaloken pendahin erberita si meriah man kalak si isunat.
8 Sebap Dibata si mere kuasa man Petrus gelah jadi rasul man kalak si isunat, Ia ka nge si mere kuasa man aku gelah jadi rasul man bangsa si deban.
9 Enggo idah kalak e maka icidahken Dibata lias ateNa si mbelin man bangku, alu bage Jakup, Kepas,* ras Johanes, eme kalak si ianggap jadi peminpin i bas runggun, isalami kalak e aku ras Barnabas, e jadi tanda setuju maka lawes me kami ku bangsa si deban tapi kalak e lawes ku kalak si isunat.
10 Sada ngenca pemindon kalak e, eme gelah tetap inget kami kalak si mesera janah enda me si tuhu-tuhu si ateku kulakoken.
11 Tapi sanga reh Kepas* ku Antiokia, kupersingeti ia alu terus terang perban ia tuhu-tuhu ersalah.
12 Biasana rusur Kepas man ras kalak si la isunat. Tapi sanga reh kalak si isuruh Jakup, lanai ia nggit ras kalak e janah lanai ia nggit ergaul ras kalak e, perban mbiar ia nandangi kalak si ndukung sunat.
13 Kalak Jahudi si debanna pe tempa-tempa* bagi Kepas, janah Barnabas pe ikut-ikuten bage.
14 Tapi sanga kuidah maka perbahanen kalak e la sue ras kebenaren si lit i bas berita si meriah, kukataken man Kepas* i lebe-lebe kalak e kerina, “Adi kam saja pe si kalak Jahudi perbahanenndu bali bagi bangsa si deban janah la bagi kalak Jahudi, uga kam banci nuruh bangsa si deban ngikutken kebiasan kalak Jahudi?”
15 Kita ilahirken jadi kalak Jahudi janah labo seri ras kalak i bas bangsa si deban nari si erdosa.
16 Siteh maka sekalak jelma ikataken benar adi erkiniteken man Jesus Kristus ngenca, labo perban ndalanken undang-undang. Emaka erkinitekenlah kita man Kristus Jesus gelah ikataken benar perban kinitekenta man Kristus, labo perban ndalanken undang-undang, sebap labo lit ise pe si ikataken benar aminna pe ndalanken undang-undang.
17 Adi ikataken denga kita selaku kalak si erdosa aminna pe siusahaken ikataken benar erkelangken Kristus, la kin enda ertina iiahken Kristus kita gelah terus ngelakoken dosa? Tentu lang!
18 Adi kubangun mulihi kai si nggo kuruntuhken, enda mbuktiken maka nggo kulanggar undang-undang.
19 Undang-undang e si erbanca aku mate i bas undang-undang, alu bage banci aku nggeluh guna Dibata.
20 Aku ipakuken i bas tiang radu ras Kristus. Emaka lanai bo aku si nggeluh, tapi Kristus kap si nggeluh i bas aku. Kudalani geluhku si gundari e sue ras kiniteken man Anak Dibata, si ngkelengi aku janah si ngkorbanken dirina guna aku.
21 La kutulak lias ate Dibata si mbelin. Adi sekalak jelma ikataken benar perban ndalanken undang-undang, emaka sia-sia kap Kristus mate.
