Galati 4:1-31
4 Sekalak ahli waris si kitik denga, aminna pe ia si mpuna kerinana, ia bali bagi sekalak budak,
2 sebap lit si njagai janah si ngurus ia seh asa waktu si itetapken bapakna.
3 Bage ka me kita. Sanga kitik denga, kita iperbudak doni enda i bas perukuren ras carata nggeluh.
4 Tapi sanga akhir waktu si itetapken e nggo seh, Dibata nuruh AnakNa. Anak e ilahirken sekalak diberu janah nggeluh menurut undang-undang,
5 gelah banci itebusna kalak si nggeluh menurut undang-undang, alu bage banci kita iangkat jadi anak-anak Dibata.
6 Erkiteken kena anak-anak Dibata, ikirim Dibata kesahNa si badia si lit i bas AnakNa ku bas pusuhta, janah iban kesah e kita erlebuh, “Abba,* Bapak!”
7 Emaka erkiteken kena jadi anak, kena lanai bo budak janah ijadiken Dibata ka kena jadi ahli waris.
8 Aminna pe bage, ope lenga kena nandai Dibata, kena iperbudak dibata-dibata palsu.
9 Tapi gundari, kenca itandai kena Dibata, ntah pe ulin ikataken nggo itandai Dibata kena, ngkai maka mulihi ikutken kena perukuren ras cara nggeluh si sia-sia bage pe si la erguna? Engkai maka mulihken ate kena jadi budakna?
10 Irayaken kena wari-wari, bulan-bulan, musim-musim, ras tahun-tahun tertentu.
11 Mbiar aku adi usahaku guna kena jadi sia-sia.
12 O turang senina, kupindoken man kena gelah bali kena bagi aku, sebap aku pe mbarenda bali bagi kena. Labo kena ersalah man bangku.
13 Tapi iteh kena maka tangtangna kuberitaken berita si meriah man kena eme perban lit pinakitku.
14 Aminna pe pinakitku e erban kena susah, la ihina kena aku ntah pe iciduri kena. Tapi ialo-alo kena aku bali bagi ngalo-ngalo malekat Dibata ntah pe ngalo-ngalo Kristus Jesus.
15 I ja keriahen ukur kena si mbarenda? Tek aku maka mbarenda, adi banci, pasti kena nggit ncungkil mata kena janah ibereken kena man bangku.
16 Emaka, jadi musuh kena kin aku gundari erkiteken kukataken kai si benar man kena?
17 Iusahaken kalak e muat ukur kena, tapi sura-sura kalak e la mehuli. Ersura-sura kalak e erban kena ndauh i bas aku nari gelah banci terus ikutken kena kalak e.
18 Situhuna, labo dalih adi lit si atena muat ukur kena alu sura-sura si mehuli, janah mehuli nge adi katawari pe ilakokenna bage, labo saja sanga aku ras kena.
19 O anak-anakku, kunanami kiniseran sekali nari bali bagi sekalak pernanden si sangana melahirken. Terus kunanami kiniseran si bage seh asa lit sipat-sipat Kristus i bas kena.
20 Ngarap kel aku gelah banci aku ras kena gundari janah ngerana alu lebih lembut, erkiteken bingung kel aku ban kena.
21 O kena si atena nggeluh menurut undang-undang, kataken dage man bangku: La kin ibegi kena kai si ikataken Undang-Undang Musa?
22 Contohna, lit tertulis maka dua anak Abraham dilaki, sekalak anakna e arah diberu si jadi budak, sekalak nari arah diberu si bebas.
23 Anak arah diberu si jadi budak ilahirken bali bagi anak-anak si deban, tapi anak arah diberu si bebas, ilahirken erkiteken janji.
24 Lit pengertin si deban kerna si enda: Dua diberu e ngertiken dua perjanjin. Perjanjin si iban i Deleng Sinai eme Hagar, janah kerina anak si ilahirkenna jadi budak.
25 Hagar ngertiken Deleng Sinai si lit i bas Arab, janah ia bali bagi Jerusalem si gundari erkiteken ia ras anak-anakna jadi budak.
26 Tapi Jerusalem si i surga e bebas janah ia kap nandeta.
27 Lit tertulis, “Ermeriah ukurlah diberu si la banci melahirken,* si la pernah melahirken, si la pernah ngenanami kiniseran erkiteken melahirken! Ersuraklah erkiteken diberu si itadingken buen anakna asangken diberu si erdilaki.”
28 O turang senina, kena kap anak-anak si lahir erkiteken janji Dibata, bali bagi Isak.
29 Mbarenda, anak si lahirna bagi anak-anak si deban niksa anak si lahir alu kesah si badia, janah gundari pe bage ka nge.
30 Aminna pe bage, kai kin si ikataken i bas ayat? “Pelaweslah diberu si jadi budak e bage pe anakna, sebap anakna labo jadi ahli waris radu ras anak arah diberu si bebas e.”
31 Emaka o turang senina, kita labo anak-anak arah diberu si jadi budak e, tapi anak-anak arah diberu si bebas e.
