Heber 1:1-14
1 I bas jaman si mbarenda, ngerana Dibata man nini bulangta arah nabi-nabi i bas erbage-bage kesempaten bage pe alu erbage-bage cara.
2 Tapi i bas jaman gundari enda, ngerana Ia man banta arah AnakNa, si jadi ahli waris i bas kerinana janah igunakenNa ia i bas njadiken doni.*
3 Anak e ncidahken kemulian Dibata janah ia tuhu-tuhu gambar Dibata. Itatangna kerinana alu kata Dibata si dem kuasa. Kenca ipebadiana kita i bas dosa nari, kundul ia i sebelah kanan Dibata Si Madakuasa i surga.
4 Ndauh ia ganjangen asangken malekat-malekat, erkiteken iwarisina gelar si mulian asangken gelar malekat-malekat e.
5 Contohna, man malekat-malekat si apai kin pernah ikataken Dibata bagenda, “Kam kap anakKu, gundari Aku jadi Bapakndu”? Nina ka, “Aku pagi jadi Bapakna, janah ia pagi jadi anakKu”?
6 Tapi sanga isuruh Dibata ka AnakNa Sintua e ku doni, nina Dibata, “Kerina malekat Dibata erjimpuhlah man bana.”
7 Nina ka kerna malekat-malekat, “Iban Dibata malekat-malekatNa seh kel gegehna janah pelayan-pelayanNa bali bagi api si gurlah.”
8 Tapi kerna AnakNa, nina, “Dibata kap tahtandu rasa lalap seh rasa lalap janah tongkat Kerajanndu eme tongkat keadilen.*
9 Ngena atendu kai si benar janah nembeh atendu pelanggaren. E me sebapna Dibata, Dibatandu ngelantik kam alu minak janah ibanNa keriahen ukurndu belinen asangken keriahen ukur raja-raja si deban.”
10 Lit ka tertulis, “O Tuhan, tangtangna ibanNdu pondasi doni janah alu tanNdu ibanNdu langit.
11 Kernep nge pagi kerina e, tapi Kam tetap nge lit, janah bali bagi paken, kerina e jadi male.
12 Kerina ilipatNdu bagi jubah, bagi paken, janah kerina e iganti. Tapi Kam tetap seri janah Kam nggeluh seh rasa lalap.”
13 Tapi labo pernah ikatakenNa man malekat si apai pe, “Kundullah arah kananKu seh asa Kutamaken musuh-musuhndu i teruh nahendu.”
14 La kin kerina mahluk roh ngelakoken pelayanen si badia, si isuruh guna ngelayani kalak si ndatken warisen keselamaten?
