Heber 3:1-19
3 Emaka, o senina-seninaku si badia, si ikut ilebuh ku surga, perdiatekenlah rasul ras imam si mbelin si iakui kita eme Jesus.
2 Setia ia man Dibata si milih ia, bali bagi Musa sanga ngelayani i bas kerina rumah Dibata.*
3 Kalak si mbangun rumah lebih ipehaga asangken rumah e, bage ka me Jesus, cocoken ia lebih imuliaken asangken Musa.
4 Tiap rumah lit si mbangunsa, tapi si mbangun kerinana eme Dibata.
5 Musa setia selaku pelayan rumah i bas kerina rumah Dibata, janah pelayanenna jadi saksi kerna kai si pagin ipebetehken.
6 Tapi Kristus setia selaku Anak Dibata si jadi takal i bas rumah Dibata. Kita kap rumah Dibata, adi terus kita ngerana alu bebas janah terus paguh i bas arapenta seh ku kedungenna.
7 Enda sue ras kai si ikataken arah kesah si badia, eme, “Wari enda, adi ibegiken kena soraKu,
8 ula ban piher ukur kena bali bagi nini bulang kena si erban Aku merawa i bas wari Aku iujina i taneh mesawang,*
9 iuji nini bulang kena Aku janah icubaina Aku, aminna pe nggo idah kalak e kerina si Kulakoken sedekah 40 tahun.
10 Eme sebapna ciga kel ateKu kalak e janah ningKu, ‘Pusuh kalak e lalap ndauh i bas Aku nari janah la itandaina dalan-dalanKu.’
11 Merawa Aku janah ersumpah, ‘Ndigan pe kalak e labo masuk ku bas wari istirahatKu.’”
12 O turang senina, hati-hatilah kena gelah ula sada pe i bas kena nari si jahat perukurenna janah kurang kinitekenna erkiteken ndauh arah Dibata si nggeluh nari.
13 Tapi gelah ula sekalak pe i bas kena nari itipu dosa si erban piher ukur, pegegehilah sada ras si debanna sedekah masa si igelari “Wari enda” lenga keri.
14 Kita pe banci ikut ngaloken kai si ialoken Kristus, adi tetap sijemak alu nteguh kai si tangtangna nari nggo siteki.
15 Bali bagi kata-kata, “Wari enda, adi ibegiken kena soraKu, ula ban piher ukur kena bali bagi nini bulang kena si erban Aku merawa.”
16 Ise kin si megiken sora Dibata tapi ibanna ka Dibata merawa kel? La kin kerina kalak e si ndarat i bas Mesir nari, si ipinpin Musa?
17 Selain si e, man ise kin ciga ate Dibata sedekah 40 tahun? La kin man kalak si ngelakoken dosa si mayatna amparen i bas taneh mesawang?*
18 Kerna ise kin si ikataken Dibata sanga ersumpah Ia maka kalak e la masuk ku bas wari istirahatNa? La kin kalak si la patuh nge?
19 Emaka siidah maka kalak e la banci masuk perban la erkiniteken.
Cataten i teruh
^ Maksudna, i tengah-tengah bangsa Israel.
^ Taneh si mbelang si jarang iingani.
^ Taneh si mbelang si jarang iingani.
