Heber 8:1-13
8 Enda me si pentingna arah kai si icakapken kami: Lit i bas kita imam si mbelin si bage, janah nggo kundul ia i sebelah kanan tahta Dibata Si Madakuasa i surga,
2 selaku pelayan i bas ingan si badia ras i bas kemah situhu-tuhu, labo si ibangun manusia tapi Jahwe si mbangunsa.
3 Sebap imam si mbelin ilantik guna mpersembahken pemere ras korban, janah ia pe lit ka si perlu ipersembahkenna.
4 Bicara lit ia i doni, labo ia jadi imam sebap nggo lit kalak si mpersembahken pemere menurut Undang-Undang Musa.
5 Pelayanen si badia si ilakoken kalak e jadi contoh ras bayangen kerna kai si lit i surga. Enda teridah arah perentah Dibata man Musa si iberekenNa sanga nandangi ibanna kemah e, eme, “Arus ibanndu kerina e sue ras gambar si nggo icidahken man bandu i deleng e.”
6 Tapi gundari nggo ialoken Jesus pelayanen si lebih penting, erkiteken ia pe jadi kelang-kelang* sada perjanjin si terulin si isahken alu janji-janji si terulin.
7 Bicara perjanjin si pertama e sempurna, labo perlu lit perjanjin si peduaken.
8 Tapi idah Dibata kesalahen i bas bangsa e, emaka nina Jahwe, “‘I bas waktuna pagi, Kuban me sada perjanjin si mbaru ras kalak Israel bage pe kalak Juda.
9 Perjanjin e la seri ras perjanjin si nggo Kuban ras nini bulang kalak e sanga Kutegu-tegu tanna ndarat arah Mesir nari. Erkiteken kalak e la setia man perjanjinKu, lanai Kuperdiateken kalak e,’ nina Jahwe.
10 “‘Enda me perjanjin si Kuban ras kalak Israel kenca paksa si e,’ nina Jahwe. ‘Kutama me undang-undangKu ku bas perukuren kalak e janah Kutulis i bas pusuhna. Aku me jadi Dibatana janah kalak e me jadi umatKu.
11 “‘Lanai pagi lit sekalak pe si ngajari temanna sada bangsa ntah pe turang seninana alu ngataken, “Tandailah Jahwe!” Sebap kerina kalak e nandai Aku nge pagi, mulai rakyat biasa seh asa penguasa.
12 Kuampuni pagi kerina kesalahen kalak e, janah dosa-dosa kalak e lanai pagi Kuinget.’”
13 Alu ngataken “perjanjin si mbaru,” perjanjin si pertama nggo jadi perjanjin si ndekah. Janah kai si nggo ndekah ras si reh tuana, masap me dungna.
Cataten i teruh
^ Ntah “perantara.”
