Heber 9:1-28
9 Perjanjin si pertama lit undang-undangna guna pelayanen si badia bage pe ingan si badia i doni.
2 Lit ruangen si pertama i bas kemah e janah i je lit lampu, meja, bage pe roti persembahen. Ruangen e igelari Ingan si Badia.
3 Tapi i bas pudi tirai si peduaken i bas kemah e lit ruangen si deban si igelari Ingan Sibadiana.
4 I je lit ingan nutung si iban arah emas nari bage pe peti perjanjin si ilapisi emas. I bas peti perjanjin e lit kudin si iban arah emas nari si isina manna, lit ka tongkat Arun si pernah ertunas bage pe dua batu perjanjin.
5 I datas peti e lit kerubim-kerubim si mulia si bayangenna nutupi tutup ingan pendamen. Tapi gundari labo waktuna guna ncakapken si e alu jelas.
6 Kenca kerinana nggo isikapken, masuk me imam-imam ku ruangen si pertama i bas kemah e alu ratur guna ngelakoken pelayanen si badia.
7 Tapi sekali setahun ngenca imam si mbelin masuk ku ruangen si peduaken, janah arus ibabana dareh si ipersembahkenna guna dirina bage pe guna dosa bangsa e si ilakoken kalak e alu la sengaja.
8 Emaka icidahken kesah si badia alu jelas maka sanga kemah si pertama e lit denga, dalan ku ingan si badia lenga teridah.
9 Kemah e ncidahken kai si terjadi gundari janah menurut peraturen enda lit pemere ras korban si ipersembahken. Tapi si e la banci erban pusuh peraten si ngelakoken pelayanen si badia jadi sempurna.
10 Kerina e lit hubungenna ras pangan, inemen, bage pe erbage-bage acara mbersihken diri.* Eme undang-undang guna daging janah si e ipake seh asa waktu si itetapken guna mpesikap kerinana.
11 Tapi sanga reh Kristus jadi imam si mbelin guna maba kai si mehuli si gundari sinanami, ilewatina kemah si lebih penting ras lebih sempurna si labo iban alu tan ntah pe iciptaken bas doni.
12 Masuk ia ku ingan si badia, labo alu dareh kambing ntah pe dareh lembu jantan si nguda denga, tapi alu darehna sendiri, sekali seh rasa lalap janah iselamatkenna kita seh rasa lalap.
13 Adi dareh kambing, dareh lembu jantan, bage pe abu arah lembu si ipirpirken ku datas kalak si najis saja pe banci erban kalak jadi bersih i lebe-lebe Dibata,
14 apai ka dareh Kristus. Arah kesah si badia si la ermasap-masap, ipersembahken Kristus dirina man Dibata jadi korban si la lit cacatna. Alu darehna, ibersihkenna pusuh peratenta i bas perbahanen si sia-sia nari, gelah banci silakoken pelayanen si badia man Dibata si nggeluh.
15 Eme sebapna ia jadi kelang-kelang* i bas perjanjin si mbaru, gelah kalak si nggo ilebuh banci ngaloken janji eme warisen si seh rasa lalap, erkiteken arah kematenna, kalak e itebus janah ibebasken arah pelanggaren si ilakokenna i teruh perjanjin si pertama.
16 Adi lit perjanjin, manusia si erban perjanjin e perlu mate,
17 sebap sada perjanjin jadi sah adi lit kematen. Perjanjin e la sah adi manusia si erban perjanjin e nggeluh denga.
18 Erkiteken si e me perjanjin si pertama la sah perban la lit dareh si mambur.
19 Kenca ipeseh Musa kerina perentah i bas Undang-Undang Musa man bangsa e, ibuat Musa me dareh lembu jantan si nguda denga ras dareh kambing, jenari icampurkenna alu lau. Kenca si e, ipirpirkenna ku kitap perjanjin e ras ku kerina bangsa e alu hisop ras mbulu biri-biri si megara,
20 janah nina, “Enda me dareh perjanjin si iperentahken Dibata guna idalanken kena.”
21 Ipirpirkenna ka dareh e ku kemah e janah ku kerina alat-alat si ipake i bas pelayanen si badia.
22 Menurut Undang-Undang Musa, menam kerinana ipebadiaken alu dareh, janah adi dareh la iamburken, la lit pengampunen dosa.
23 Si e kerina bayangen kerna kai si lit i surga si perlu ipebadiaken alu cara si bage, tapi kai si lit i surga merluken korban-korban si ndauh ulin.
24 Kristus labo masuk ku ingan si badia si iban alu tan, eme bayangen arah ingan si badia situhu-tuhu, tapi ia masuk ku surga e, alu bage gundari ia ngadap Dibata guna kita.
25 Tujunna labo gelah rusur ipersembahkenna dirina bagi imam si mbelin si masuk ku ingan si badia arah tahun ku tahun alu dareh si labo darehna sendiri.
26 Sebap adi bage, arus rusur inanamina kiniseran mulai kin doni enda ijadiken. Tapi gundari i bas pendungi jaman enda, nggo icidahkenna dirina, sekali seh rasa lalap, guna masapken dosa alu ngkorbanken dirina.
27 Bali bagi manusia si sekali mate seh rasa lalap, kenca si e ialokenna penghakimen,
28 Kristus pe ipersembahken sekali seh rasa lalap guna maba dosa nterem jelma. Kenca si e kerehenna si pedua kaliken pagi labo guna masapken dosa, tapi guna nelamatken kalak si tuhu-tuhu ndarami ia.
