Jakup 1:1-27
1 Surat enda i bas Jakup nari, sekalak budak Dibata ras budak Tuan Jesus Kristus.
Mejuah-juah man kena kerina 12 suku si lit i bas erbage-bage ingan.
2 O turang seninaku, ermeriah ukurlah kena paksa ngadapi erbage-bage percuban.
3 Sebap bagi si nggo iteh kena, adi kiniteken kena nggo teruji, kena jadi kalak si megenggeng.
4 Teruslah kena megenggeng seh ku tujunna, alu bage banci kena sempurna janah lengkap i bas kerinana, la kurang kai pe.
5 Emaka adi lit i bas kena si kurang pentar, teruslah ia mindo man Dibata, janah pasti ialokenna. Sebap Dibata mere alu simpar* man kerina kalak janah labo Ia merawa.
6 Tapi teruslah ia mindo alu kiniteken, ula sitik pe ragu, perban kalak si ragu seri ras galumbang lawit si iembus angin ku jah ku je.
7 Sebap, kalak si bage la banci ngarapken kai pe arah Jahwe nari.
8 Kalak si erdua ukur, berubah-ubah lalap perbahanenna.
9 O turang senina si mesera geluhna, ermeriah ukurlah adi kena ipeganjang,
10 bage pe kena si bayak, ermeriah ukurlah adi kena ipeteruk, perban kalak bayak kernep me pagi bali bagi bunga i juma.
11 Bali bagi sinuan si kerah perban kena las matawari, si bungana nartar janah lanai mejile, kalak bayak pe kernep nge sanga iayakina kebayaken.
12 Ermeriah ukurlah kalak si megenggeng i bas erbage-bage percuban, sebap kenca ngena ate Dibata nandangi ia, idatkenna me mahkota kegeluhen si nggo ijanjiken Jahwe man kalak si terus ngkelengi Ia.
13 Adi lit kalak si ngadapi percuban, ula min nina, “Aku sangana icubai Dibata.” Perban Dibata la banci icubai, janah ise pe labo icubaiNa alu si jahat.
14 Tapi tiap kalak icubai paksa itarik janah igoda alu sura-surana sendiri.
15 Jenari kenca sura-sura e reh belinna, turah me dosa. Adi dosa e nggo ilakoken, akibatna eme kematen.
16 O turang senina si kukelengi, ula kena tertipu.
17 Kerina pemere si mehuli ras hadiah si sempurna, rehna arah datas nari, i bas Bapak nari, Sumber terang. La pernah Ia berubah bagi bayang-bayang.
18 Erkiteken peratenNa, ibereNa kita kegeluhen arah kataNa si benar, gelah kita ipilihNa jadi si pertama arah kerina si iciptakenNa.
19 O turang senina si kukelengi, ingetlah: Tiap kalak arus nggit lebe megiken,* ula minter ngerana, janah ula menukah merawa.
20 Sebap rawa manusia labo maba kai si benar i lebe-lebe Dibata.
21 Emaka ambekkenlah kai pe si najis ras kerina si la mehuli. Alokenlah alu meteruk ukur kata si isuanken Dibata si banci nelamatken kena.
22 Lakokenlah kai si ikataken Dibata, labo megi-megi saja. Ula tipu diri kena alu cara perukuren si salah.
23 Kalak si megi kata Dibata tapi la ilakokenna, bali kap ia ras kalak si ngidah ayona i cermin.
24 Idahna dirina, jenari lawes ia janah mis ia lupa uga penampilenna.
25 Tapi kalak si iperdiatekenna undang-undang si sempurna, si maba kebebasen, janah terus ilakokenna, ia me kalak si ngelakoken kata Dibata, ia labo kalak si megi-megi saja ngenca jenari lupa. Ermeriah ukur me ia erkiteken ilakokenna kai si ibegina.
26 Adi lit si erpengakap maka ia kalak eragama tapi la ijagana dilahna, itipuna kap dirina janah sia-sia ia eragama.
27 Agama si bersih ras la najis menurut Dibata, Bapakta, eme: ngurus anak si la ernande ras si la erbapa, kalak si mbalu si lit i bas kiniseran, bage pe njaga diri gelah ula icedai doni enda.
