Jakup 4:1-17
4 Kai si erbanca kena rubati ras erjengil? La kin sura-sura daging kena si erdosa nge si erperang i bas diri* kena?
2 Merhat kena tapi la idat kena. Terus kena munuh janah merhat kena jang kalak si deban, tapi la idat kena. Terus kena erjengil janah rubati. La idat kena perban la ipindo kena.
3 Adi ipindo kena pe, labo idat kena perban tujunna la mehuli, eme guna pesenangken sura-sura daging kena si erdosa saja ngenca.
4 O kalak perlua-lua,* la kin iteh kena maka adi erteman kena ras doni enda, kena jadi musuh Dibata? Ise pe si nggit jadi teman doni enda, ijadikenna dirina musuh Dibata.
5 Lit ayat si ngataken, “Perban lit cian ate i bas pusuhta, merhat kita rusur nandangi kerinana.” Sia-sia kin kap kena ayat e itulis?
6 Tapi, belinen kap lias ate Dibata si mbelin asangken si e. Lit tertulis, “Itulak Dibata kalak si meganjang ukurna, tapi man kalak si meteruk ukurna, iberekenNa lias ateNa si mbelin.”
7 Emaka patuhlah man Dibata janah lawanlah Iblis, kiam me Iblis e i bas kena nari.
8 Rembakkenlah diri kena ku Dibata, emaka irembakkenNa ka diriNa man kena. Bersihkenlah tan kena o kalak si erdosa. Bersihkenlah pusuh kena o kalak si erdua ukur.
9 Erceda atelah, tangis janah ngandunglah. Jadikenlah tawa kena e jadi tangis, janah jadikenlah keriahen kena e jadi ceda ate!
10 Peteruklah diri kena i lebe-lebe Jahwe, emaka ipeganjangNa me kena.
11 O turang senina, ula nai kena sipandang-pandangen. Adi lit si mandangi ntah pe si nghakimi seninana, undang-undang kap si ipandangina janah si ihakimina e. Adi ihakimi kena undang-undang, la kap ilakoken kena undang-undang e, tapi kena si nggo jadi hakimna.
12 Sada kap ngenca Si Mereken Undang-Undang ras Si jadi Hakim, eme Dibata si banci nelamatken ras ngkernepken. Jadi, ise kin kena maka ihakimi kena kalak si deban?
13 Gundari begikenlah, o kena si ngataken, “Wari enda ntah pe pagi, berkat kami ku kota janah tading i je setahun dekahna guna erbinaga janah ndatken untung,”
14 padahal la teh kena uga geluh kena pagi. Kena bali bagi kabut si kentisik ngenca lit, jenari bene.
15 Arusna ikataken kena, “Adi sue ras peraten Jahwe, nggeluh nge kami janah banci ilakoken kami si enda ntah pe si ah.”
16 Tapi gundari sombong kel kena janah tual kel ngerana. Adi bage perbahanen kena, ilakoken kena kap si jahat.
17 Emaka, adi iteh kalak cara ngelakoken kai si benar tapi la ilakokenna, erdosa kap ia.
