Johanes 10:1-42
10 “Situhuna kukataken man bandu, ise pe si masuk ku bas kandang biri-biri tapi la arah pintu janah inangkihina dingding, pinangko janah perampok kap ia.
2 Tapi ise si masuk arah pintu, ia me permakan biri-biri e.
3 Ibukaken penjaga pintun me pintu man bana, janah ibegi biri-biri e sora permakan. Ilebuhna biri-biri e sada per sada alu gelarna janah ipinpinna biri-biri e ku darat.
4 Kenca ibabana kerina biri-biri e ku darat, erdalan permakan e arah lebe, janah iikutken biri-biri e ia sebap itandai biri-biri e sorana.
5 Labo ikutken biri-biri e kalak si la itandaina, tapi kiam me biri-biri e perban la itandaina sorana.”
6 Iceritaken Jesus perumpaman* enda, tapi la iangkai kalak e kai maksudna.
7 Jenari nina Jesus ka, “Situhuna aku kap pintu guna biri-biri e.
8 Kerina si reh si ngaku-ngaku maka ia permakan situhu-tuhu, pinangko ras perampok kap ia, janah la ibegiken biri-biri e ia.
9 Aku kap pintu. Ise pe si masuk arah aku, iselamatken me. Ku bas ku darat me ia, idatna me gagaten.
10 Pinangko reh guna nangko, munuh, ras ngkernepken. Tapi aku reh gelah ialoken biri-biri kegeluhen janah kegeluhen e seh rasa lalap.
11 Aku me permakan si mehuli. Permakan si mehuli, iberekenna kesahna guna biri-biri.
12 Kalak upahen labo ia permakan janah labo si mpuna biri-biri. Adi idahna srigala reh, kiam nge ia nadingken biri-biri e. Emaka iserang srigala me biri-biri e seh merap kerina.
13 Em perban ia sekalak upahen janah la diatena biri-biri e.
14 Aku kap permakan si mehuli. Kutandai biri-biriku janah itandai biri-biriku aku,
15 bali bagi Bapak nandai aku, aku pe kutandai Bapak. Kubereken geluhku guna biri-biri.
16 “Lit denga biri-biriku si deban si la i bas kandang enda. Kalak e pe arus kubaba, janah ibegikenna me soraku. Kerina ia jadi sada rarasen janah sada permakanna.
17 Keleng ate Bapak aku perban kubereken kegeluhenku, gelah kualoken ka mulihi kegeluhen e.
18 Ise pe la lit si muatsa i bas aku nari, tapi kubereken erkiteken sura-suraku. Lit hakku merekenca janah lit ka hakku ngalokenca mulihi. Enda me perentah si kualoken i bas Bapakku nari.”
19 Erkiteken kata-kata Jesus e, terjadi me perpecahen i bas kalak Jahudi.
20 Enterem si ngataken, “Ia nggo irasuki malekat jahat janah nggo adon. Engkai maka ibegiken kena denga ia?”
21 Si debanna ngataken, “Kalak si irasuki malekat jahat labo bagi ia ngerana. Me labo mungkin iban malekat jahat kalak si pentang erpengidah mulihi?”
22 Paksa si e Perayan Mengket sangana ilakoken i Jerusalem. Sanga si e musim mbergeh,
23 janah Jesus sangana erdalan i Serambi Salomo bas rumah pertoton.
24 Jenari ikelilingi kalak Jahudi me Jesus, janah nina, “Asa ndigan nge ipediatndu kami tersungkun-sungkun? Adi Kristus kin kam, kataken man kami alu terus terang.”
25 Ngaloi Jesus, “Enggo kukataken man kena, tapi la kena tek. Pendahin si kulakoken i bas gelar Bapakku, e me si mere kesaksin kerna aku.
26 Tapi la kena tek perban kena labo biri-biriku.
27 Biri-biriku megiken soraku. Kutandai kalak e, janah ikutkenna aku.
28 Kubereken man biri-biri e kegeluhen si la erkeri-kerin. Labo pagi ia ikernepken janah labo ise pe si ngerampok ia i bas tanku nari.
29 Kai pe si ibereken Bapakku man bangku, ergan asangken kerina si debanna. Ise pe la banci ngerampoksa arah tan Bapak nari.
30 Aku ras Bapak sada* kap.”
31 Sekali nari ibuat kalak Jahudi batu guna mbenteri ia.
32 Nina Jesus, “Enggo kucidahken man kena melala pendahin si mehuli i bas Bapak nari. Pendahin si apai si erbanca maka ibenteri kena ate kena aku alu batu?”
33 Ngaloi kalak Jahudi, “Ibenteri kami kam labo perban pendahin si mehuli, tapi perban ihinandu Dibata. Kam sekalak manusia, tapi ijadikenndu dirindu dibata.”
34 Nina Jesus, “Lit tertulis i bas undang-undang kena, ‘Nina Dibata, “Kena me dibata-dibata.”’*
35 Siteh maka kata-kata i bas Kitap si Badia la banci iubah. Adi i bas ayat, Dibata nggelari kalak si nentang selaku ‘dibata-dibata,’
36 cocok kin ikataken kena man bangku selaku kalak si ipebadiaken Bapak janah si isuruhNa ku doni, ‘Ihinandu kap Dibata,’ padahal si kukataken, ‘Aku Anak Dibata’?
37 Adi la kin dahin si ibereken Bapak si kulakoken, ula kena tek man bangku.
38 Tapi adi kulakoken dahin e, aminna pe kena la tek man bangku, teklah kena man pendahin e. Alu bage, iangkai kena janah banci reh mbagesna pengangkan kena maka Bapak ersada ras aku janah aku ersada ras Bapak.”
39 Iusahaken kalak e ka nangkap Jesus, tapi banci ia bebas i bas kalak e nari.
40 Jenari lawes Jesus ku sebrang Lau Jordan janah tading ia i je. I je me ingan Johanes tangtangna mperidiken kalak.
41 Enterem kalak reh ndahi ia janah nina, “Sada pe la lit iban Johanes mukjizat, tapi kerina si ikatakenna kerna dilaki enda tuhu.”
42 Emaka nterem kalak si i je dungna erkiniteken man Jesus.
