Johanes 13:1-38
13 Ope Perayan Paskah, iteh Jesus maka nggo seh waktuna itadingkenna doni enda janah mulih ia ku Bapakna. Keleng kel atena pengikutna si lit bas doni enda janah seh ku kedungenna tetap atena keleng.
2 Paksa si e, kalak e sangana man berngi, janah iban Iblis turah sura-sura i bas pusuh Judas Iskariot anak Simon gelah ihianatina Jesus.
3 Iteh Jesus maka nggo ibereken Bapak kerinana ku bas tanna, janah iteh Jesus ka maka ia reh i bas Dibata nari, jenari nandangi mulih ku Dibata.
4 Sanga kalak e man berngi, cinder Jesus janah itangtangina uisna si arah darat. Jenari ibuatna sada anduk, kenca si e iketna i bas awakna.
5 Itamakenna lau ku bas baskom, jenari icucina nahe murid-muridna janah ielapna alu anduk si iketna i bas awakna ndai.
6 Kenca seh giliren Simon Petrus, isungkunna Jesus, “Icucindu nge atendu naheku e Tuan?”
7 Ijawap Jesus, “Kai si kulakoken enda labo iangkandu gundari, tapi pagin iangkaindu nge.”
8 Nina Petrus, “Asa ndigan pe ula cucindu naheku.” Jawap Jesus, “Adi la kucuci nahendu la kam banci ras aku.”
9 Ngaloi Simon Petrus, “O Tuan, adi bage kin ula naheku saja cuci. Tapi cuci ka tanku ras takalku.”
10 Nina Jesus, “Kalak si nggo ridi, nahena saja ngenca perlu icuci perban kerina dagingna nggo bersih. Kena nggo bersih, tapi labo kerina kena bersih.”
11 Sebap nggo itehna ise kari si nghianati ia. Emaka ikatakenna, “Labo kerina kena bersih.”
12 Kenca icuci Jesus nahe kalak e janah ipakena uisna si arah darat, kundul ia janah nina, “Angkai kena nge ngkai maka bagenda kulakoken man kena?
13 Ilebuh kena aku ‘Guru’ ras ‘Tuan,’ janah payo si ikataken kena e.
14 Adi aku saja Tuan ras Guru kena pe nuci nahe kena, kena pe arus sicuci-cucin nahe.
15 Enggo kuban si man usihen kena gelah banci iban kena bagi si nggo kuban enda.
16 Situhuna sekalak budak labo belinen asangken tuanna, janah kalak si isuruh labo belinen asangken kalak si nuruh ia.
17 Adi iteh kena kerina enda, meriah me ukur kena adi idalanken kena.
18 Si kucakapken labo kerna kena kerina. Kueteh nge kalak si nggo kupilih. Tapi alu bagenda, terjadi me kai si nggo itulisken i bas ayat enda: ‘Kalak si man rotiku nggo jadi musuhku.’
19 Gundari kukataken man kena ope lenga e terjadi, gelah paksa e terjadi tek kena maka aku me si ikataken i bas ayat e.
20 Situhuna, ise pe si ngaloken kalak si kusuruh, ngaloken aku ka nge. Janah ise pe si ngaloken aku, ngaloken Ia si nuruh aku ka nge.”
21 Kenca dung Jesus ngerana, latih kel ukurna janah nina alu terus terang, “Situhuna sekalak i bas kena nari ihianatina kari aku.”
22 Sitatapen me murid-murid perban la iteh kalak e ise si imaksud Jesus.
23 Sekalak murid si ikelengi Jesus, kundul rembak ras Jesus.*
24 Emaka itatap Simon Petrus murid e ndai janah nina, “Kataken man kami ise maksudna e.”
25 Emaka murid si rembak ras Jesus ndai nungkun man Jesus, “O Tuan, ise kin katandu e?”
26 Ijawap Jesus, “Kucelupken me roti enda, jenari ku ise kari kubereken, ia me jelmana.” Kenca icelupkenna roti e, iberekenna man Judas anak Simon Iskariot.
27 Kenca ibuat Judas roti e, ipengaruhi Setan me pusuhna. Emaka nina Jesus man bana, “Minterlah lakoken kai si atendu ilakokenndu.”
28 Tapi, kalak si kundul i je sada pe la ngangkai ngkai maka bage Jesus ngerana man bana.
29 Erkiteken Judas si njemak kotak sen, lit si erpengakap maka Jesus sangana nuruh ia nukur keperlun guna perayan e, ntah mereken sumbangen man kalak mesera.
30 Emaka kenca ibuatna roti e, minter Judas lawes. Paksa si e nggo berngi.
31 Kenca Judas lawes, nina Jesus, “Gundari, imuliaken me Anak manusia janah Dibata pe imuliaken erkelangken ia.
32 Dibata sendiri pagi si mere kemulian man bana, janah minter imuliakenNa.
33 O anak-anak, kentisik nari ngenca aku ras kena. Idarami kena pagi aku, tapi kukataken man kena gundari bagi si nggo kukataken man kalak Jahudi, ‘Labo kena banci reh ku ingan si nandangi kudahi e.’
34 Kubereken man kena perentah si mbaru: Sikeleng-kelengenlah kena. Bagi aku nggo ngkelengi kena, kena pe arus sikeleng-kelengen.
35 Adi kena sikeleng-kelengen, kerina kalak meteh maka kena me murid-muridku.”
36 Nungkun Simon Petrus man Jesus, “Ku ja kin kam lawes Tuan?” Ijawap Jesus, “Gundari labo banci ikutkenndu aku ku ingan si nandangi kudahi e, tapi ikut nge kam pagi.”
37 Nina Petrus, “Engkai maka gundari la banci aku ikut ras kam Tuan? Nggit nge aku mate guna kam.”
38 Ngaloi Jesus, “Tuhu kin kam nggit mate guna aku? Situhuna ope lenga tekuak manuk, nggo ipersokenndu kari aku telu kali.”
Cataten i teruh
^ As. “tertande bas tenten Jesus.”
