Johanes 14:1-31
14 “Ula pediat latih ukur kena. Erkinitekenlah man Dibata, janah erkiniteken ka lah man bangku.
2 Melala ingan tading i bas rumah Bapakku. Janah, aku nandangi lawes guna nikapken ingan man kena. Adi lang, labo bage ningku.
3 Kenca aku lawes nikapken ingan man kena, reh denga pagi aku janah kubaba kena ku inganku e. Alu bage, i ja aku, i je ka kena.
4 Janah, iteh kena nge dalanna ku ingan si nandangi kudahi e.”
5 Nina Tomas, “O Tuan, la kap teh kami i ja ingan si idahindu e. Uga ka maka banci teh kami dalanna?”
6 Ijawap Jesus, “Aku kap dalan, kebenaren, ras kegeluhen. Ise pe la banci ndahi Bapak adi la kin arah aku.
7 Adi aku nggo itandai kena, Bapakku pe nggo itandai kena ka. Mulai gundari nari, itandai kena Ia janah nggo idah kena Ia.”
8 Nina Pilipus, “O Tuan, cidahken dage Bapak man kami, gelah puas iakap kami.”
9 Ngaloi Jesus, “Bage dekahna aku nggo ras kena. Tapi kam, o Pilipus, lenga kin itandaindu aku? Ise si nggo ngidah aku, nggo ka idahna Bapak. Jadi ngkai maka nindu, ‘Cidahken dage Bapak man kami’?
10 La kin kam tek maka aku ersada ras Bapak, janah Bapak ersada ras aku? Kerina si kukataken man kena, labo i bas aku nari. Tapi, Bapak si tetap ersada ras aku nge si ndahiken dahinNa e.
11 Teklah kam maka aku ersada ras Bapak, janah Bapak ersada ras aku. Adi lang, teklah kam arah pendahin si nggo kulakoken e.
12 Situhuna, ise pe si erkiniteken man bangku, ilakokenna ka nge pendahin si kulakoken, janah ilakokenna pagi pendahin si terbelinen, perban aku nandangi lawes ndahi Bapak.
13 Emaka, kai pe si ipindo kena i bas gelarku, kubereken nge, gelah Bapak imuliaken erkelangken Anak.
14 Kai pe si ipindo kena i bas gelarku, kubereken nge.
15 “Adi keleng ate kena aku, ilakoken kena nge perentah-perentahku.
16 Kupindoken me man Bapak, janah iberekenNa man kena penampat si deban, si rasa lalap ras kena,
17 eme kesah si badia si ncidahken kebenaren. Kesah e la banci idatken doni enda, perban la idahna ntah pe la itandaina. Tapi kena, itandai kena, sebap kesah e lit i bas kena, janah tetap ras kena.
18 Labo kena kutadingken sisada. Reh ka nge aku pagi ndahi kena.
19 Kentisik nari, lanai bo idah doni enda aku. Tapi kena, idah kena nge aku, perban aku nggeluh janah kena pe nggeluh ka nge pagi.
20 I bas wari e pagi, iteh kena me maka aku ersada ras Bapakku, janah kena ersada ras aku, janah aku ersada ras kena.
21 Ise pe si ngaloken janah ndalanken perentah-perentahku, eme kalak si ngkelengi aku. Kalak si ngkelengi aku, ikelengi Bapakku ka nge, janah aku pe ngkelengi ia ras kucidahken me diriku alu jelas man bana.”
22 Jenari nungkun Judas (labo Judas Iskariot), “O Tuan, kai kin si terjadi maka icidahkenndu dirindu alu jelas man kami tapi man doni enda lang?”
23 Ijawap Jesus, “Ise pe si ngkelengi aku, ipatuhina nge kataku. Bapakku pe ngkelengi ia. Reh me kami duana ndahi ia janah tading ras ia.
24 Ise pe si la ngkelengi aku, labo ipatuhina kata-kataku. Kata si ibegiken kena e, labo kata-kataku, tapi rehna i bas Bapak si nuruh aku.
25 “Si enda kukataken man kena sanga aku ras kena denga.
26 Tapi penampat e, eme kesah si badia, si ikirimken Bapak pagi i bas gelarku, iajarina pagi kena kerna kai pe janah ingetkenna kerna kerina si nggo pernah kukataken man kena.
27 Kutadingken man kena kedamen. Kubereken man kena kedamenku. Kedamen si kubereken la seri ras si ibereken doni enda. Ula pediat latih ukur kena ntah pe mbiar.
28 Enggo pernah ibegi kena kukataken, ‘Lawes me aku, janah reh ka aku pagi ndahi kena mulihi.’ Adi keleng ate kena aku, meriah nge ukur kena perban kudahi Bapak, sebap belinen Bapak asangken aku.
29 Emaka gundari kukataken man kena ope lenga si e terjadi, gelah paksa si e terjadi, tek pagi kena.
30 Lanai bo aku gedang ngerana ras kena, sebap reh me penguasa doni enda. Tapi labo ia erkuasa nandangi aku.
31 Kulakoken kai si iperentahken Bapak gelah iteh doni enda maka keleng ateku Bapak. Ota lawes kita jenda nari.
