Johanes 15:1-27
15 “Aku kap batang anggur situhu-tuhu, janah Bapakku kap perjuma anggur e.
2 Dahan-dahan si la erbuah itektekNa, janah dahan-dahan si erbuah ibersihkenNa gelah reh buena buahna.
3 Kena nggo ibersihken alu kata si kupeseh man kena.
4 Tetaplah kena ersada ras aku, janah aku tetap ersada ras kena. Dahan la banci erbuah adi la kin ersada dahan e ras batangna. Bage ka pe kena adi la kin ersada ras aku, la banci erbuah.
5 Aku kap batang anggur e janah kena me dahan-dahanna. Ise pe si tetap ersada ras aku janah aku ersada ras ia, melala me buah si ihasilkenna. Adi la kin ras aku, labo kai pe banci ilakoken kena.
6 Ise pe si la tetap ersada ras aku, ia bali bagi dahan si iambekken, dungna kerah. Jenari ipepulung me dahan-dahan e janah ibenterken ku bas api, dungna tertutung me.
7 Adi tetap kena ersada ras aku, janah kata-kataku tetap lit i bas pusuh kena, pindolah kai si ate kena ipindo kena, e pasti ibereken man kena.
8 Adi terus ihasilken kena melala buah, imuliaken me Bapakku janah e jadi bukti maka kena me murid-muridku.
9 Kena kukelengi bali bagi Bapak ngkelengi aku. Tetaplah min kena i bas kekelengenku e.
10 Adi ipatuhi kena perentah-perentahku, kena tetap i bas kekelengenku. Bali bagi aku nggo matuhi perentah-perentah Bapak janah aku tetap i bas kekelengenNa.
11 “Si enda kukataken man kena gelah inanami kena keriahen ukurku janah gelah tuhu-tuhu kena ermeriah ukur.
12 Enda me perentahku: Sikeleng-kelengenlah kena, bali bagi aku nggo ngkelengi kena.
13 Labo lit keleng ate si belinen asangken kalak si nggit mereken geluhna* guna teman-temanna.
14 Kena kap teman-temanku adi ilakoken kena kai si kuperentahken.
15 Lanai bo kena kugelari budak-budak, perban sekalak budak la itehna kai si ilakoken tuanna. Tapi kugelari kena teman-temanku, perban nggo kupebetehken man kena kerina si nggo kubegi arah Bapakku nari.
16 Kena la milih aku, tapi aku nge si milih kena. Kupilih kena gelah terus ihasilken kena buah, eme buah si tahan rasa lalap. Alu bage, kai pe si ipindo kena man Bapak i bas gelarku, iberekenNa nge man kena.
17 “Si e kuperentahken man kena, gelah kena sikeleng-kelengen.
18 Adi segat ate doni enda kena, ingetlah nggo leben segat atena aku.
19 Adi kena jadi bagin i bas doni enda, ikelengi doni enda nge kena, perban kena jangna. Gundari kena lanai jadi bagin doni enda, janah nggo kupilih kena arah doni enda. Perban si e me maka segat ate doni nandangi kena.
20 Ingetlah kai si nggo pernah kukataken enda: Sekalak budak labo belinen asangken tuanna. Adi aku pe isiksa kalak e, kena pe isiksana ka nge. Adi kata-kataku ipatuhi kalak e, kata-kata kena pe ipatuhina ka nge.
21 Kerina si enda ilakoken kalak e man kena erkiteken gelarku, perban la itandai kalak e Ia si nuruh aku.
22 Adi la min ndai aku reh janah ngerana man kalak e, labo kalak e erdosa. Tapi gundari, lanai banci ipersokenna dosana.
23 Ise si segat atena aku, segat ka nge atena Bapakku.
24 Bicara la pernah kulakoken pendahin-pendahin si lenga pernah ilakoken kalak si deban, labo kalak e erdosa. Tapi gundari, nggo idah kalak e aku janah segat ka atena aku ras Bapakku.
25 Alu bage, terjadi me kata-kata si nggo itulisken i bas undang-undang kalak e, ‘La lit alasenna segat ate kalak e man bangku.’
26 Kusuruh pagi penampat si reh i bas Bapak nari ndahi kena eme kesah si badia si ncidahken kebenaren. Adi nggo pagi reh kesah e, ia kap si ersaksi kerna aku.
27 Kena pe ersaksi ka kerna aku, perban tangtangna nari kena nggo ras aku.
Cataten i teruh
^ Ntah “si nggit ngasamken kesahna.”
