Johanes 16:1-33
16 “Kukataken enda man kena gelah ula bene kiniteken kena.*
2 Ipedarat kalak pagi kena i bas ingan pulung kalak Jahudi* nari. Seh me pagi waktuna maka ise pe si munuh kena erpengakap nggo iberekenna pelayanen si badia man Dibata.
3 Bage perbahanenna, perban la itandaina Bapak ntah pe aku.
4 Aminna pe bage, nggo kupebetehken man kena kerna si enda gelah sanga terjadi pagi e, inget kena maka nggo pernah kupebetehken man kena.
“Tangtangna la kukataken si enda man kena, perban aku ras kena denga.
5 Gundari lawes me aku ndahi Si nuruh aku, tapi sekalak pe kena la nungkun, ‘Ku ja kam lawes?’
6 Tapi erkiteken nggo kupebetehken man kena kerna si enda, ceda kel ate kena.
7 Aminna pe bage, kai si kukataken e benar. Aku lawes guna kiniulin kena. Adi la aku lawes, labo reh penampat e. Tapi adi lawes aku, kukirim me penampat e man kena.
8 Paksa reh penampat e, ibuktikenna me man doni kerna ise si erdosa, janah kerna ise si ngelakoken si benar, bage pe kerna ise si iukum.
9 Pertama, ibuktikenna kerna ise si erdosa perban la kalak e erkiniteken man bangku.
10 Kenca si e, ibuktikenna kerna ise si ngelakoken si benar, perban lawes me aku ndahi Bapak janah lanai idah kena aku.
11 Jenari, ibuktikenna kerna ise si iukum, perban penguasa doni enda nggo iukum.
12 “Melala denga si ateku kukataken man kena, tapi gundari lenga ngasup kena ngangkaisa.
13 Tapi, paksa reh penampat e, eme kesah si badia si ncidahken kebenaren, itegu-tegu penampat e kena guna ngangkai kerina kebenaren. Kai si ikataken penampat e labo rehna i bas penampat e nari, tapi si ikataken penampat e eme kerna kai si ibegi penampat e janah ipebetehken penampat e man kena kerna kai si nandangi terjadi.
14 Imuliaken penampat e pagi aku, sebap ipebetehken penampat e pagi man kena kai si ialoken penampat e i bas aku nari.
15 Kerina jang Bapak, jangku ka nge. Eme sebapna kukataken maka ipebetehken penampat e man kena kai si ialokenna i bas aku nari.
16 Kentisik nari lanai idah kena aku, janah kentisik nari idah kena ka me aku.”
17 Megi si e, piga-piga murid-muridna sisungkun-sungkunen, “Kai maksudna ikatakenna man banta, ‘Kentisik nari lanai idah kena aku, janah kentisik nari idah kena ka me aku,’ ikatakenna ka, ‘sebap lawes me aku ndahi Bapak’?”
18 Emaka nina kalak e, “Kai nge maksudna sanga ikatakenna ‘kentisik nari’? La kap siangka kai si ikatakenna e.”
19 Iteh Jesus maka nungkun ate murid-murid man bana, emaka nina, “Sisungkun-sungkunen nge kena e perban kukataken, ‘Kentisik nari lanai idah kena aku, janah kentisik nari idah kena ka me aku’?
20 Situhuna, tangis ras ngandung pagi kena, tapi doni enda ermeriah ukur. Ceda pagi ate kena, tapi ceda ate kena e berubah jadi keriahen ukur.
21 Mesui kel iakap sekalak diberu adi nggo seh waktuna melahirken, tapi kenca nggo lahir anakna e, lanai ingetna kiniseranna e. Meriah ukurna perban nggo lahir sekalak manusia ku doni enda.
22 Bage ka me kena. Gundari ceda ate kena, tapi paksa kuidah pagi kena mulihi, meriah me ukur kena. Janah la lit ise pe si muat keriahen ukur e i bas kena nari.
23 I bas wari e pagi, lanai lit penungkunen kena man bangku. Situhuna, kai pe si ipindo kena man Bapak i bas gelarku, iberekenNa nge.
24 Seh asa gundari, lenga pernah ipindo kena kai pe i bas gelarku. Pindolah, tentu ngalo me kena gelah tuhu-tuhu meriah ukur kena.
25 “Kukataken kerina enda man kena alu perumpaman.* Seh me pagi paksana maka lanai aku ngerana man kena alu perumpaman,* tapi kukataken man kena alu terus terang kerna Bapak.
26 I bas wari e pagi, mindo kena man Bapak i bas gelarku. Kukataken bage, labo ertina aku mindo man baNa guna keperlun kena.
27 Keleng ate Bapak nandangi kena perban nggo ikelengi kena aku janah tek kena maka aku jadi wakil Dibata.
28 Aku reh jadi wakil Bapak janah aku nggo reh ku doni enda. Gundari, kutadingken me doni enda janah mulih aku ndahi Bapak.”
29 Nina murid-muridna, “Gundari, terus terang kel kam ngerana lanai make perumpaman.*
30 Gundari, nggo iteh kami maka kai pe itehndu nge janah la perlu kalak nungkun man bandu. Erkiteken si e me maka kami tek kam reh i bas Dibata nari.”
31 Ngaloi Jesus, “Enggo tek kena gundari?
32 Reh me paksana, janah nggo seh, merap me kena kerina ku rumah kena sekalak-sekalak janah itadingken kena me aku sisada. Tapi labo aku sisada, sebap Bapak ras aku kap.
33 Kukataken enda man kena, gelah erkiteken aku lit kedamen i bas kena. Inanami kena me kiniseran i bas doni enda, tapi ula kena mbiar! Enggo kap kutaluken doni enda.”
Cataten i teruh
^ As. “ula kena tertuktuk.”
^ As. “sinagoga.” Nen Kamus.
^ Ntah “anding-andingen.”
^ Ntah “anding-andingen.”
^ Ntah “anding-andingen.”
