Johanes 19:1-42
19 Kenca si e, isuruh Pilatus gelah Jesus ibaba janah iligasi.
2 Jenari, iban prajurit-prajurit e mahkota i bas peren duri nari janah itamana ku takal Jesus. Ipakeken kalak e ka man Jesus jubah si warna terong.
3 Mulih-ulih ideheri kalak e Jesus, janah nina, “Mejuah-juah, o Raja Kalak Jahudi!” Iparapi kalak e ka ia.
4 Ndarat ka Pilatus janah nina man kalak si nterem e, “Nenlah! Kubaba ia ndarat gelah iteh kena maka kai pe labo lit kudat salahna.”
5 Emaka ndarat me Jesus alu makeken mahkota duri ras jubah si warna terong. Jenari nina Pilatus man kalak e, “Nenlah dilaki enda!”
6 Emaka sanga inen imam-imam kepala ras petugas-petugas e Jesus, serko kalak e nina, “Bunuh ia i bas tiang!* Bunuh ia i bas tiang!”* Jenari nina Pilatus, “Kena sajalah si mabasa janah bunuh ia, perban kai pe labo lit kudat salahna.”
7 Ngaloi kalak Jahudi, “Lit kap undang-undang kami, janah menurut undang-undang e, ia arus mate, perban iakukenna maka ia anak Dibata.”
8 Megi si e reh biarna Pilatus.
9 Emaka masuk ka ia ku rumah gubernur janah isungkunna Jesus, “I ja nari kin asalndu?” Tapi la ijawap Jesus.
10 Emaka nina Pilatus, “La kam nggit ngerana ras aku? La kin tehndu maka lit kuasaku guna mbebasken kam bage pe mereken ukumen mate man bandu?”*
11 Ijawap Jesus, “Labo lit kuasandu nandangi aku adi la kin ibereken Dibata man bandu. Perban si e me maka belinen dosa kalak si nerahken aku man bandu.”
12 Emaka, terus idarami Pilatus dalan guna mbebasken Jesus. Tapi nina kalak Jahudi e alu sora megang, “Adi ibebaskenndu dilaki ena, kam labo teman Kaisar. Tiap kalak si ngataken dirina raja, situhuna ilawanna kap Kaisar.”
13 Megi kata-kata e, ibaba Pilatus me Jesus ndarat. Jenari kundul Pilatus i kursi penghakimen i bas ingan si igelari Kesain Batu. I bas bahasa Heber igelari Gabbata.
14 Wari e eme wari Persikapen Paskah, kira-kira jam 12 ciger.* Janah nina Pilatus man kalak Jahudi, “Nenlah raja kena!”
15 Tapi serko kalak e, “Bunuh ia! Bunuh ia! Bunuh ia i bas tiang!”* Isungkun Pilatus kalak e, “Arus kin kubereken ukumen mate man raja kena?” Ijawap imam-imam kepala, “Labo lit raja kami selain Kaisar.”
16 Kenca bage, iserahkenna Jesus guna iukum mate i tiang.*
Emaka ibaba kalak e Jesus.
17 Sanga ibaba Jesus tiang siksanna,* lawes ia ku ingan si igelari Ingan Tengkorak. I bas bahasa Heber, igelari Golgota.
18 I je me Jesus ipakuken, i tengah-tengah dua kalak si debanna, sekalak i sebelah kananna, sekalak nari i sebelah kirina.
19 Iban Pilatus tulisen janah itamana i bas tiang siksan* e. Isina, “Jesus kalak Nasaret, Raja Kalak Jahudi.”
20 Enterem kalak Jahudi si mbaca tulisen e, perban ingan Jesus ipakuken i bas tiang ndeher ku kota, janah tulisen e itulis i bas bahasa Heber, Latin, ras Junani.
21 Tapi ngerana imam-imam kepala kalak Jahudi man Pilatus, “Ula tulis, ‘Raja Kalak Jahudi,’ tapi tulislah bagi si ikatakenna, ‘Aku kap Raja Kalak Jahudi.’”
22 Ijawap Pilatus, “Kai si nggo kutulisken, lanai banci iubah.”
23 Kenca ipakuken prajurit-prajurit e Jesus i bas tiang,* ibuat kalak e uisna si arah darat, jenari irigatkenna jadi empat bagin janah ibagikenna sada bagin man tiap prajurit. Ibuat kalak e ka uisna si arah bas, tapi datas nari seh ku teruh uis e la lit penjarumenna.
24 Nina kalak e, “Uis si e ula sirigatken. Mari siban undi guna nentuken man ise uis e.” Alu bage, terjadi me ayat si ngataken, “Irigatken janah ibagiken kalak e uisku si arah darat man dirina sendiri janah iban kalak e undi man uisku si arah bas.” Enda me si ilakoken prajurit-prajurit e.
25 I deher tiang siksan* Jesus, cinder i je nandena, senina nandena, Maria diberu Kleopas, ras Maria Magdalena.
26 Sanga idah Jesus nandena ras murid si ikelengina tedis i deherna, emaka nina man nandena, “O Nande, gundari nari ia me anakndu.”
27 Jenari nina Jesus man murid si ikelengina e, “Gundari nari, ia me nandendu.” Emaka mulai paksa si e, ibaba murid e nande Jesus tading i bas rumahna.
28 Kenca bage, iteh Jesus maka nggo dung kerinana. Gelah terjadi kai si ikataken ayat, ngerana Jesus, “Muas aku.”
29 I je lit sada ingan-ingan si dem anggur macem. Icelupken kalak e bunga karang ku bas anggur e, jenari icucukkenna ku batang hisop, kenca bage itamakenna ku babah Jesus.
30 Kenca icepcep Jesus anggur e, nina, “Enggo dung!” Jenari mungkuk takalna, mate me ia.
31 Wari e eme wari Persikapen, janah la ate kalak Jahudi mayat kalak si ipakuken e tetap lit i tiang siksan i bas wari Sabat (sebap wari e wari Sabat si mbelin). Emaka ipindoken kalak e man Pilatus gelah nahe kalak si ipakuken e ipenggelken janah ipenusur mayatna.
32 Emaka reh prajurit-prajurit janah ipenggelkenna nahe dua kalak si lit i bas tiang i sebelah Jesus.
33 Tapi kenca seh kalak e ku Jesus, idah kalak e Jesus nggo mate. Emaka la ipenggelken kalak e nahena.
34 Tapi itebak sekalak prajurit tulan rangrang Jesus alu tombak, emaka paksa si e ndarat dareh ras lau.
35 Iberitaken kalak si ngidah kejadin e me kerna si e, janah beritana e tuhu. Itehna maka kai si ikatakenna e benar, janah ikatakenna si e gelah kena pe banci tek.
36 Si enda tuhu-tuhu terjadi gelah seh me kai si itulisken i bas ayat, “Sada pe labo pagi ipenggelken* tulanna.”
37 Lit ka ayat si deban si ngataken, “Itatap kalak e pagi kalak si itebakna.”
38 Kenca kejadin e, ipindoken Jusup kalak Arimatea man Pilatus gelah banci min ibuatna mayat Jesus. Jusup e pe murid Jesus ka, tapi la ipebetehkenna man kalak si deban perban mbiar ia man kalak Jahudi. Pemindon Jusup enda ibere Pilatus, emaka lawes Jusup ngelegi mayat Jesus.
39 Nikodemus, si mbarenda pernah reh ndahi Jesus berngi-berngi, ia pe reh ka maba campuren* mur ras gaharu si lit kira-kira 30 kilogram buena.
40 Emaka duana kalak e muat mayat Jesus janah ibungkusna alu uis mbentar, itamakenna ka rempah-rempah ku je, bali bagi kebiasan penguburen kalak Jahudi.
41 I deher ingan Jesus iukum mate* e, lit sada taman, janah i bas taman e lit sada kuburen si mbaru. Lenga pernah lit kalak mate si itamaken ku bas kuburen e.
42 Erkiteken wari e wari Persikapen kalak Jahudi, janah kuburen e pe ndeher, emaka itamaken kalak e mayat Jesus ku je.
Cataten i teruh
^ Ntah “kayu.”
^ Ntah “kayu.”
^ Ntah “bage pe makuken kam i bas tiang?”
^ I bas kalak Jahudi, enda jam si peenemken.
^ Ntah “kayu.”
^ Ntah “kayu.”
^ Nen Kamus.
^ Nen Kamus.
^ Ntah “kayu.”
^ Nen Kamus.
^ Ntah “iancurken.”
^ Ntah banci saja “sada gulung.”
^ Ntah “ipakuken i bas tiang.”
