Johanes 2:1-25
2 I bas wari si peteluken, lit kerja-kerja* bas Kana i Galilea, janah nande Jesus sangana i je.
2 Jesus ras murid-muridna pe iundang ku kerja* e.
3 Sanga nggo nandangi keri lau anggur, nina nande Jesus man Jesus, “Nggo keri lau anggur kalak enda.”
4 Tapi nina Jesus, “O Nande, urusenta kin e? Lenga kap seh waktuku.”
5 Tapi nina nande Jesus man pelayan-pelayan si lit i je, “Lakoken saja kai nina.”
6 Sue ras acara pembersihen diri kalak Jahudi, i je lit enem kudin si iban arah batu nari. Tiap kudin banci iisi 44 liter seh asa 66 liter buena.
7 Nina Jesus, “Isilah kudin e alu lau.” Emaka iisi kalak e ngayak dem.
8 Nina Jesus ka man kalak e, “Gundari, buatlah sitik lau jenari baba man ketua i bas kerja enda.” Emaka ilakoken kalak e.
9 Inanami ketua i bas kerja e me lau si nggo berubah jadi anggur. La itehna ja nari rehna, tapi pelayan-pelayan si mabasa e itehna kerna si e. Emaka idilo ketua i bas kerja e me penganten si dilaki,
10 janah nina, “Biasana anggur si mehulina nge leben ibagiken kalak, janah kenca mabuk tamu-tamu e, emaka ibagiken me anggur si biasa. Tapi kam seh asa gundari lit isimpanndu anggur si mehuli.”
11 Enda me mukjizat si pertama iban Jesus bas Kana i Galilea. Alu bage teridah me kemulianna janah murid-muridna pe erkiniteken man bana.
12 Kenca si e, berkat Jesus ku Kapernaum ras nandena, senina-seninana, bage pe murid-muridna. Tapi la ndekah kalak e tading i je.
13 Gundari nggo ndeher Perayan Paskah kalak Jahudi, emaka lawes me Jesus ku Jerusalem.
14 I bas rumah pertoton, idapeti Jesus kalak si erbinaga lembu, biri-biri, ras merpati. I je lit ka kalak si kundul si dahinna nukari sen.
15 Kenca iban Jesus cambuk arah nali nari, ipelawesna kerina kalak si erbinaga biri-biri ras lembu i bas rumah pertoton e. Itunggalingkenna ka meja-meja kalak si nukari sen seh asa merap kerina sen logamna e.
16 Ngerana Jesus man kalak si erbinaga merpati, “Angkat ndarat kerina barangndu e! Ula nai ban rumah Bapakku jadi ingan erbinaga!”
17 Ngidah si e, inget murid-murid me ayat si ngataken, “Semangatku nandangi rumahNdu gurlah bagi api i bas pusuhku.”
18 Erkiteken si e, nina kalak Jahudi man bana, “Mukjizat kai si banci icidahkenndu man kami guna mbuktiken maka lit hakndu ngelakoken si e kerina?”
19 Ijawap Jesus, “Runtuhkenlah rumah pertoton enda, janah i bas telu wari kubangun ka mulihi.”
20 Ngaloi kalak Jahudi e, “Rumah pertoton enda ibangun 46 tahun dekahna, tapi kam, ibangunndu atendu i bas telu wari?”
21 Situhuna, rumah pertoton si imaksud Jesus eme dagingna.
22 Kenca Jesus ipekeke i bas si mate nari, inget murid-muridna kai si rusur ikatakenna kerna si enda. Emaka tek murid-murid nandangi ayat si itulisken bage pe kai si nggo ikataken Jesus.
23 Paksa Jesus i Jerusalem denga, sanga Perayan Paskah, nterem kalak erkiniteken man bana erkiteken erbage-bage mukjizat si ibanna.
24 Tapi Jesus la tek nandangi kalak e, perban itehna sipat-sipat manusia.
25 Janah Jesus labo perlu ise pe guna mpebetehken kerna manusia, perban iteh Jesus nge isi pusuh manusia.
