Johanes 3:1-36
3 Lit sekalak Parisi gelarna Nikodemus. Ia peminpin kalak Jahudi.
2 I bas sada berngi idahina Jesus, nina, “O Rabbi, iteh kami maka kam me guru si isuruh Dibata. Sebap ise pe labo banci erban mukjizat-mukjizat bagi si ibanndu e, adi la kin Dibata ras ia.”
3 Ngaloi Jesus, “Situhuna kukataken man bandu, ise pe labo ngidah Kerajan Dibata adi la kin ia lahir mulihi.”
4 Ngaloi Nikodemus, “Banci kin kalak si nggo galang lahir mulihi? Me labo ia banci masuk ku bas beltek nandena janah ilahirken mulihi?”
5 Ijawap Jesus, “Situhuna, ise pe la banci masuk ku bas Kerajan Dibata adi la kin ia lahir i bas lau bage pe kesah si badia nari.
6 Si ilahirken arah manusia eme manusia, janah si ilahirken arah kesah si badia eme anak Dibata.
7 Emaka ula ate kena mamang adi kukataken: Kena arus ilahirken mulihi.
8 Ku ja ate angin rembus, ku je me ia, janah ibegindu sorana. Tapi la itehndu i ja nari rehna ntah ku ja perlawesna. Bage ka me tiap kalak si ilahirken arah kesah si badia.”
9 Nungkun ka Nikodemus, “Uga si e banci terjadi?”
10 Ijawap Jesus, “Kam me guru kalak Israel, ngkai maka la tehndu?
11 Situhuna, kami ngerana kerna kai si iteh kami, janah iberitaken kami kerna kai si nggo idah kami. Tapi la ialoken kena kai si iberitaken kami e.
12 Adi kerna doni saja pe si kuceritaken la kena tek, uga ka kena banci tek adi kuceritaken kerna surga?
13 Ise pe labo pernah nangkih ku surga, tapi Anak manusia nusur arah surga nari.
14 Bali bagi Musa sanga i taneh mesawang,* ipeganjangna nipe i tiang, bage ka me Anak manusia arus ipeganjang,
15 gelah kerina kalak si tek man bana banci ndatken kegeluhen si rasa lalap.
16 “Erkiteken keleng kel ate Dibata doni enda, emaka iberekenNa AnakNa si tonggal, gelah ise pe si erkiniteken man bana la ikernepken tapi ndatken kegeluhen si rasa lalap.
17 Dibata nuruh AnakNa ku doni enda labo guna nghakimi, tapi gelah erkelangken ia iselamatken me doni enda.
18 Ise pe si erkiniteken man bana labo ihakimi. Tapi ise pe si la erkiniteken nggo ihakimi, perban la ia erkiniteken nandangi gelar Anak Dibata si tonggal.
19 Enda me alasenna kalak e ihakimi: Terang nggo reh ku doni enda, tapi ngenan ate manusia nandangi kegelapen asangken terang, perban jahat perbahanenna.
20 Ise pe si rusur ngelakoken kai si jahat, segat atena nandangi terang, janah la idahina terang gelah ula tereteh perbahanenna e.
21 Tapi ise pe si ngelakoken kai si benar, idahina me terang e, gelah teridah perbahanenna si sue ras peraten Dibata.”
22 Kenca si e, lawes me Jesus ras murid-muridna ku kuta-kuta i Judea. Tading ia i je ras murid-muridna piga-piga waktu dekahna janah mperidiken kalak.
23 Tapi Johanes pe iperidikenna kalak i Ainon deher Salim, sebap i je melala lau. Enterem kalak rehen ndahi ia gelah iperidiken.
24 Paksa si e, Johanes lenga ipenjaraken.
25 Bas sada paksa, piga-piga murid-murid Johanes sijawapen ras sekalak Jahudi kerna acara pembersihen diri.
26 Emaka idahi murid-murid Johanes me Johanes, nina, “O Guru,* nenlah dilaki si ras kam i sebrang Lau Jordan. Iceritakenndu kerna ia, tapi gundari iperidikenna ka kalak janah kerina kalak ndahi ia.”
27 Ijawap Johanes, “Kai pe labo idat kalak adi la kin Dibata si merekenca man bana.
28 Kena sendiri nge si jadi saksi maka pernah kukataken, ‘Aku labo Kristus, tapi aku isuruh leben asangken ia.’
29 Penganten si dilaki kap mpuna penganten si diberu. Meriah me ukur teman penganten si dilaki paksa cinder i deher penganten si dilaki janah ibegina sorana. Bage me aku, keriahen ukurku la kurang kai pe.
30 Kai si ilakokenna reh buena, tapi kai si kulakoken reh sitikna.”
31 Si reh arah datas nari, belinen asangken ise pe. Si reh arah doni nari, rehna arah doni nari, janah icakapkenna kerna kai si lit i bas doni. Si reh arah surga nari belinen asangken ise pe.
32 Iberitakenna kerna kai si nggo idahna ras kai si nggo ibegina, tapi ise pe la ngaloken beritana.
33 Ise pe si ngaloken beritana e, iakukenna* maka Dibata benar kap.
34 Ia si isuruh Dibata nge si mpeseh kata Dibata, perban ibereken Dibata bana kesah si badia alu simpar.
35 Keleng ate Bapak man AnakNa, janah iberekenNa kerina ku bas tanna.
36 Ise pe si erkiniteken man Anak, ndatken kegeluhen si rasa lalap. Ise pe si la patuh man Anak, labo ndatken kegeluhen, tapi rawa Dibata lalap lit bas ia.
