Johanes 4:1-54
4 Enggo ibegi kalak Parisi maka teremen idat Jesus ras iperidikenna murid-murid asangken Johanes. Sanga iteh Tuan Jesus kerna si e,
2 (situhuna labo Jesus si mperidikenca tapi murid-muridna nge)
3 lawes me ia Judea nari janah berkat ku Galilea.
4 Tapi arus ilewatina Samaria.
5 Seh me Jesus i bas sada kota i Samaria si igelari Sihar. Kota e ndeher ras taneh si nggo ibereken Jakup man Jusup, anakna.
6 I je lit sumur Jakup. Perban latih akap Jesus erdalan, kundul me ia i tepi sumur e. Paksa si e, kira-kira jam 12 ciger.*
7 Reh me sekalak diberu Samaria guna muat lau. Nina Jesus man bana, “Enta ge sitik lau ena gelah kuinem.”
8 (Paksa si e, murid-muridna sangana nukur pangan ku kota.)
9 Ngaloi diberu e, “Kam me kalak Jahudi, janah aku kalak Samaria. Engkai maka ipindondu lau inemen man bangku?” (Biasana kalak Jahudi la nggit erteman ras kalak Samaria.)
10 Ijawap Jesus, “Adi itehndu kerna pemere Dibata, janah adi itandaindu ise si mindo lau inemen man bandu enda, pasti ipindondu man bana lau, jenari iberekenna man bandu lau kegeluhen.”
11 Ngaloi diberu e, “O Pa, mbages kap sumur enda, janah timbandu pe la lit. I ja nari banci buatndu lau kegeluhen?
12 Nini bulang kami, eme Jakup, nggo iberekenna sumur enda man kami. Ia, anak-anakna, ras asuh-asuhenna pe minem jenda nari. Me labo kam belinen asangken ia?”
13 Ijawap Jesus, “Ise pe si minem lau enda, muas denga nge.
14 Tapi ise pe si minem lau si kubereken man bana, lanai pagi pernah muas. Lau si kubereken e jadi sumber lau bas dirina si mereken kegeluhen si rasa lalap.”
15 Ngaloi diberu e, “O Pa, bereken min bangku lau e, gelah lanai aku muas janah la perlu aku mulih-ulih ku jenda muat lau.”
16 Nina Jesus, “To legi dilakindu, janah babalah ia ku jenda.”
17 Ngaloi diberu e, “La kap lit dilakiku.” Nina Jesus, “Payo katandu ena, la lit dilakindu.
18 Sebap nggo lima dilakindu, janah dilaki si ras kam gundari e labo dilakindu. Payo kel si ikatakenndu ena.”
19 Ngaloi diberu e, “O Pa, kam pasti sekalak nabi me.
20 Nini bulang kami nembah Dibata i das deleng enda, tapi ning kena i Jerusalem ngenca ingan nembah Dibata.”
21 Nina Jesus ka, “Teklah man bangku. Seh me pagi waktuna maka lanai kena nembah Bapak das deleng enda bage pe i Jerusalem.
22 La itandai kena ise si isembah kena. Kami itandai kami ise si isembah kami, sebap keselamaten tangtangna reh arah kalak Jahudi nari.
23 Tapi reh me waktuna, janah situhuna gundari pe nggom seh waktuna, kalak si nembah Bapak alu cara si benar nembah Ia pagi alu kesah si badia ras kebenaren. Sebap, Bapak sangana ndarami kalak si nembah Ia alu cara si bage.
24 Dibata e Roh kap, janah kalak si nembah Ia arus nembah Ia alu penegu-negu kesah si badia ras kebenaren.”
25 Ngaloi diberu e, “Kuteh Mesias si igelari Kristus nandangi reh. Adi nggo reh kari ia, ipebetehkenna man kami kerinana alu jelas.”
26 Ijawap Jesus, “Aku kap ia, si sangana ngerana ras kam.”
27 Paksa si e, reh me murid-muridna, sengget kel kalak e ngidah Jesus ngerana ras sekalak diberu. Tapi, sada pe kalak e la nungkun man Jesus ngkai maka ia ngerana ras diberu e janah kai perluna ras diberu e.
28 Emaka itadingken diberu e ingan launa ndai, jenari lawes ia ku kota janah nina man kalak si lit i je,
29 “Ota sinen dilaki si nggo ngataken kerina si nggo pernah kulakoken. Banci saja ia kap Kristus e!”
30 Emaka ndarat me kalak e arah kota janah idahina Jesus.
31 Paksa si e, iiahken murid-muridna ia man, nina, “O Guru,* iah man kita.”
32 Tapi nina Jesus, “Lit kap panganku si la iteh kena.”
33 Sisungkun-sungkunen me murid-murid e, “Me labo lit kalak si naruhken pangan man bana?”
34 Ngaloi Jesus, “Panganku eme ngelakoken peraten Si nuruh aku, janah ndungi dahin si iberekenNa man bangku.
35 Ning kena musim rani empat bulan nari. Tapi, ningku: Nenlah juma-juma nggo megersing* janah nggo banci iperani.
36 Kalak si rani nggo ngaloken upahna janah sangana ipepulungna asil peranin guna kegeluhen si rasa lalap, alu bage kalak si nuan ras kalak si rani radu ras ermeriah ukur.
37 Tuhu me kata-kata enda: Lit si nuan, lit ka si mperanisa.
38 Kusuruh kena mperani kai si labo idahiken kena. Kalak si deban si nggo latih erdahin, tapi kena si ngaloken asilna.”
39 Enterem kalak Samaria i bas kota e erkiniteken man Jesus perban nina diberu e, “Iceritakenna man bangku kerina si nggo pernah kulakoken.”
40 Emaka kenca jumpa kalak Samaria e ras Jesus, ipindokenna gelah tading Jesus ras kalak e. Tading me Jesus dua wari dekahna i je.
41 Asilna, reh teremna kalak si tek kenca megi ajarenna.
42 Jenari nina kalak e man diberu e, “Gundari nggo tek kami, labo erkiteken kai si ikatakenndu saja, tapi perban kami sendiri si nggo megiken ajarenna, janah iteh kami maka dilaki enda me si jadi juru selamat man doni.”
43 Kenca dua wari i je, berkat me Jesus ku Galilea.
44 Enggo pernah ikataken Jesus, “Sekalak nabi labo ihamati i bas kutana.
45 Kenca seh Jesus i Galilea, ialo-alo kalak Galilea ia, perban nggo idah kalak e kerina si ilakoken Jesus sanga perayan i Jerusalem.
46 Jenari mulihken Jesus ku Kana si lit i Galilea, i je pernah iubahna lau jadi anggur. I je lit sekalak pegawai raja, anakna si dilaki sangana sakit i Kapernaum.
47 Sanga ibegina Jesus nggo reh i Judea nari ku Galilea, emaka ijumpaina Jesus, janah ipindokenna gelah reh Jesus guna mpepalem anakna si menam mate.
48 Tapi ngaloi Jesus, “Adi lenga kin idah kena tanda-tanda si luar biasa ras mukjizat-mukjizat, pasti labo kena tek.”
49 Ngaloi pegawai raja e, “O Tuan, rehlah kam ope lenga anakku mate.”
50 Nina Jesus, “To mulihlah kam, nggo malem anakndu e.” Tek dilaki e nandangi kai si ikataken Jesus, emaka lawes ia.
51 Sanga i bas perdalanen, nggo ijumpai budak-budakna ia guna ngataken maka anakna ndai nggo malem.
52 Isungkunna budak-budakna e jam piga anakna e malem. Ijawap kalak e, “Nderbih kira-kira jam sada ciger* nggo malem penakitna.”*
53 Inget bapak anak e maka pas i bas jam e ikataken Jesus, “Nggo malem anakndu e.” Emaka ia ras kerina keluargana tek man Jesus.
54 Enda me mukjizat si peduaken si iban Jesus sanga ia reh arah Judea ku Galilea.
Cataten i teruh
^ I bas kalak Jahudi, enda jam si peenemken.
^ As. “Rabbi.”
^ As. “mbentar.”
^ I bas kalak Jahudi, enda jam si pepituken.
^ Ntah “demamna.”
