Johanes 5:1-47
5 Kenca si e, lit perayan kalak Jahudi, emaka lawes Jesus ku Jerusalem.
2 I Jerusalem, deher pintu Gerbang Biri-Biri, lit sada kolam si igelari Betesda i bas bahasa Heber. Kolam e lit lima serambina.*
3 Enterem kalak si sakit, pentang, pengkar, ras lumpuh i bas serambi e.
4 *——
5 I je lit sekalak dilaki si nggo sakit 38 tahun dekahna.
6 Idah Jesus ia ampar i je janah itehna maka nggo ndekah ia sakit. Emaka isungkun Jesus ia, “Nggit nge kam malem?”
7 Ngaloi dilaki si pinakiten e, “O Pak, la lit kalak si namaken aku ku bas kolam e sanga erburak* launa. Masuk kenca ateku ku bas, mis lebei kalak.”
8 Nina Jesus man bana, “Cinderken! Angkat amakndu, jenari erdalanlah.”
9 Paksa si e pe mis ia malem. Iangkatna amakna jenari erdalan ia.
Wari e wari Sabat.
10 Emaka nina kalak Jahudi man dilaki si nggo ipepalem e, “Wari Sabat kap sendah. La banci iangkatndu amakndu.”
11 Ngaloi dilaki e, “Nina kalak si nggo mpepalem aku ndai, ‘Angkat amakndu, jenari erdalanlah.’”
12 Nungkun kalak e, “Ise si nuruhsa kam ngangkat amak e ras erdalan?”
13 Tapi la itandai dilaki e ise si mpepalem ia, perban Jesus nggo lawes arah tengah jelma si nterem si lit i je.
14 Kenca si e, jumpa Jesus ras dilaki e i rumah pertoton. Nina Jesus man bana, “Gundari nggo malem kam. Ula nai ban dosa, gelah la terjadi si la mehuli man bandu.”
15 Jenari lawes me dilaki e. Ikatakenna man kalak Jahudi maka Jesus kap si mpepalem ia.
16 Erkiteken si e, itentang kalak Jahudi me Jesus perban ilakokenna si e i bas wari Sabat.
17 Tapi nina Jesus man kalak e, “Bapakku terus erdahin ngayak gundari, emaka aku pe terus erdahin.”
18 Megi si e, ergegehna kalak Jahudi ndarami cara guna munuh Jesus, sebap iakap kalak Jahudi maka labo saja wari Sabat si ilanggarna, tapi ipeserina ka dirina ras Dibata alu ngataken Dibata e Bapakna.
19 Emaka nina Jesus man kalak Jahudi e, “Situhuna, kai pe labo banci ilakoken Anak menurut peratenna saja. Tapi kai si idahna iban Bapakna, e nge si ibanna. Kai pe si ilakoken Bapak, bage kang nge si ilakoken Anak alu cara si seri.
20 Sebap keleng ate Bapak nandangi Anak, janah icidahkenNa kerina man Anak e kai si ilakokenNa. IcidahkenNa ka pagi perbahanen-perbahanen si belinen asangken si enda gelah kena jengang.
21 Bali bagi Bapak nggo ipekekeNa kalak si mate, jenari iberekenNa kegeluhen man bana, bage ka me Anak, ipegeluhna pagi ise pe si atena ipegeluhna.
22 Ise pe labo ihakimi Bapak, tapi iberekenNa kuasa man Anak guna nghakimi,
23 gelah kerina kalak nghamati Anak e, bali bagi nghamati Bapak. Ise pe si la nghamati Anak, la nghamati Bapak si nuruh ia.
24 Situhuna, ise pe si megiken kataku enda janah tek man Dibata si nuruh aku, ndatken kegeluhen si rasa lalap janah labo ihakimi. Janah, ia bali bagi kalak si nggo mate tapi gundari nggo nggeluh mulihi.
25 “Situhuna kukataken man kena, reh me waktuna janah gundari waktuna e nggo seh, ibegi kalak si mate pagi sora Anak Dibata e, janah ise pe si megi ras patuh man bana, nggeluh me ia.
26 Lit kuasa Bapak mereken kegeluhen, janah iberekenNa ka kuasa si bage man Anak.
27 Ibereken Bapak ka kuasa man bana guna nghakimi, sebap ia Anak manusia.
28 Ula atendu mamang kerna si enda, sebap reh me waktuna maka kerina kalak si lit i bas kuburen megi sorana pagi,
29 jenari ndarat me. Kalak si mehuli perbahanenna ipekeke guna nggeluh si rasa lalap, tapi kalak si jahat perbahanenna ipekeke guna ihakimi.
30 Kai pe labo banci kulakoken menurut peratenku saja. Kuhakimi kalak menurut kai si ikataken Bapak, janah penghakimenku adil perban la kuhakimi kalak menurut peratenku tapi menurut peraten Si nuruh aku nge.
31 “Adi aku ngenca si mere kesaksin kerna diriku, la kap benar kesaksinku e.
32 Lit kap si deban si ngataken kerna aku, janah kuteh maka si ikatakenNa kerna aku e benar.
33 Enggo isuruh kena kalak njumpai Johanes, janah nggo ikataken Johanes kerna kebenaren.
34 Situhuna, la kuperluken manusia guna mpebetehken kerna aku, tapi kukataken si enda gelah kena kerina iselamatken.
35 Johanes bali kap ras lampu si nggeluh janah ersinar. I bas waktu si kentisik, merhat kena ngaloken terangna e.
36 Tapi i bas aku lit berita si belinen asangken berita Johanes, eme pendahin si ibereken Bapak man bangku gelah kudungi, pendahin e kap si sangana kulakoken. Dahin e me si jadi bukti maka aku isuruh Bapak.
37 Janah Bapak si nuruh aku e pe nggo ersaksi kerna aku. Lenga pernah ibegi kena soraNa ntah pe idah kena ayoNa,
38 janah kataNa la lit i bas pusuh kena perban la kena tek man kalak si isuruhNa e.
39 “Ipelajari kena Kitap si Badia alu mbages, perban alu bage iakap kena banci idat kena kegeluhen si rasa lalap. Situhuna, ayat-ayat Kitap si Badia e nge si mpebetehken kerna aku.
40 Tapi la kena nggit ndahi aku guna ngaloken kegeluhen e.
41 La kualoken kemulian arah manusia,
42 tapi kueteh maka labo lit kekelengen kena man Dibata.
43 Reh aku i bas gelar Bapakku, tapi la ialoken kena aku. Adi kalak si deban si reh i bas gelarna sendiri, ialoken kena ia.
44 Uga kena banci tek man bangku adi meriah kap kena ngaloken kemulian arah manusia ras imuliaken kena ka manusia, janah la iusahaken kena ndarami kemulian si rehna arah Dibata si tonggal?
45 Ula iakap kena aku si nuduh kena i lebe-lebe Bapak. Tapi si nuduh kena eme Musa, si man bana kena erpengarapen.
46 Situhuna, adi tek kin kena man Musa, arusna tek ka nge kena man bangku, sebap Musa e nge si nulisken kerna aku.
47 Tapi adi la kena tek man kai si ituliskenna, uga ka kena banci tek man kai si kukataken?”
Cataten i teruh
^ Ntah “lorongna.”
^ Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
^ Ntah “berguncang.”
