Johanes 6:1-71
6 Kenca si e, lawes me Jesus ku sebrang Lawit Galilea ntah pe Tiberias.
2 Enterem kalak ngikutken ia, sebap nggo idah kalak e mukjizat-mukjizat si ibanna guna mpepalem kalak sakit.
3 Emaka nangkih Jesus ku sada deleng janah kundul ia i je ras murid-muridna.
4 Paksa si e Perayan Paskah kalak Jahudi nggo ndeher.
5 Sanga idah Jesus nterem jelma reh ndahi ia, isungkunna Pilipus, “I ja nge situkur pangan guna kalak si nterem enda?”
6 Situhuna bage nina Jesus guna nguji Pilipus, sebap itehna nge kai si arus ilakokenna.
7 Ngaloi Pilipus, “Aminna tersitik pe ibereken man tiap kalak, labo bias 200 dinar* guna nukur roti.”
8 Sekalak i bas murid-murid e nari, eme Andreas, senina Simon Petrus, ngerana man Jesus,
9 “I jenda lit sekalak anak-anak. I bas ia lit lima roti barli ras dua ikan si kitik. Tapi bias kin man kalak si bagenda teremna?”
10 Nina Jesus, “Suruhlah kalak e kundul.” I bas ingan e lit melala dukut, emaka kundul me jelma si nterem e. I je, si dilaki saja lit teremna kira-kira 5.000 kalak.
11 Jenari, ibuat Jesus me roti e, ertoto ia ngataken bujur man Dibata. Kenca si e, ibagikenna man jelma si nterem. Ikan e pe bage ka nge ibanna. Kerina kalak e man ngayak besur.
12 Kenca besur kalak e kerina, nina Jesus man murid-muridna, “Pepulung kerina sisana, gelah ula lit si terbuang.”
13 Emaka ipepulung murid-murid kerina sisana. Lit 12 keranjang sisana arah roti barli si lima ndai.
14 Ngidah mukjizat si iban Jesus, nina jelma si nterem e, “Ia tuhu-tuhu Nabi si ijanjiken guna reh ku doni enda.”
15 Kenca si e, perban iteh Jesus maka ipaksa kalak e atena ia jadi raja, emaka lawes ka Jesus sisada ku deleng.
16 Kenca nandangi berngi, lawes me murid-muridna ku lawit,
17 inangkihina perahu, jenari isebrangina lawit e guna berkat ku Kapernaum. Wari nggo berngi, tapi Jesus lenga reh ndahi murid-muridna.
18 Paksa si e, angin meter rembus janah lawit pe ergalumbang.
19 Kenca ikayuh murid-murid e perahuna kira-kira lima ntah enem kilometer dauhna, idah kalak e Jesus erdalan i datas lawit janah ideherina perahu e. Mbiar kel murid-murid e.
20 Tapi nina Jesus man kalak e, “Aku nge enda. Ula mbiar!”
21 Emaka alu meriah ukur ialo-alo kalak e Jesus ku das perahu. Janah, minter seh perahu e ku ingan si ituju kalak e.
22 Paginna, nterem denga kalak i sebrang lawit. I je, sada perahu si kitik ngenca idah kalak e. Sanga nggo berkat murid-murid, Jesus la ikut i das perahu e.
23 Seh me perahu-perahu arah Tiberias nari, jenari ngadi perahu-perahu e i deher ingan jelma si nterem man roti kenca Jesus ngataken bujur man Dibata.
24 Kenca idah jelma si nterem e maka Jesus ras murid-muridna la lit i bas perahu-perahu e, emaka nangkih kalak e ku das perahu-perahu e guna berkat ku Kapernaum ndarami Jesus.
25 Kenca jumpa jelma si nterem e ras Jesus i sebrang lawit, nungkun kalak e, “O Guru,* ndiganai kam seh i jenda?”
26 Ijawap Jesus, “Situhuna, idarami kena aku labo perban nggo idah kena mukjizat-mukjizat si kuban, tapi perban nggo besur kena man roti.
27 Ula erdahin guna pangan si banci mali. Erdahinlah guna pangan si ndekah tahan janah mereken kegeluhen si rasa lalap. Pangan si enda me pagi si ibereken Anak manusia man kena, sebap Bapak, eme Dibata, Ia nge si nggo mereken tanda pengesahen* man Anak manusia e, si jadi bukti maka ngena ate Bapak nandangi ia.”
28 Jenari nungkun ka kalak ndai, “Kai si arus ilakoken kami guna ndahiken dahin Dibata?”
29 Ijawap Jesus, “Guna ndahiken dahin Dibata, arus kena erkiniteken man kalak si isuruhNa.”
30 Nina kalak e, “Mukjizat kai nge si banci ibanndu gelah idah kami janah tek kami man bandu? Kai nge si atendu ilakokenndu?
31 Nini bulang kami nai, ipanna manna i taneh mesawang,* bagi si lit tertulis, ‘IberekenNa man kalak e roti si reh i surga nari guna ipan.’”
32 Ngaloi Jesus, “Situhuna, labo Musa si mereken roti i surga nari, tapi Bapakku nge si mereken roti situhu-tuhu i surga nari.
33 Roti si ibereken Dibata eme ia si nusur arah surga nari janah mereken kegeluhen man doni.”
34 Emaka ning kalak e, “O Tuan, bereken min lalap roti e man kami.”
35 Nina Jesus, “Aku kap roti kegeluhen e. Ise pe si reh ndahi aku, lanai ia melihe. Janah, ise pe si erkiniteken man bangku, lanai ia muas.
36 Tapi bagi si nggo kukataken man kena, nggo pe idah kena aku tapi lalap kena la tek man bangku.
37 Kerina si ibereken Bapak man bangku, idahina nge pagi aku. Janah ise pe si reh ndahi aku, labo kupelawes.
38 Sebap aku nusur arah surga nari, labo guna ngelakoken peratenku tapi ngelakoken peraten Si nuruh aku.
39 Peraten Si nuruh aku, eme gelah kerina kalak si nggo iserahkenNa man bangku sada pe la bene, tapi gelah i bas wari pendungi pagi, kupekeke me kalak e.
40 Sebap peraten Bapakku eme gelah tiap kalak si ngaloken Anak e janah erkiniteken man bana, ngaloken kegeluhen si rasa lalap. Janah, i bas wari pendungi kupekeke ia pagi.”
41 Perban ikataken Jesus, “Aku kap roti si nusur arah surga nari,” emaka mulai jungut-jungut kalak Jahudi,
42 nina, “La kin ia Jesus anak Jusup? Sitandai kap bapakna ras mamakna. Gundari, ngkai ka maka ikatakenna ia nusur i surga nari?”
43 Nina Jesus, “Ula nai kena jungut-jungut.
44 Labo ise pe banci reh ndahi aku adi la kin itarik Bapak si nuruh aku, janah i bas wari si pendungi pagi kupekeke me ia.
45 Lit tertulis i bas Ajaren Nabi-Nabi, ‘Kerina kalak pagi iajari Jahwe.’ Kerina si megiken Bapak janah erlajar i bas Ia nari, reh ndahi aku.
46 Enda labo ertina maka lit kalak si nggo pernah ngidah Bapak, tapi ia si reh i bas Dibata nari ngenca si nggo ngidah Bapak.
47 Situhuna, ise pe si tek, ialokenna pagi kegeluhen si rasa lalap.
48 “Aku kap roti kegeluhen.
49 Nini bulang kena, ipanna manna i taneh mesawang,* tapi mate ka nge ia.
50 Tapi ise pe si man roti si nusur arah surga nari, labo pagi mate.
51 Aku kap roti si mereken kegeluhen si nusur arah surga nari. Ise pe si man roti enda, nggeluh pagi si rasa lalap. Roti si nandangi kubereken man kena eme dagingku, gelah ialoken doni enda kegeluhen.”
52 Kenca si e, sijawapen me kalak Jahudi, nina, “Uga nge ibanna maka banci dagingna e iberekenna guna sipan?”
53 Emaka nina Jesus, “Situhuna, adi la kin ipan kena daging Anak manusia janah la inem kena darehna, labo lit bas kena kegeluhen.
54 Ise pe si man dagingku ras minem darehku, ialokenna pagi kegeluhen si rasa lalap. Janah, i bas wari pendungi pagi, kupekeke me ia.
55 Sebap, dagingku eme pangan situhu-tuhu, janah darehku eme inemen situhu-tuhu.
56 Ise pe si man dagingku ras minem darehku, tetap ia ersada ras aku janah aku ersada ras ia.
57 Bali bagi Bapak si nggeluh nuruh aku, janah aku pe nggeluh perban Bapak, emaka ise pe si man dagingku nggeluh pagi erkiteken aku.
58 Enda me roti si nusur arah surga nari. Enda labo seri ras roti si ipan nini bulang kena mbarenda, sebap mate kang ia. Ise pe man roti enda, nggeluh pagi ia si rasa lalap.”
59 Kerina enda ikataken Jesus sanga ia ngajar i bas ingan pulung kalak Jahudi* i Kapernaum.
60 Megi si e, nterem murid-muridna ngataken, “Sengget kel kita megi rananna e. Ise ka kin si nggit megikenca?”
61 Tapi iteh Jesus maka jungut-jungut murid-muridna megi si e, emaka nina, “Kitik nge ukur kena perban si e?
62 Uga ka adi idah kena Anak manusia nangkih ku ingan asalna?
63 Kesah Dibata kap si mereken kegeluhen, labo gegeh manusia si la lit ertina. Kai si kukataken man kena e rehna i bas kesah si badia nari janah mereken kegeluhen.
64 Tapi lit piga-piga i bas kena nari si la tek.” Tangtangna nari pe nggo iteh Jesus ise si la tek janah ise si nghianati ia pagi.
65 Nina Jesus ka, “Perban si e maka kukataken ndai man kena, labo ise pe banci reh ndahi aku adi la kin ijinken Bapak.”
66 Erkiteken si e, nterem murid-muridna mulihken ku kegeluhenna si mbarenda janah lanai ikutkenna Jesus.
67 Emaka isungkun Jesus 12 rasulna, “Kena pe itadingken kena ka ate kena aku?”
68 Ijawap Simon Petrus, “O Tuan, man ise nari kami arus lawes? Kata-katandu kap si mereken kegeluhen si rasa lalap.
69 Kami nggo tek janah nggo iteh kami maka kam kap Si Badia i bas Dibata nari.”
70 Nina Jesus man murid-muridna, “Enggo kupilih kena 12 kalak, tapi sekalak i bas kena nari tukang pitnah* kap.”
71 Situhuna, si paksana icakapken Jesus eme Judas anak Simon Iskariot. Aminna pe ia sekalak i bas 12 rasul e nari, ia me pagi si nghianati Jesus.
Cataten i teruh
^ Sen logam pirak kalak Roma.
^ As. “Rabbi.”
^ As. “meterai.”
^ Taneh si mbelang si jarang iingani.
^ Taneh si mbelang si jarang iingani.
^ As. “sinagoga.” Nen Kamus.
^ Ntah “iblis.”
