Johanes 7:1-52
7 Kenca si e, erdalan Jesus arah sada ingan ku ingan si debanna i Galilea. La ia nggit lawes ku Judea perban kalak Jahudi paksana ndarami kesempaten guna munuh ia.
2 Tapi paksa si e, lanai ndekah Wari Raya Sapo-Sapo.
3 Emaka nina senina-seninana,* “Tadingkenlah ingan enda janah laweslah ku Judea, gelah murid-muridndu pe ngidah dahin si idahikenndu.
4 Sebap labo lit kalak erbuni-buni erdahin adi atena jadi kalak terkenal. Perban dahin si bage nge si ilakokenndu, cidahkenlah dirindu man doni.”
5 Situhuna senina-seninana* la erkiniteken man bana.
6 Emaka nina Jesus, “Waktuku lenga seh. Tapi kena katawari pe banci.
7 La lit alasen doni enda rate segat man kena, tapi doni rate segat man bangku perban kupebetehken perbahanen doni si jahat.
8 To lawes saja kena ku perayan e. Aku lenga ku jah perban lenga seh waktuku.”
9 Kenca bage nina, tetap Jesus tading i Galilea.
10 Kenca lawes senina-seninana* ku perayan e, Jesus pe lawes ku je alu erbuni-buni.
11 Emaka mulai kalak Jahudi ndarami ia i bas perayan e janah nina, “I ja dilaki e?”
12 Enterem kalak erkusik-kusik kerna Jesus. Lit si ngataken, “Ia kalak bujur.” Lit ka si ngataken, “Lang, itipuna jelma si nterem.”
13 Tapi ise pe la pang terang-terangen ncakapken Jesus perban mbiar man kalak Jahudi.
14 Kenca setengah acara perayan e erdalan, masuk Jesus ku rumah pertoton jenari mulai ia ngajar.
15 Mamang ate kalak Jahudi janah nina, “I ja nari nge pemetehna kerna Kitap si Badia adi labo ia pernah sekolah?”
16 Ngaloi Jesus, “Kai si kuajarken labo ajarenku, tapi ajaren Ia si nuruh aku.
17 Kalak si nggit ndalanken peraten Dibata pasti itehna si kuajarken e i bas Dibata nari nge ntah arah diriku sendiri.
18 Ise pe si ngerana menurut perukurenna sendiri, iusahakenna nge gelah ia imuliaken. Tapi ise pe si imuliakenna si nuruh ia, kalak benar kap ia janah la lit si palsu bas ia.
19 La kin ibereken Musa Undang-Undang man kena? Tapi sada pe la ipatuhi kena. Engkai maka ibunuh kena ate kena aku?”
20 Ngaloi kalak si nterem e, “Irasuki malekat jahat kap kam e. Ise kin atena munuh kam?”
21 Ijawap Jesus, “Sada ngenca si kulakoken janah kerina kena kemamangen.
22 Perban ibereken Musa perentah kerna sunat, emaka isunat kena kalak i bas wari Sabat. Situhuna perentah e labo arah Musa tapi arah nini bulangna.
23 Adi kalak isunat i bas wari Sabat gelah Undang-Undang Musa la ilanggar, ngkai maka merawa kel kena sanga kupepalem kalak i bas wari Sabat?
24 Ula nai hakimi kena kalak arah kai si teridah saja. Hakimilah kalak alu adil.”
25 Jenari ngerana penduduk Jerusalem, “La kin enda nge dilaki si ibunuh penguasa-penguasa kalak Jahudi atena?
26 Nenlah! Ngerana ia i lebe-lebe jelma si nterem, tapi la lit kai pe nina kalak e. Enggo kin iteh penguasa-penguasa e maka ia Kristus?
27 Siteh kap ja nari asal dilaki enda. Tapi, adi Kristus reh, ise pe la meteh ja nari asalna.”
28 Sanga Jesus ngajar i bas rumah pertoton, ngerana ia, “Itandai kena aku janah iteh kena ja nari asalku. Aku reh labo erkiteken sura-suraku. Ia si nuruh aku tuhu-tuhu lit, tapi la itandai kena.
29 Tapi, kutandai Ia. Sebap aku reh jadi wakilNa, janah Ia si nuruh aku.”
30 Iusahaken kalak e nangkap Jesus, tapi sada pe la banci ngelakokenca, perban lenga seh waktuna.
31 Aminna pe bage, nterem kalak si erkiniteken man bana janah nina, “Adi reh kari Kristus, me melala kari ibanna mukjizat? La kin e si sangana ilakoken dilaki enda?”
32 Ibegi kalak Parisi jelma si nterem e erkusik-kusik kerna Jesus, emaka isuruh imam-imam kepala ras kalak Parisi me piga-piga petugas guna nangkap Jesus.
33 Tapi nina Jesus, “Kentisik nari ngenca aku ras kena, kenca bage mulih aku ndahi Si nuruh aku.
34 Idarami kena pagi aku, tapi la idat kena, sebap la banci kena reh ku ingan si kudahi e.”
35 Emaka sisungkun-sungkunen kalak Jahudi e, “Ku ja kin ate dilaki enda lawes, maka la banci sijumpai? Entah, lawes kin atena ku kalak Jahudi si lit i tengah-tengah kalak Junani janah ngajari kalak Junani?
36 Kai nge maksudna maka nina, ‘Idarami kena pagi aku, tapi la idat kena, sebap la banci kena reh ku ingan si kudahi e’?”
37 I bas wari terakhir perayan e, e me wari si pentingna, tedis Jesus janah nina, “Ise si muas, rehlah ku aku gelah ia minem.
38 Ise pe si erkiniteken man bangku, ia bali bagi si itulisken i bas ayat enda, ‘I bas pusuhna nari, maler me lau si mereken kegeluhen.’”
39 Situhuna, si icakapken Jesus eme kerna kesah si badia, si nandangi ialoken kalak si erkiniteken man bana. Paksa si e, kesah si badia lenga ibereken, sebap Jesus lenga imuliaken.
40 Megi si e, piga-piga jelma si nterem si lit i je ngataken, “Tuhu-tuhu kap ia Nabi.”
41 Deba ngataken, “Ia kap Kristus.” Si debanna ka ngataken, “Kristus me labo reh arah Galilea nari?
42 La kin lit ayat si ngataken maka Kristus e reh arah kesusuren Daud janah asalna arah Betlehem, kuta kemulihen Daud?”
43 Erbage-bage me pendapat jelma si nterem e kerna ia.
44 Piga-piga kalak itangkapna atena ia, tapi sada pe la banci njemak ia.
45 Kenca si e, mulih me petugas-petugas ndahi imam-imam kepala ras kalak Parisi. Isungkun kalak e me petugas-petugas e, “Engkai maka la ibaba kena ia ku jenda?”
46 Ngaloi kalak e, “Ise pe lenga pernah ngerana bagi ia.”
47 Nina kalak Parisi e, “La kin lah kena pe nggo itipuna?
48 Me labo lit penguasa-penguasa ntah pe kalak Parisi si nggo erkiniteken man bana?
49 Jelma si nterem enda, si la meteh Undang-Undang Musa, labo kap merga i lebe-lebe Dibata.”
50 Sekalak i bas kalak enda nari eme Nikodemus, si pernah njumpai Jesus, ngerana,
51 “Menurut undang-undangta, me labo banci sihakimi kalak adi lenga sibegi ras siteh kai si ilakokenna?”
52 Ngaloi kalak e, “La kin lah asalndu pe arah Galilea nari nge? Pelajarilah Kitap si Badia janah itehndu me maka labo lit nabi si reh arah Galilea nari.”*
Cataten i teruh
^ Ntah “agi-agina.”
^ Ntah “agi-agina.”
^ Ntah “agi-agina.”
^ Piga-piga tulisen si nai si banci iteki, ibenekenna ayat 53 seh asa pasal 8 ayat 11.
