Johanes 9:1-41
9 Sanga Jesus erdalan, idahna sekalak dilaki si pentang mulai lahirna nari.
2 Nungkun murid-muridna, “O Guru,* dosa ise nge si erbanca ia pentang mulai lahirna nari? Dosana ntah dosa orang tuana?”
3 Ijawap Jesus, “Ia pentang labo perban dosana ntah pe dosa orang tuana. Tapi gelah erkelangken ia, teridah me perbahanen Dibata.
4 Sanga ciger denga wari, arus sidahiken pendahin Si nuruh aku, sebap reh me berngi janah paksa si e ise pe la banci erdahin.
5 Sanga aku i bas doni enda denga, aku kap terang doni.”
6 Kenca ikataken Jesus bage, icidurina taneh, iadukna taneh ras cidurna e, jenari itamakenna ku mata dilaki si pentang e,
7 janah nina, “To cucilah matandu i kolam Siloam” (adi iterjemahken ertina, “Isuruh”). Lawes me dilaki e, icucina matana, janah sanga mulihken, nggo banci ia erpengidah.
8 Jenari, tetangga-tetangga ras kalak si rusur ngidah dilaki si mindo-mindo e, mulai ngerana, “La kin ia dilaki si biasa kundul mindo-mindo?”
9 Piga-piga kalak ngatakenca, “Ue, ia me kalakna.” Si deban ngataken, “Labo, mirip saja nge.” Tapi dilaki si nggo erpengidah e ngataken, “Ue, aku kap jelmana.”
10 Emaka isungkun kalak e ia, “Uga maka kam banci erpengidah?”
11 Ijawapna, “Dilaki si gelarna Jesus, iadukna taneh ras cidurna, jenari itamakenna ku mataku, janah nina, ‘To cucilah matandu i kolam Siloam.’ Emaka lawes aku janah kucuci mataku, jenari nggo banci aku erpengidah.”
12 Isungkun kalak e, “I ja dage ia?” Ijawapna, “La kuteh.”
13 Ibaba kalak e me dilaki si nggo erpengidah e man kalak Parisi.
14 Sanga iaduk Jesus taneh ras cidurna, janah ibanna dilaki e erpengidah, rembang i bas wari Sabat.
15 Emaka isungkun kalak Parisi me dilaki e kai sebapna maka ia nggo erpengidah. Ngaloi dilaki e, “Lit si itamakenna ku mataku, jenari kucuci mataku, janah dungna nggo banci aku erpengidah.”
16 Nina piga-piga kalak Parisi, “Ia labo arah Dibata nari perban la ipatuhina wari Sabat.” Si deban ngataken, “I ja nge banci kalak si erdosa erban mukjizat si bage!” Emaka la seri pendapat kalak e.
17 Isungkun kalak e ka dilaki e, “Enggo ibanna kam erpengidah, jadi uga pendapatndu kerna ia?” Ijawapna, “Ia sekalak nabi.”
18 Tapi, kalak Jahudi la tek maka ia mbarenda pentang janah gundari nggo erpengidah. Emaka idilo kalak e orang tuana.
19 Isungkunina, “Tuhu kin enda anak kena si ikataken kena nggo pentang mulai lahirna nari? Uga maka gundari ia nggo erpengidah?”
20 Ijawap orang tuana, “Payo ia anak kami, janah ia pentang lahirna nari.
21 Tapi la teh kami uga maka gundari ia nggo erpengidah. Janah, la teh kami ise si erbanca ia erpengidah. Sungkunilah ia. Nggom ia galang janah banci nge ijawapna.”
22 Bage nina orang tuana perban mbiar ia man kalak Jahudi. Sebap nggo ersada arih kalak Jahudi maka ise pe si ngakui Jesus e Kristus, arus ipedarat arah ingan pulung kalak Jahudi* nari.
23 Erkiteken si e me maka nina orang tuana, “Nggom ia galang. Sungkunilah ia.”
24 Sekali nari idilo kalak e dilaki si nggo erpengidah e, janah nina, “Muliakenlah Dibata. Katakenlah situhuna. Teh kami maka ia kalak perdosa nge.”
25 Ngaloi ia, “Kerna ia kalak perdosa ntah lang, e labo kuteh. Sada ngenca kuteh: Mbarenda aku pentang, gundari nggo erpengidah.”
26 Nungkun ka kalak e, “Kai si ilakokenna man bandu? Uga maka banci ibanna kam erpengidah?”
27 Ijawap dilaki e, “Enggo kap kukataken man kena, tapi la ibegiken kena. Engkai maka kena merhat denga megikenca? Ntah, jadi murid-muridna kin ate kena?”
28 Merawa kalak e, janah ihina kalak e ia, nina, “Kamlah murid-muridna, tapi kami murid-murid Musa kap.
29 Si teh kami, man Musa nge Dibata ngerana. Tapi kerna kalak si ikatakenndu e, la teh kami i ja nari ia.”
30 Ngaloi dilaki e, “Ngeri naring nge ah! La teh kena ja nari ia rehna, padahal nggo ibanna mataku erpengidah.
31 Siteh maka labo ibegiken Dibata kalak perdosa. Tapi ibegikenNa kalak si mbiar man baNa janah ngelakoken peratenNa.
32 Nai-nai nari, lenga pernah terbegi maka lit kalak si ngasup erban kalak si pentang lahirna nari jadi erpengidah.
33 Adi la kin ia i bas Dibata nari, labo ia banci erban kai pe.”
34 Ijawap kalak e, “Mulai lahirndu nari pe, kam nggo dem alu dosa. Tapi gundari iajarindu ka kami?” Kenca bage, ipelawes kalak e dilaki e ku darat!
35 Ibegi Jesus maka dilaki e nggo ipelawes kalak e. Sanga jumpa ras dilaki si nggo erpengidah e, isungkun Jesus ia, “Erkiniteken nge kam man Anak manusia?”
36 Ijawapna, “O Pa, ise kin ia? Katakenlah man bangku gelah erkiniteken aku man bana.”
37 Nina Jesus, “Enggo kap idahndu ia. Situhuna, ia sangana ngerana ras kam.”
38 Nina dilaki e, “O Tuan, erkiniteken aku.” Jenari, erjimpuh dilaki e man Jesus.
39 Kenca si e, nina Jesus, “Aku reh ku doni enda guna nghakimi, gelah kalak pentang banci erpengidah, janah kalak si erpengidah jadi pentang.”
40 I je lit piga-piga kalak Parisi megi si ikataken Jesus, janah nina, “Jadi menurutndu, kami pe pentang?”
41 Ijawap Jesus, “Adi kena pentang, kena la erdosa. Tapi ning kena, ‘Kami erpengidah.’ Emaka tetap kena erdosa.”
