Ketangkasen 1:1-20
1 Enda me ketangkasen si ibereken Dibata man Jesus Kristus guna ncidahken man budak-budak Dibata kerna kai si pasti nandangi terjadi. Isuruh Jesus malekatna ndahi budak Dibata* eme Johanes guna mpebetehken kerna si enda arah tanda-tanda.
2 Emaka ipebetehken Johanes me kerina si nggo idahna e. E me kata Dibata bage pe kesaksin si ibereken Jesus Kristus.
3 Ermeriah ukurlah kalak si mbaca nubuat enda alu sora si megang janah si megikenca, bage pe si ndalanken kai si tertulis i bas nubuat e, erkiteken waktu si itetapken Dibata nggo ndeher.
4 Itulisken Johanes man pitu runggun si lit i bas Propinsi Asia:
Mbera ialoken kena lias ate si mbelin ras kedamen arah “Dibata si mbarenda nari nggo lit, gundari, ras i bas waktu si nandangi reh,” bage pe arah pitu kesah si badia si lit i lebe-lebe tahtaNa,
5 bage pe arah Jesus Kristus, eme “Saksi si Setia,” “Si pertama ipekeke i bas si mate nari,” janah “Penguasa nandangi raja-raja i doni enda.”
Keleng ate Jesus kita janah ibebaskenna kita arah dosa-dosata alu darehna.
6 Ijadikenna kita raja-raja ras imam-imam guna ngelayani Dibata eme Dibatana ras Bapakna. Man bana me kemulian ras gegeh rasa lalap seh rasa lalap. Amin.
7 Nenlah! Reh me ia i bas embun janah kerina kalak ngidah ia termasuk kalak si pernah nebak ia. Erkiteken ia, kerina suku i doni enda mekpeki bana pagi alu erceda ate. Payo, Amin.
8 Nina Dibata Jahwe, “Aku kap Alpa ras Omega.* Aku kap Si Madakuasa si mbarenda nari nggo lit, gundari, ras i bas waktu si nandangi reh.”
9 Aku Johanes, turang senina kena, si radu ras kena jadi raja, si ngenanami kiniseran, janah megenggeng selaku pengikut Jesus. Aku i Pulau Patmos erkiteken kupebetehken kerna Dibata janah ersaksi kerna Kristus.
10 Erkiteken dem alu kesah Dibata, aku lit i bas wari Tuan. Kubegi sora si megang bagi sora trompet i pudiku,
11 nina sora e, “Kai si nggo idahndu, tuliskenlah e i bas sada gulungen janah kirimken man pitu runggun, i Epesus, Semirna, Pergamon, Tiatira, Sardis, Piladelpia, ras Laodikea.”
12 Kutulihken ku pudi guna ngenen ise si ngerana man bangku e. Kuidah pitu nahe lampu si iban i bas emas nari.
13 I bas tengah-tengah nahe lampu e lit kuidah bagi anak manusia. Ipakena baju si gedang seh ngayak nahena, janah lit uis si iban arah emas nari iiketken i bas tentenna.
14 Selain si e, buk i bas takalna seh kel mbentarna bali bagi salju, janah matana bali bagi api si gara.
15 Nahena erkilat bali bagi tembaga si ilebur i bas api, janah sorana bali bagi sora air terjun si mbelin.
16 I bas tan kananna lit pitu bintang, i bas babahna nari ndarat sada pedang si ntelap, dua matana.* Ayona ersinar bagi matawari si terang.
17 Sanga kuidah ia, ndabuh aku i nahena bali bagi kalak mate.
Jenari jemakna aku alu tan kananna, janah nina, “Ula kam mbiar. Aku kap Si Pertama ras Si Terakhir.
18 Aku kap si nggeluh. Mbarenda pernah aku mate, tapi nenlah, gundari aku nggeluh rasa lalap seh rasa lalap. Lit bas aku kunci kematen ras kunci Kuburen.*
19 Emaka tuliskenlah kai si nggo idahndu, kai si sangana terjadi, janah kai si nandangi terjadi pagi.
20 Enda me rahasia si badia e: Pitu bintang si nggo idahndu i bas tan kananku bage pe pitu nahe lampu si iban i bas emas nari. Pitu bintang ertina malekat-malekat i bas pitu runggun, janah pitu nahe lampu ertina pitu runggun.
Cataten i teruh
^ Ntah “budak Jesus.”
^ Ntah “A ras Z.” Alpa ras Omega eme hurup pertama ras terakhir i bas hurup Junani.
^ Ntah “dua babahna.”
^ Nen Kamus.
