Ketangkasen 13:1-18
13 Naga e tetap tedis i pantai.
Kenca si e, kuidah sada binatang si seh kel rawana ndarat i bas lawit nari. Lit sepuluh tandukna janah pitu takalna. Tiap tanduk lit sada mahkotana, janah i bas tiap takal lit tertulis gelar-gelar si nghina Dibata.
2 Binatang si seh kel rawana e kuidah tempa-tempa bali bagi arimo tultul, tapi nahena bali bagi nahe beruang, janah babahna bali bagi babah singa. Ibereken naga e man ia gegehna, tahtana, ras kuasana si mbelin.
3 Kuidah lit sada takalna tempa-tempa nggo luka mekelek, tapi luka si maba kematen e nggo malem. Kerina kalak i doni jadi jengang janah ngikutken ia.
4 Isembah kalak e naga ndai sebap nggo iberekenna kuasa man binatang si seh kel rawana e. Isembah kalak e ka binatang si seh kel rawana e, janah nina, “Ise kin si seri ras binatang si seh kel rawana e? Ise kin si ngasup erperang ngelawan ia?”
5 Binatang si seh rawana e ndatken kuasa gelah banci tual ngerana, nghina Dibata, janah ngelakoken kai pe alu rate-ate sedekah 42 bulan.
6 Mulai me ibukana babahna janah ihinana Dibata, gelarNa, inganNa tading, bage pe kerina si tading i surga.
7 Ipediat ia erperang guna ngelawan janah naluken kalak si badia. Man bana ibereken kuasa nandangi tiap suku, umat, bahasa, ras bangsa.
8 Kerina manusia si tading i doni, isembahna me binatang si seh kel rawana e. Mulai kin doni enda ijadiken,* la sada pe i bas gelar kalak e nari si itulisken i bas buku kegeluhen si lit i bas Anak Biri-Biri si nggo igeleh e.
9 Ise pe si ercuping, begikenlah.
10 Adi lit kalak si arus itaban, itaban me ia. Adi lit kalak si munuh alu pedang,* pasti ibunuh ia alu pedang. Eme sebapna kalak si badia arus setia janah erkiniteken.
11 Jenari kuidah sada binatang si deban si seh kel rawana ndarat i bas doni nari. Lit dua tandukna bali bagi tanduk anak biri-biri, janah pengeranana bali bagi naga.
12 Ipakena kuasa arah binatang pertama si seh kel rawana ndai i lebe-lebe binatang pertama e. Ibanna kerina kalak i doni nembah man binatang si pertama si nggo malem arah lukana si mekelek.
13 Ibanna mukjizat-mukjizat si luar biasa janah ipenusurna ka api i langit nari ku doni i lebe-lebe kerina manusia.
14 Ipediat ia erban mukjizat-mukjizat i lebe-lebe binatang si seh kel rawana e, guna nipu kerina kalak i doni. Isuruhna ka iban kalak e patung binatang si seh kel rawana si ilukai alu pedang janah gundari nggo malem.
15 Ipediat ia mereken kesah man patung binatang si merawa e, gelah patung e banci ngerana ras mereken perentah guna munuh kerina kalak si la nggit nembah man bana.
16 Ipaksana kerina jelma ngaloken tanda i bas tan kananna ntah pe i bas perdempakenna, eme kalak si biasa-biasa saja, kalak si penting, kalak bayak, kalak mesera, kalak si bebas, ntah pe budak.
17 Ise pe la banci nukur ntah pe ndayaken, selain kalak si lit tandana e, eme gelar binatang si seh kel rawana ntah pe nomor si ngertiken gelarna.
18 Ise pe si beluh, hitungna min nomor binatang si seh kel rawana e. E me nomor manusia, janah nomorna e 666. Kalak si beluh ngenca si banci ngangkaisa.
Cataten i teruh
^ Maksudna, kenca anak-anak Adam ras Hawa lahir.
^ Ntah banci saja “Ise pe si ibunuh alu pedang.”
