Ketangkasen 14:1-20
14 Kenca si e, kuidah tedis Anak Biri-Biri e i Deleng Sion. Radu ras ia lit 144.000 kalak janah i bas perdempaken kalak e lit tertulis gelarna ras gelar Bapakna.
2 Jenari kubegi lit sora i langit nari. Sora e bali bagi sora air terjun si mbelin ras bali bagi sora lenggur si megang. Sora si kubegi e pe bali bagi sora kalak si rende janah erkulcapi.
3 I lebe-lebe tahta e, i lebe-lebe empat mahluk si nggeluh, bage pe i lebe-lebe pertua-pertua, iendeken kalak e lagu si tempa bagi lagu mbaru. Si banci ngendeken lagu e, eme 144.000 kalak si nggo itukur i bas doni nari.
4 Kalak enda kerina bersih, sebap la inajiskenna dirina ras diberu. Tetap kalak e suci bagi singuda-nguda. Iikutken kalak e Anak Biri-Biri e ku ja pe ia lawes. Kalak e nggo itukur i bas manusia nari, janah kalak e me buah rani si pertama si ipersembahken man Dibata ras man Anak Biri-Biri e.
5 La pernah kalak e erbual janah la lit si man pandangen i bas dirina.
6 Jenari kuidah malekat si deban kabang meganjang i langit. I bas ia lit berita si meriah si la ermasap-masap guna iberitaken man kerina si tading i doni enda, man tiap bangsa, suku, bahasa, ras umat.
7 Alu sora megang nina malekat e, “Mbiarlah man Dibata janah muliakenlah Ia. Sebap nggo seh waktuna man Dibata guna nghakimi manusia. Sembahlah Ia Si njadiken langit, doni, lawit, ras sumber-sumber lau.”
8 Kenca si e, reh malekat si peduaken ngikutken malekat si pertama, alu sora megang nina, “Ia nggo ndabuh! Enggo ndabuh Babilon si Mbelin e! Ibanna kerina bangsa minem lau anggurna, eme napsuna guna ngelakoken perbahanen seks si salah!”*
9 Kenca si e, reh malekat si peteluken ngikutken malekat ndai, janah alu sora megang, nina, “Ise pe si nembah binatang si seh kel rawana, bage pe si nembah patungna, ras si ngaloken tanda i bas perdempakenna ntah i bas tanna,
10 inem kalak e ka me anggur rawa Dibata, eme anggur si la lit campurna, si iamburken ku bas calung* rawa Dibata. Isiksa me kalak e i bas api ras i bas kertah, i lebe-lebe malekat-malekat si badia ras i lebe-lebe Anak Biri-Biri e.
11 Asap api si niksa kalak e nangkih rasa lalap seh rasa lalap. Ise pe si nembah binatang si seh kel rawana, bage pe si nembah patungna, ras si ngaloken tanda gelarna, iukum me ia la erngadi-ngadi suari ras berngi.
12 Erkiteken si e me maka kalak si badia arus tetap setia. Kalak enda me si tetap matuhi perentah Dibata, janah terus erkiniteken man Jesus.”
13 Jenari kubegi sada sora i langit nari, nina, “Tuliskenlah enda: Ermeriah ukurlah kalak si gundari mate i bas persadan ras Tuan. Payo, alu kesah si badia ikataken maka pediatlah kalak e istirahat i bas kerja kerasna nari, erkiteken kai si nggo ilakoken kalak e labo ilupaken Dibata.”*
14 Jenari kuidah embun mbentar, janah lit sekalak si kundul i datas embun e si tempa-tempa bagi anak manusia. I bas takalna lit mahkota emas janah i bas tanna lit sada sabi-sabi si ntelap.
15 Kenca si e, ndarat malekat si deban arah ingan si badia si lit i rumah pertoton. Alu sora si megang, ngerana ia man si kundul i datas embun e, “Ayunkenlah sabi-sabindu janah ranilah, perban nggo seh waktuna guna rani. Payo, peranin i bas doni nggo seh waktuna.”
16 Ia si kundul i datas embun e ngayunken sabi-sabina janah iperanina me doni enda.
17 Kenca si e, ndarat ka malekat si deban arah ingan si badia si lit i rumah pertoton, i surga. Ia pe njemak sabi-sabi si ntelap.
18 Kenca si e, ndarat ka malekat si deban arah batar-batar persembahen, janah erkuasa ia nandangi api. Alu sora si megang, ngerana ia man malekat si njemak sabi-sabi si ntelap ndai, “Ayunkenlah sabi-sabindu si ntelap ena janah pepulung sinuan-sinuan anggur i doni, sebap nggo tasak buahna.”
19 Emaka iayunken malekat ndai sabi-sabina janah ipepulungna sinuan-sinuan anggur i doni. Jenari iambekkenna ku bas ingan meras anggur si mbelin, si ngertiken rawa Dibata.
20 Buah anggur e iperjaki i darat kota, janah arah ingan meras anggur e nari maler me dareh seh asa kira-kira 296 kilometer* dauhna, janah ganjangna seh asa babah* kuda.
Cataten i teruh
^ Bahasa Junani, porneia. Nen Kamus.
^ Ntah “cangkir.”
^ As. “erkiteken perbahanen kalak e ngarak-ngarak kalak e.”
^ Ntah “1.600 setadi.” 1 setadi = 185 meter.
^ Ntah “sangam.”
