Ketangkasen 15:1-8
15 Kenca si e, kuidah ka tanda si mbelin janah si luar biasa i langit. Lit pitu malekat si maba pitu bencana. Enda me bencana si terakhir, sebap paksa nggo dung bencana e, rawa Dibata pe nggo dung.
2 Jenari kuidah lit tempa-tempa bagi lawit kaca si icampur ras api. Kuidah ka kalak si menang ngelawan binatang si seh kel rawana, bage pe patungna, ras menang ngelawan kalak si gelarna itandai alu nomor. Kalak e tedis i tepi lawit kaca janah njemak kulcapi Dibata.
3 Iendeken kalak e lagu Musa, budak Dibata, bage pe lagu Anak Biri-Biri, nina:
“O Dibata Jahwe, Si Madakuasa. Seh kel belinna janah luar biasa kel perbahanenNdu. O Raja si rasa lalap, payo ras benar kap dalan-dalanNdu.
4 O Jahwe, Kam saja ngenca si setia. Ise kin si la mbiar man baNdu janah si la mereken kemulian man baNdu? Reh me kerina bangsa-bangsa nembah i lebe-lebeNdu, sebap kerina nggo ngidah maka adil kap penghakimenNdu.”
5 Kenca si e, kuidah terbuka ingan si badia si lit i kemah kesaksin Dibata i surga.
6 Arah ingan si badia e ndarat me pitu malekat si maba pitu bencana. Ipakena linen si bersih ras ersinar, janah i bas tentenna iiketken kain emas.
7 Sada i bas empat mahluk si nggeluh e mereken pitu mangkok emas man pitu malekat e. Mangkok emas e dem alu rawa Dibata, si nggeluh rasa lalap seh rasa lalap.
8 Jenari, ingan si badia e dem alu asap erkiteken kemulian Dibata ras kuasaNa. Ise pe la banci masuk ku bas ingan si badia e seh asa dung pitu bencana si ibaba pitu malekat e.
