Ketangkasen 18:1-24
18 Kenca si e, kuidah sada malekat nusur i surga nari. I bas ia lit kuasa si mbelin janah iterangina doni alu kemulianna.
2 Alu sora si megang ngerana ia, nina, “Enggo ndabuh ia! Babilon si Mbelin nggo ndabuh! Ia jadi ingan tading malekat-malekat jahat, ingan roh* si najis, ingan kerina si najis, janah ingan perik si najis si erban segat ate!
3 Si e terjadi erkiteken anggurna eme napsuna ngelakoken perbahanen seks si salah.* Janah kerina raja-raja i doni ngelakoken perbahanen seks si salah* ras ia, janah kalak si erbinaga* i doni jadi bayak erkiteken barang-barang mewah si ipepulungna alu la meteh mela.”
4 Kenca si e, kubegi sora si deban i langit nari, nina, “Ndaratlah, o umatKu! Ndaratlah i je nari, adi la ate kena ikut i bas dosa-dosana ras adi la ate kena ngaloken bencana-bencanana.
5 Sebap dosa-dosana nggo ergungun seh ku langit, janah inget Dibata kap kerina perbahanenna si jahat.
6 Banlah man bana bagi si ilakokenna man kalak si deban, balaslah dua kali lipat. Berekenlah man bana inemen dua kali lipat lebih keras, tama ku bas cangkir si nggo isikapkenna guna ncampur inemen.
7 Erkiteken imuliakenna dirina sendiri janah nggeluh mewah ia alu la meteh mela, emaka arus iban ia ngenanami kiniseran ras ceda ate. Sebap katawari pe nina i bas pusuhna, ‘Aku enda ratu, janah labo aku mbalu, ndigan pe labo kuidah kiniseran.’
8 Eme sebapna i bas sada wari reh me man bana bencana-bencana eme kematen, ate ceda, ras kelihen. Ia pe itutung me alu api seh asa keri, erkiteken Dibata Jahwe si nghakimi ia e megegeh kap.
9 “Sanga idah raja-raja i doni asap api si nutung ia, tangis raja-raja e janah ipekpekina bana erkiteken erceda ate. Kalak e pernah radu ras ngelakoken perbahanen seks si salah* janah nggeluh mewah.
10 Tedis raja-raja e ndauh-ndauh nari erkiteken mbiar kalak e iukum bali bagi ia. Janah nina, ‘Andiko! Mekuah naring kel ate, seh kel ate mekuahna, oh Babilon kota si mbelin ras megegeh. I bas sada jam, nggo seh ukumenndu!’
11 “Kalak si erbinaga* i doni pe erceda ate janah itangisina ia, erkiteken lanai lit si mborong binaganna:
12 eme kerina emas, pirak, batu permata, mutiara, kain linen, kain si warnana terong, kain sutra, bage pe kain si warnana megara bagi api. Janah kai pe si iban arah kayu si merim nari, arah gading, arah kayu si merga, arah tembaga, arah besi, bage pe arah marmar nari.
13 Bage ka pe, kulit manis, rempah ratus India, kemenyan, minak wangi, kemenyan mbentar, anggur, minak saitun, tepung halus, gandum, lembu, biri-biri, kuda, gereta, budak, ras manusia.
14 Lanai pagi lit buah-buahen si mengga atendu. Kerina pangan si ntabeh ras barang-barang si mejile pe nggo lanai lit, janah ndigan pe lanai idatndu mulihi.
15 “Perbinaga si ndayaken barang-barang e nggo bayak erkiteken diberu e. Tedis kalak e ndauh-ndauh nari erkiteken mbiar kalak e iukum bagi diberu e. Tangis janah erceda ate kalak e,
16 nina, ‘Andiko! Mekuah naring kel ate, seh kel ate mekuahna, oh kota si mbelin! Mbarenda ipakendu linen si halus, kain si warnana terong, kain si warnana megara bagi api, janah melala ipakendu perhiasen mewah si iban arah emas nari, batu permata, bage pe mutiara.
17 Tapi i bas sada jam, kerina kebayakenndu si seh kel buena nggo ikernepken!’
“Kerina kapten kapal, penumpang-penumpang ras pegawai-pegawai kapal, bage pe kerina si pencarinna arah lawit nari, tedis i dauh-dauh nari,
18 janah sanga idah kalak e asap api si nutung diberu e, nina alu sora megang, ‘Kota si apai si bali bagi kota si mbelin e?’
19 Iamburken kalak e abu ku datas takalna, janah tangis ras erceda ate, nina, ‘Andiko! Mekuah naring kel ate, seh kel ate mekuahna, oh kota si mbelin! Kota si erbanca bayak kerina kalak si lit kapalna erlayar ku lawit erkiteken kebayaken kota e. Tapi i bas sada jam, kam nggo ikernepken!’
20 “O surga, bage pe kena kalak si badia, rasul-rasul, ras nabi-nabi, ermeriah ukurlah erkiteken nggo iukum Dibata diberu e guna kena!”
21 Kenca si e, lit sada malekat si megegeh ngangkat sada batu si bali bagi batu penggilingen si galang, jenari ibenterkenna ku lawit, janah nina, “Bagenda me pagi terna kota Babilon si Mbelin e ibenterken ku teruh, janah asa ndigan pe lanai lit.
22 O kam Babilon, asa ndigan pe lanai terbegi arah kam nari sora kalak si rende alu kulcapi, kalak si main musik, kalak si ngembus suling ntah pe trompet. Lanai pagi lit sekalak pe si erdahin, janah sora batu penggilingen si galang pe lanai pagi ibegi.
23 Lanai pagi lit lampu si nerangi kam, janah lanai pagi terbegi sora penganten dilaki ras penganten diberu arah kam nari. Perbinagandu* eme kalak si meganjangna pangkatna i bas doni enda, janah kerina bangsa-bangsa itipundu alu perbahanen ilmu sihirndu.
24 Payo, i bas diberu e me idapeti dareh nabi-nabi, kalak si badia, bage pe kerina kalak si nggo ibunuh i doni enda.
Cataten i teruh
^ Ntah banci saja “kesah; udara; kata-kata si tempa-tempa rehna i bas Dibata nari.”
^ Bahasa Junani, porneia. Nen Kamus.
^ Bahasa Junani, porneia. Nen Kamus.
^ Ntah “janah saudagar-saudagar.”
^ Bahasa Junani, porneia. Nen Kamus.
^ Ntah “Saudagar-saudagar.”
^ Ntah “Saudagar-saudagarndu.”
