Ketangkasen 19:1-21
19 Kenca si e, kubegi sora si megang tempa-tempa sora mahluk si nterem i bas surga nari. Nina, “Haleluyah!* Dibatata kap keselamaten, kemulian, ras gegeh.
2 PenghakimenNa benar ras adil kap. Enggo iukumNa pelacur si mbelin e. Pelacur e me si ncedai doni alu perbahanen seksna si salah,* janah nggo ibalasNa kematen budak-budakNa si ibunuh pelacur e.
3 Nina sora e pedua kaliken, “Haleluyah!* Asap arah api si nutung pelacur e terus nangkih rasa lalap seh rasa lalap.”
4 Pertua-pertua si 24 e ras empat mahluk si nggeluh erjimpuh nembah Dibata si kundul i tahta, janah nina, “Amin! Haleluyah!”*
5 Terbegi ka sada sora i bas tahta e nari janah nina, “Pujilah Dibatata, o kena kerina budak-budak si mbiar man baNa, kalak si biasa-biasa saja bage pe kalak si penting.”
6 Jenari kubegi bagi sora si nterem, bagi sora air terjun, janah bagi sora lenggur si megang. Nina sora-sora e, “Haleluyah,* sebap Dibatata Jahwe, Si Madakuasa, nggo mulai merentah jadi raja!
7 Ersuraklah, emeriah ukurlah, janah simuliakenlah Ia, erkiteken nggo seh waktuna perjabun Anak Biri-Biri, janah pengantenna si diberu nggo dung ersikap.
8 Enggo ibereken man penganten si diberu e baju linen si halus, ersinar, ras bersih gelah ipakena. Linen si halus e ngertiken perbahanen si benar si ilakoken kalak si badia.”
9 Nina malekat e man bangku, “Tuliskenlah: Ermeriah ukurlah kalak si iundang ku acara man berngi i bas kerja perjabun Anak Biri-Biri e.” Nina ka, “Kata-kata enda tuhu-tuhu i bas Dibata nari.”
10 Erjimpuh aku nembah man bana i lebe-lebe nahena. Tapi nina, “Ula! Ula bage! Sembahlah Dibata! Aku pe budak nge bali bagi kam, ras bali bagi turang seninandu si erdahin guna mereken kesaksin kerna Jesus. Sebap tujun nubuat-nubuat eme ersaksi kerna Jesus.”
11 Jenari kuidah langit terbuka. Nenlah! Lit sada kuda mbentar. Si nangkih kuda e igelari Setia ras Benar. Ia nghakimi janah erperang guna keadilen.
12 Matana bali bagi gara api, janah i bas takalna melala mahkota. I bas ia lit tertulis sada gelar janah ise pe la metehsa selain ia.
13 Ipakena baju si arah darat si lit noda* dareh, janah ia igelari Kata Dibata.
14 Pasuken tentera i surga pe ngikutken ia alu nangkih kuda mbentar. Ipake kalak e kain linen si halus, mbentar, janah bersih.
15 I bas babahna nari, ndarat pedang gedang si ntelap si ipakena guna ngkernepken bangsa-bangsa. Ipermakanina kalak e alu tongkat besi. Iperjakina ka ingan meras anggur si ngertiken rawa si mbelin arah Dibata Si Madakuasa.
16 I bas bajuna si arah darat, i bas bagin pahana lit tertulis sada gelar: Raja nandangi kerina raja ras Tuan nandangi kerina tuan.
17 Jenari kuidah ka sada malekat tedis i lebe-lebe matawari. Alu sora megang idilona kerina perik si kabang i langit, nina, “Mari, pulunglah ku jenda ku acara man berngi si mbelin si iban Dibata.
18 Alu bage banci ipan kena daging raja-raja, daging komandan-komandan tentera, daging kalak si megegeh, daging kuda-kuda ras kalak si nangkihisa, bage pe daging kerina kalak, eme daging kalak si bebas ntah pe budak, kalak si biasa-biasa saja ntah pe kalak si penting.”
19 Kenca si e, kuidah pulung binatang si seh kel rawana ras raja-raja i doni bage pe pasukenna. Pulung kalak e guna erperang ngelawan si nangkih kuda e ras pasukenna.
20 Itangkap me binatang si seh kel rawana e radu ras nabi-nabi palsu si erban mukjizat-mukjizat i lebe-lebe binatang e. Itipu nabi-nabi e kalak si ngaloken tanda binatang si seh kel rawana e bage pe si nembah patungna. Jenari ibenterken me kalak e nggeluh-nggeluh ku danau api si gurlah si lit kertahna.
21 Si debanna ibunuh alu pedang si gedang si ndarat arah babah si nangkih kuda e, janah kerina perik mangani daging kalak e seh asa besur.
Cataten i teruh
^ I bas bahasa Heber ertina, “Pujilah Jahwe.”
^ Bahasa Junani, porneia. Nen Kamus.
^ I bas bahasa Heber ertina, “Pujilah Jahwe.”
^ I bas bahasa Heber ertina, “Pujilah Jahwe.”
^ I bas bahasa Heber ertina, “Pujilah Jahwe.”
^ Ntah banci saja “si ikupirken alu.”
