Ketangkasen 21:1-27
21 Kenca si e, kuidah langit si mbaru ras doni si mbaru. Langit si ndekah ras doni si ndekah nggo lanai lit, janah lawit pe lanai lit.
2 Kuidah ka kota si badia, Jerusalem si Mbaru, nusur i surga nari, i bas Dibata nari. Kota enda bali bagi sekalak penganten diberu si nggo mejile guna njumpai penganten si dilaki.
3 Kubegi sora si megang i bas tahta e nari, nina, “Nenlah! Kemah Dibata lit i tengah-tengah manusia. Ras manusia me Ia tading, janah jadi umatNa me manusia. Ras kalak e me Dibata.
4 Iapusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit. Sebap kai si terjadi mbarenda nggo lanai lit.”
5 Ngerana me Ia si kundul i bas tahta e, nina, “Nenlah! Kuban kerina jadi mbaru.” Nina ka, “Tuliskenlah enda, sebap kata-kata enda tuhu janah terteki* kap.”
6 Jenari nina ka man bangku, “Kerina nggo terjadi! Aku kap Alpa ras Omega,* si pertama ras si terakhir. Man ise pe si muas, Kubereken man bana lau inemen i bas sumber lau kegeluhen nari alu gratis.
7 Ise pe si menang, ialokenna* me kerina enda. Aku me jadi Dibatana, janah ia me jadi anakKu.
8 Tapi kalak si percikcik, si la erkiniteken, si najis ras si erban ciga ate, si munuh, si ngelakoken perbahanen seks si salah,* si ngelakoken perbahanen kai pe si lit hubungenna ras malekat jahat,* si nembah berhala, bage pe kerina si perbual, ibenterken me kerina ku danau api si gurlah si lit kertahna. Enda ngertiken kematen si peduaken.”
9 Sekalak i bas malekat si pitu si lit i bas ia pitu mangkok dem pitu bencana si terakhir, reh ndahi aku, jenari nina, “Mari, gelah kucidahken man bandu penganten si diberu, si jadi ndehara Anak Biri-Biri e.”
10 Emaka alu kesah si badia, ibabana aku ku deleng si galang si seh kel ganjangna. Icidahkenna man bangku kota si badia, Jerusalem, si nusur i surga nari, i bas Dibata nari.
11 Kemulian kota e bali bagi kemulian Dibata. Kota e ersinar bali bagi batu si seh kel ergana, eme batu jaspis si meciho bagi kaca kristal.
12 Tembok kota e seh kel galangna janah meganjang. Lit 12 gerbang i bas kota e, janah tiap gerbang ijagai sada malekat. Tiap gerbang lit tertulis gelar salah sada arah 12 suku Israel.
13 I sebelah timur lit telu gerbang, i sebelah utara lit telu gerbang, i sebelah selatan lit telu gerbang, janah i sebelah barat lit telu gerbang.
14 Tembok kota e lit 12 batu pondasina, janah i bas tiap batu e tertulis gelar salah sada arah 12 rasul Anak Biri-Biri e.
15 Malekat si ngerana man bangku e njemak tongkat emas si jadi alat pengukur, guna ngukur kota e, gerbang-gerbangna, ras tembokna.
16 Kota e segi empat, gedangna ras belangna* seri. Jenari iukurna kota e alu tongkat ndai. Gedangna, belangna,* ras ganjangna seri, eme kira-kira 2.220 kilometer.*
17 Ukurna ka tembok kota e, lit kira-kira 64 meter. Alat ukur si ipake malekat e seri ras alat ukur si ipake manusia.
18 Tembok kota e iban arah batu jaspis nari janah kota e iban arah emas tulen nari, si meciho bagi kaca.
19 Pondasi tembok kota e iban arah erbage-bage batu si merga. Pondasi si pertama eme jaspis, si peduaken eme nilam, si peteluken eme kasidon, janah si peempatken zamrud,
20 si pelimaken sardonik, si peenemken sardion, si pepituken kerusolit, si pewaluhken beril, si pesiwahken topas, si pesepuluhken kerosoperas, si pesepuluh sadaken huakin, si pesepuluh duaken ametis.
21 Gerbangna si 12 e, eme 12 mutiara. Tiap gerbang e iban arah sada mutiara. Janah pasar si galang si lit i bas kota e iban arah emas tulen nari si meciho bagi kaca.
22 La lit kuidah rumah pertoton i bas kota e sebap Jahwe Dibata Si Madakuasa ras Anak Biri-Biri e me rumah pertoton i bas kota e.
23 La perlu matawari ras bulan guna nerangi kota e, sebap kemulian Dibata ersinar ku kota e, janah Anak Biri-Biri jadi lampuna.
24 Terang kota e nerangi dalan si ibentasi bangsa-bangsa janah raja-raja i doni pe maba kemulianna ku bas kota e.
25 Gerbang-gerbang kota e la itutup sanga ciger wari, sebap berngi lanai bo lit i je.
26 Ibaba bangsa-bangsa me kemulian ras kehamatenna ku bas kota e.
27 Tapi ise pe si najis ras si ngelakoken kai pe si erban ciga ate, bage pe penipu, la banci masuk ku bas kota e. Si banci masuk eme si gelarna tertulis i bas buku kegeluhen ngenca, si lit i bas Anak Biri-Biri e.
Cataten i teruh
^ Ntah “setia.”
^ Ntah “A ras Z.” Alpa ras Omega eme hurup pertama ras terakhir i bas hurup Junani.
^ As. “iwarisina.”
^ Bahasa Junani, porneia. Nen Kamus.
^ Nen Kamus.
^ Ntah “lebarna.”
^ Ntah “lebarna.”
^ As. “12.000 setadi.” 1 setadi = 185 meter.
