Ketangkasen 22:1-21
22 Jenari icidahken malekat e man bangku lau si mbelin* eme lau kegeluhen, si meciho bagi kristal. Lau si mbelin* e maler arah tahta Dibata bage pe arah tahta Anak Biri-Biri e
2 ku tengah-tengah pasar si galang si lit i bas kota e. I bas dua tepi lau e lit batang-batang kayu kegeluhen si erbuah 12 kali setahun, eme sebulan sekali. Janah bulungna ipake guna mpepalem bangsa-bangsa.
3 Kota e labo pagi isumpahi Dibata. Tapi tahta Dibata ras tahta Anak Biri-Biri e lit i bas kota e, janah budak-budak Dibata mereken pelayanen si badia man baNa.
4 Idah kalak e me ayoNa, janah gelarNa tertulis i bas perdempaken kalak e.
5 Lanai lit berngi. Lanai kalak e perlu lampu bage pe matawari, sebap Dibata Jahwe me si nerangi kalak e, janah kalak e jadi raja rasa lalap seh rasa lalap.
6 Nina malekat e man bangku, “Kata-kata enda tuhu janah terteki kap. Payo, Jahwe Dibata si ngerana erkelangken nabi-nabi nggo nuruh malekatNa guna ncidahken man budak-budakNa kerna kai si kentisik nari pasti terjadi.
7 ‘Nenlah! Minter me aku reh. Ermeriah ukur me kalak si patuh man kata-kata si lit i bas gulungen enda.’”
8 Aku, Johanes, si megi janah si ngidah si enda kerina. Kenca kubegi ras kuidah, erjimpuh aku nembah malekat si nggo ncidahken kerina si e.
9 Tapi nina man bangku, “Ula! Ula bage! Sembahlah Dibata. Aku pe budak nge bali bagi kam ras turang seninandu si jadi nabi-nabi, bage pe kalak si patuh man kata-kata si lit i bas gulungen enda.”
10 Nina ka man bangku, “Ula rahasiaken* nubuat si lit i bas gulungen enda, erkiteken waktu si itetapken nggo ndeher.
11 Pediatlah kalak si jahat terus ngelakoken kai si jahat, janah kalak si najis terus ngelakoken kai si najis. Tapi pediatlah kalak si benar terus ngelakoken kai si benar, janah kalak si badia terus ngelakoken kai si badia.
12 “‘Nenlah! Minter me Aku reh, janah Kubaba me upah man tiap jelma menurut kai si nggo ilakokenna.
13 Aku kap Alpa ras Omega,* si pertama ras si terakhir, si pemena ras si pendungi.
14 Ermeriah ukur me kalak si icucina jubahna, alu bage lit hakna man buah batang-batang kayu kegeluhen janah banci masuk ku kota e arah gerbang-gerbangna.
15 I darat kota e lit biang* bage pe kalak si ngelakoken perbahanen kai pe si lit hubungenna ras malekat jahat,* si ngelakoken perbahanen seks si salah,* pemunuh, kalak si nembah berhala, ras kerina si nggit ras biasa erbual.’
16 “‘Aku, Jesus, kusuruh malekatku mpebetehken man kena kerna si enda guna kepentingen runggun-runggun. Aku kap keluarga* ras kesusuren Daud. Aku kap bintang erpagi-pagi si ersinar.’”
17 Nina kesah si badia ras penganten si diberu e, “Marilah!” Ise pe si megisa, ikatakenna ka min, “Marilah!” Ise pe si muas, rehlah ia! Janah ise pe si merhat, banci ibuatna lau kegeluhen, la padah nggalar.
18 “Kupebetehken man ise pe si megiken nubuat i bas gulungen enda: Adi lit si nambahi isina, itambahken Dibata me man bana bencana-bencana si tertulis i bas gulungen enda.
19 Janah adi lit si ngkurangi isi nubuat si itulisken i bas gulungen enda, labo ipediat Dibata ia ndatken kai si mehuli si nggo itulisken i bas gulungen enda. Labo banci ipanna buah arah batang-batang kayu kegeluhen janah labo ia banci masuk ku bas kota si badia e.
20 “Ia si mpebetehken kerna si enda kerina ngataken, ‘Payo, minter me aku reh.’”
“Amin! Rehlah Tuan Jesus.”
21 Mbera lias ate si mbelin arah Tuan Jesus lit i bas kalak si badia.
Cataten i teruh
^ Ntah “sungai.”
^ Ntah “Sungai.”
^ As. “Ula meteraiken.”
^ Ntah “A ras Z.” Alpa ras Omega eme hurup pertama ras terakhir i bas hurup Junani.
^ Maksudna, kalak si terus ngelakoken kai si erban ciga ate Dibata.
^ Nen Kamus.
^ Bahasa Junani, porneia. Nen Kamus.
^ As. “urat.”
