Ketangkasen 3:1-22
3 “Man malekat runggun i Sardis, tuliskenlah bagenda: Enda me kata i bas ia nari, si lit i bas ia pitu kesah si badia ras pitu bintang: ‘Kuteh kai si ilakokenndu, gelarna ngenca kam nggeluh tapi situhuna kam mate.
2 Erjaga-jagalah janah pegegehi kai si lit denga bas kam, si menam mate, perban kuidah maka lenga idungindu pendahin si ilakokenndu i lebe-lebe Dibataku.
3 Emaka ingetlah kai si nggo ialokenndu ras si ibegindu. Teruslah patuhi e janah ertobatlah.* Adi la kam medak, reh me aku bali bagi pinangko janah la itehndu ndigan aku reh.
4 “‘Tapi lit denga piga-piga kalak i Sardis si la erban pakenna jadi najis. Erdalan me kalak e ras aku alu make paken si mbentar, sebap cocok* kalak e ngelakoken si e.
5 Kalak si menang me si make paken si mbentar, janah asa ndigan pe labo pernah kusasapken gelarna i bas buku kegeluhen nari. Kuakui gelarna i lebe-lebe Bapakku, bage pe i lebe-lebe malekat-malekatNa.
6 Ise pe si ercuping, begikenlah kai si ikataken kesah si badia man runggun-runggun.’
7 “Man malekat runggun i Piladelpia, tuliskenlah bagenda: Enda me kata i bas ia nari si badia, si benar, si njemak kunci Daud. Adi ibukana, ise pe la banci nutupsa, janah adi itutupna, ise pe la banci mbukasa:
8 ‘Kuteh kai si ilakokenndu. Kuteh maka labo asa kai gegehndu, tapi ipatuhindu kata-kataku janah tetap setia man gelarku. Enggo kubukaken pintu man bandu, janah ise pe la banci nutupsa.
9 Enda me si nandangi kulakoken man kalak arah anggota kelompok* Setan nari, si erbual janah ngakuken dirina kalak Jahudi padahal situhuna labo kalak Jahudi. Kuban kalak e reh janah erjimpuh i lebe-lebe nahendu, janah kuban kalak e meteh maka keleng ateku kam.
10 Erkiteken ipatuhindu kai si ibegindu kerna kesetianku,* kujaga me kam i bas masa pengujin si nandangi terjadi pagi i belang-belang doni. Si enda terjadi guna nguji kerina kalak si tading i doni.
11 Minter me aku reh! Teruslah jaga kai si lit i bas kam, gelah ula lit kalak si muat mahkotandu.
12 “‘Kalak si menang me si kujadiken tiang i bas rumah pertoton Dibataku, janah asa ndigan pe lanai itadingkenna ingan e. Kutulisken i bas ia gelar Dibataku bage pe gelar kota Dibataku, eme Jerusalem si Mbaru si nusur i surga nari, i bas Dibataku nari. Kutulisken ka i bas ia gelarku si mbaru.
13 Ise pe si ercuping, begikenlah kai si ikataken kesah si badia man runggun-runggun.’
14 “Man malekat runggun i Laodikea, tuliskenlah bagenda: Enda me kata i bas Amin nari, eme saksi si setia ras benar, ciptan Dibata si pertama:
15 ‘Kuteh kai si ilakokenndu. Kam la mbergeh, la ka melas. Ateku min, kam mbergeh ntah pe melas.
16 Tapi perban kam setengah-setengah, melas pe lang, mbergeh pe lang, kuutahken me kam i bas babahku nari.
17 Nindu, “Bayak aku, melala ertaku, janah labo aku kurang kai pe.” Tapi la kam sadar maka situhuna kam mesera, la ermeriah ukur, pentang, janah tilanjang.
18 Emaka kusuruh kam gelah tukurndu barang-barang enda i bas aku nari: Emas tulen si ilebur alu api gelah kam jadi kalak bayak, paken si mbentar guna nutupi dagingndu si tilanjang si man kemelanken e, bage pe salep mata guna tambar matandu gelah banci kam erpengidah.
19 “‘Kerina kalak si kukelengi, kupersingeti ras kudisiplin. Emaka, semangatlah janah ertobatlah.*
20 Nenlah! Aku tedis i lebe-lebe pintu janah kutuktuk. Adi lit kalak megi soraku jenari ibukana pintu, masuk me aku ku bas rumahna, jenari man berngi aku ras ia janah ia man berngi ras aku.
21 Kalak si menang me si kupediat kundul i bas tahtaku, bali bagi aku pe nggo menang janah kundul ras Bapakku i tahtaNa.
22 Ise pe si ercuping, begikenlah kai si ikataken kesah si badia man runggun-runggun.’”
Cataten i teruh
^ Ntah “jera dingen robahlah.”
^ Ntah “metunggung.”
^ As. “sinagoga.”
^ Ntah banci saja “Erkiteken ikutkenndu usihen kesetianku.”
^ Ntah “jera dingen robahlah.”
