Ketangkasen 4:1-11
4 Kenca bage, kuidah lit terbuka sada pintu i surga. Janah kubegi sora bagi sora trompet, eme sora pertama si kubegi ngerana man bangku, nina, “Mari nangkih kam ku jenda, kucidahken me bandu kai si pasti terjadi.”
2 Jenari, minter aku ikuasai kesah si badia. Kuidah sada tahta i surga, janah lit sekalak si kundul i tahta e.
3 Ia si kundul i tahta e ersinar bagi batu jaspis ras batu sardis. I sekeliling tahta e lit pelangi si teridah bagi zamrud.*
4 Tahta e ikelilingi 24 tahta, janah kuidah lit 24 pertua si kundul i tahta-tahta e. Ipake kalak e paken si mbentar ras mahkota emas.
5 Kuidah arah tahta e nari kilat, janah kubegi sora ras lenggur. I lebe-lebe tahta e, lit pitu lampu bagi api si gara, janah si e ertina pitu kesah si badia.
6 I lebe-lebe tahta e lit bagi lawit si teridah bagi kaca si meciho* kel janah ersinar bagi kristal.
Tahta e lit i tengah, janah i sekelilingna lit empat mahluk si nggeluh. Empat mahluk si nggeluh e dem alu mata arah lebe ras arah pudina.
7 Mahluk si nggeluh si pertama teridah bagi singa. Mahluk si nggeluh si peduaken teridah bagi lembu jantan si nguda denga. Mahluk nggeluh si peteluken ayona bagi manusia. Mahluk nggeluh si peempatken teridah bagi kuliki si sangana kabang.
8 Tiap mahluk nggeluh e lit enem kabengna, janah kerina kabengna e dem alu mata. Suari ras berngi, la erngadi-ngadi mahluk nggeluh e ngataken, “Badia, badia, badia me Dibata Jahwe, Si Madakuasa, si mbarenda nari nggo lit, gundari, bage pe i bas waktu si nandangi reh.”
9 Ibereken mahluk si nggeluh e kemulian, kehamaten, ras pengatan bujur man Ia si kundul i tahta e, eme Dibata si nggeluh rasa lalap seh rasa lalap. Tiap kali ilakoken mahluk si nggeluh e bage,
10 erjimpuh pertua-pertua si 24 e i lebe-lebe si kundul i tahta e janah isembahna Ia, si nggeluh rasa lalap seh rasa lalap. Ibenterken kalak e mahkotana ku lebe-lebe tahta e, jenari nina,
11 “O Jahwe Dibata kami, Kam me si metunggung* ngaloken kemulian, kehamaten, ras kuasa. Sebap Kam si njadikenca kerina si lit, janah erkiteken peratenNdu nge maka kerina e iciptaken janah lit.”
