Ketangkasen 5:1-14
5 Kuidah sada gulungen i bas tan kanan si kundul i tahta e. Lit tulisen arah lebe ras arah pudi i bas gulungen e, janah gulungen e itutup rapat alu pitu meterai.
2 Jenari kuidah sada malekat si megegeh, ermomo ia alu sora megang, nina, “Ise kin si metunggung* mbuka gulungen e janah ngagui meterai-meteraina?”
3 Tapi i surga, ntah i doni, ntah i teruh doni, sekalak pe la lit si banci mbuka gulungen e ras ngenenca ku bas.
4 Tangis aku janah ceda kel ateku sebap la lit sekalak pe si metunggung* mbuka gulungen e ntah pe ngenenca ku bas.
5 Jenari ngerana sekalak i bas pertua e nari man bangku nina, “Ula nai kam tangis. Nenlah! Singa i bas suku Juda nari, i bas keluarga* Daud nari, nggo menang. Ia metunggung* mbuka gulungen e, bage pe pitu meteraina.”
6 Jenari kuidah lit sada anak biri-biri si tempa nggo pernah igeleh. Anak biri-biri e tedis i lebe-lebe empat mahluk si nggeluh si tedis i deher tahta e, janah kalak e kerina ikelilingi pertua-pertua e. Lit pitu tanduk anak biri-biri e ras pitu matana. Pitu matana e ngertiken pitu kesah si badia si nggo isuruh ku belang-belang doni.
7 Minter ku lebe Anak Biri-Biri e, jenari ibuatna gulungen e arah tan kanan Si kundul i tahta e.
8 Paksa ibuatna gulungen e, empat mahluk si nggeluh e ras pertua-pertua si 24 erjimpuh i lebe-lebe Anak Biri-Biri e. Sekalak-sekalak pertua e njemak sada kulcapi ras mangkok emas si isina dem alu kemenyan. (Kemenyan e ngertiken toto kalak si badia.)
9 Jenari, kerina kalak e ngendeken lagu si mbaru, “Kam me si metunggung* muat gulungen e janah mbuka meterai-meteraina. Sebap kam nggo igeleh, janah alu darehndu nggo itukurndu manusia i bas tiap suku, bahasa, umat, ras bangsa nari guna Dibata.
10 Ijadikenndu kalak e raja* ras imam guna ngelayani Dibatata. Merentah me kalak enda jadi raja i bas doni enda.”
11 Jenari, kunen ka janah kubegi sora malekat si buena puluhen ribu kali puluhen ribu ras ribun kali ribun. Tedis ia kerina, ikelilingina tahta e, empat mahluk si nggeluh, ras pertua-pertua e,
12 janah ikataken kalak e alu sora si megang, “Anak Biri-Biri si nggo igeleh e metunggung* ngaloken kuasa, kebayaken, kepentaren, gegeh, kehamaten, kemulian, ras puji-pujin.”
13 Jenari, kubegi kerina mahluk si lit i langit, i doni, i teruh doni, ras si i bas lawit, payo, kerina si nggeluh ngataken, “Man Ia si kundul i tahta e ras Anak Biri-Biri e me puji-pujin, kehamaten, kemulian, ras kuasa, rasa lalap seh rasa lalap.”
14 Jenari, ikataken empat mahluk si nggeluh e, “Amin!” Janah pertua-pertua e erjimpuh nembah Dibata.
Cataten i teruh
^ Ntah “cocok.”
^ Ntah “cocok.”
^ As. “urat.”
^ Ntah “cocok.”
^ Ntah “cocok.”
^ As. “kerajan.”
^ Ntah “cocok.”
