Ketangkasen 8:1-13
8 Sanga ibuka Anak Biri-Biri e meterai si pepituken, setengah jam dekahna la lit sora kai pe i surga.
2 Jenari, kuidah pitu malekat tedis i lebe-lebe Dibata janah ibereken man kalak e pitu trompet.
3 Kenca si e, reh sada malekat si deban janah ibabana ingan nutung kemenyan, ingan e iban arah emas nari, jenari tedis ia i deher batar-batar persembahen. Ibereken man bana melala kemenyan, gelah banci itutungna i batar-batar persembahen emas si lit i lebe-lebe tahta Dibata paksa terbegi kerina toto kalak si badia.
4 Toto kalak si badia bage pe asap arah kemenyan si lit i bas tan malekat e radu ras nangkih ku lebe-lebe Dibata.
5 Jenari ibuat malekat e ingan kemenyan ndai, itamana sitik api ku bas si ibuat arah batar-batar persembahen nari, jenari iambekkenna ku doni. Kenca si e, terbegi me sora lenggur, terbegi ka sora-sora si deban, lit kilap ras terjadi gempa.
6 Jenari ersikap malekat si pitu e guna ngembus trompet si lit i bas ia.
7 Iembus malekat si pertama trompetna. Jenari reh udan baho, bage pe udan api si icampur ras dareh nusur ku doni. Emaka meseng sepertelu doni enda, sepertelu batang kayu, ras kerina peren-peren si meratah.
8 Iembus malekat si peduaken trompetna. Jenari lit teridah bagi deleng si galang, si tertutung, ibenterken ku lawit. Emaka sepertelu lawit berubah jadi dareh,
9 sepertelu mahluk si nggeluh i lawit pe mate, janah sepertelu kapal pe hancur.
10 Iembus malekat si peteluken trompetna. Jenari ndabuh i langit nari sada bintang galang si ersinar bali bagi lampu. Idabuhina sepertelu lau mbelin* ras sumber-sumber lau.
11 Gelar bintang e Sinuan-Sinuan Pagit. Emaka sepertelu lau e berubah jadi pagit, janah nterem kalak mate perban lau e, erkiteken lau e nggo berubah jadi pagit.
12 Iembus malekat si peempatken trompetna. Jenari sepertelu matawari, sepertelu bulan, ras sepertelu bintang, jadi gelap. Bage pe sepertelu suari ras sepertelu berngi, la lit terang.
13 Kenca si e, kunen lit perik kuliki kabang meganjang i langit, janah kubegi sorana si megang, nina, “Cilaka! Cilaka! Cilaka kel kerina kalak si tading i doni, erkiteken sora trompet telu malekat si debanna! Lanai ndekah minter me iembus kalak e trompetna e!”
Cataten i teruh
^ Ntah “sungai-sungai.”
