Kolose 2:1-23
2 Ateku min gelah iteh kena uga beratna perjuangenku guna kena, guna kalak si lit i Laodikea, bage pe guna kerina kalak si lenga pernah jumpa ras aku.
2 Ateku min gelah kalak e iapuli janah ipersada alu mehuli i bas kekelengen. Alu bage banci ialoken kalak e kerina kebayaken si rehna arah pengangkan si jelas ras pasti, janah ialokenna pemeteh si tepat kerna rahasia si badia Dibata eme Kristus.
3 Kerina kepentaren ras pemeteh terbuni i bas dirina, si e bali bagi erta.
4 Enda kukataken gelah ula kena tertipu alu kata-kata si licik.
5 Aminna pe aku la ras kena, tapi ukurku ras kena kap. Meriah ukurku ngidah uga raturna kena bage pe ngidah kiniteken kena si nteguh man Kristus.
6 Emaka, erkiteken nggo ialoken kena Tuan Jesus Kristus, teruslah erdalan ras Kristus.
7 Bali bagi si nggo ipelajari kena, kiniteken kena arus mbages uratna, nteguh, janah ibangun i datas pondasi, pondasi e eme Kristus. Teruslah ngata bujur man Dibata.
8 Hati-hatilah gelah kena la iperbudak kalak alu ajaren manusia ras tipun si kosong si rehna arah adat manusia, bage pe arah pendapat doni enda si rehna labo arah Kristus nari,
9 erkiteken Kristus dem alu sipat-sipat Dibata.
10 Emaka, kena la kurang kai pe erkiteken ia me kepala kerina kerajan ras penguasa.
11 Selaku pengikutna, kena pe nggo isunat, labo alu tan tapi alu ngambekken sura-sura daging si erdosa, erkiteken bage me sunat man pelayan Kristus.
12 Kena nggo ikubur radu ras ia i bas peridinna, janah selaku pengikut Kristus, kena pe ipekeke radu ras ia perban kena erkiniteken nandangi perbahanen Dibata si luar biasa, si mpekeke Kristus i bas si mate nari.
13 Selain si e, aminna pe kena nggo mate erkiteken dosa kena janah erkiteken la isunat, iban Dibata kena nggeluh ras ia. Alu lias ate, iampuni Dibata kerina dosata
14 janah imasapkenNa undang-undang si tertulis si ncidahken kesalahenta. IsasapkenNa e alu kematen Kristus i bas tiang siksan.*
15 Erkiteken tiang siksan* e, italukenNa pemerentah ras penguasa-penguasa janah icidahkenNa man jelma si nterem i bas pawai kemenangenNa maka kalak e nggo talu.
16 Emaka, ula pediat ise pe nghakimi kena kerna pangan, kerna inemen, perayan, ntah pe perayan bulan baru, ntah pe sabat.
17 Kerina e bayangen kerna kai si nandangi reh, tapi daging si tuhu-tuhu e eme Kristus.
18 Hati-hatilah nandangi kalak si banci ngambati kena ngaloken hadiah, eme kalak si tempa-tempa meteruk ukur, si meriah akapna nembah malekat, janah “nteguh ijemakna” kai si idahna. Erkiteken carana rukur bagi manusia si erdosa, megah akapna nandangi kai si la lit ertina.
19 Kalak si bage la ngikutken takal e, eme si mere kerina keperlun daging, si erban kerina anggota daging jadi ersada, janah arah ia me maka iban Dibata daging e jadi reh belinna.
20 Adi kena nggo mate ras Kristus janah nggo itulak kena pendapat doni enda, ngkai maka perbahanen kena tempa-tempa bagin i bas doni enda denga? Engkai maka terus ipatuhi kena peraturen enda:
21 “Ula jemak, ula nanami, ula dadap”?
22 Kerina enda peraturen kerna kai si banci keri adi ipan ras iinem, janah si e perentah ras ajaren manusia saja ngenca.
23 Aminna pe peraturen e tempa-tempa dem kepentaren, tapi si e kerina la lit gunana i bas naluken sura-sura daging si erdosa, sebap kalak e sendiri si nentuken carana ersembah, kalak e tempa-tempa meteruk ukur, janah la iberekenna keperlun dagingna.
