Kolose 3:1-25
3 Adi kena nggo ipekeke radu ras Kristus, teruslah usahaken gelah idat kena kai si lit i datas, i bas ingan Kristus kundul i sebelah kanan Dibata.
2 Tetapkenlah ukur kena nandangi kai si lit i datas, labo nandangi kai si lit i doni.
3 Sebap kena nggo mate, janah kegeluhen kena lit i bas tan Kristus, sue ras peraten Dibata.
4 Kristus kap kegeluhenta, janah sanga icidahkenna kemulianna,* kena pe ncidahken kemulian radu ras ia.
5 Emaka, matekenlah kerina sura-sura daging* kena si ngikutken doni, eme perbahanen seks si salah,* perbahanen si najis, napsu seks si la terkuasai, sura-sura si jahat, bage pe rangap si seri ras nembah berhala.
6 Si e kerina erban Dibata merawa.
7 Mbarenda pe bage ka nge perbahanen kena.
8 Tapi gundari, arus iambekken kena si e i bas diri kena nari, eme merawa, ngamuk, perbahanen si jahat, ngisak-ngisakken, janah ula belasken cakap kotor.*
9 Ula erbual sada ras si debanna. Tangtangilah sipat-sipat si ndekah ras kerina perbahanenna,
10 janah pakelah sipat-sipat si mbaru si nggo ibereken Dibata. Alu pemeteh si benar, banlah sipat-sipat kena jadi mbaru sue ras sipat-sipat Dibata.
11 Emaka lanai bo lit kalak Junani ntah kalak Jahudi, kalak si isunat ntah la isunat, kalak asing ntah kalak Sekyt,* budak ntah pe kalak si bebas. Tapi, Kristus jadi kai pe guna kita, janah kita kerina ersada ras ia.
12 Emaka selaku kalak si ipilih Dibata, si badia ras si ikelengi, pakekenlah kekelengen, perkuah ate, lias ate, meteruk ukur, lemah lembut, bage pe sabar.
13 Bicara lit pe alasen kena megelut, kena arus tetap sabar janah alu bulat ukur ampunilah sada ras si debanna. Bali bagi Jahwe alu bulat ukur ngampuni kena, lakoken ka lah bage.
14 Tapi selain si e kerina, pakekenlah kekelengen, sebap kekelengen kap si mpersadaken kerina alu sempurna.
15 Mbera kedamen Kristus erkuasa i bas pusuh kena erkiteken kena nggo ipilih guna jadi sada daging. Janah teruslah kataken bujur.
16 Mbera pengajaren Kristus dem i bas pusuh kena, alu bage kena jadi pentar. Teruslah ngajar janah pegegehi sada ras si debanna alu masmur, puji-pujin man Dibata, ngendeken lagu-lagu rohani alu pengataken bujur, janah rendelah man Jahwe i bas pusuh nari.
17 Kai pe si ikataken kena ras si ilakoken kena, lakokenlah kerina e i bas gelar Tuan Jesus. Erkelangken ia, katakenlah bujur man Dibata, Bapakta.
18 O kena ndehara, patuhilah perbulangen kena, sebap bage me arusna ilakoken pengikut Tuan.
19 O kena perbulangen, teruslah kelengi ndehara kena, janah ula kena kasar man bana.
20 O anak-anak, patuhilah orang tua kena i bas kerinana, sebap bage me si ngena ate Tuan.
21 O perbapan, ula ban merawa anak kena gelah ula bene semangatna.
22 O budak-budak, patuhilah tuan kena si lit i doni i bas kai pe, labo saja sanga idahna gelah erban manusia senang, tapi alu bulat ukur erkiteken mbiar man Jahwe.
23 Kai pe si ilakoken kena, lakokenlah alu bulat ukur bali bagi man Jahwe, labo man manusia,
24 erkiteken iteh kena maka i bas Jahwe nari nge ialoken kena upah eme warisen. Erdahinlah bagi budak man Kristus, Tuanta.
25 Kalak si erban salah pasti iukum sue ras kesalahenna, sebap Dibata la erpilihen.
Cataten i teruh
^ As. “sanga ia jadi nyata.”
^ As. “anggota-anggota badan.”
^ Bahasa Junani, porneia. Nen Kamus.
^ Ntah “ula ncakapken kai pe si lit hubungenna ras porno.”
^ Kalak Sekyt eme kalak si kolot.
