Kolose 4:1-18
4 O kena si jadi tuan, bujur janah adillah perbahanen kena man budak-budak kena, erkiteken kena pe lit nge Tuan kena i bas surga.
2 Teruslah ertoto, tetaplah erjaga-jaga, janah katakenlah bujur.
3 Paksa si e, totoken ka lah kami gelah ibere Dibata kesempaten man kami guna mberitaken kata e ras rahasia si badia kerna Kristus (erkiteken rahasia si badia e me aku ipenjaraken),
4 janah gelah banci kupeseh si e alu jelas bagi si arusna kulakoken.
5 Teruslah pentar perbahanen kena man kalak si labo jadi bagin runggun Kristen janah gunakenlah waktu kena alu mehuli.
6 Mehuli janah ngena min ate kalak ranan kena bali bagi itama sira, gelah iteh kena carana mere jawapen man tiap kalak.
7 Tikikus, senina si kukelengi, pelayan si setia janah ia pe budak Tuan bali bagi kita, ipebetehkenna kari man kena kerna aku.
8 Kusuruh ia ndahi kena gelah iteh kena uga keadan kami janah banci iapulina pusuh kena.
9 Reh kari ia ras Onesimus,* senina si setia si kukelengi si rehna i bas daerah kena nari. Iceritakenna kari kerina si terjadi i jenda man kena.
10 Aristarkus si ipenjaraken ras aku kirim salam man kena, bage ka pe Markus senina Barnabas, si arus ialo-alo kena sanga ia reh, sue ras petunjuk si aloken kena,
11 bage pe Jesus si igelari Justus. Kerina kalak enda kalak si isunat. Kalak e ngenca si erdahin ras aku guna Kerajan Dibata, janah kalak e me si mpegegehi aku.
12 Epapras, budak Kristus Jesus si reh i bas daerah kena nari pe kirim salam man kena. Itotokenna kena lalap alu tutus, gelah paguh kiniteken kena janah tuhu-tuhu tek nandangi kerina peraten Dibata.
13 Ersaksi aku kerna ia si kerja keras guna kena ras guna turang senina si lit i Laodikea ras Hierapolis.
14 Lukas, dokter si ikelengi kita ras Demas, kirim salam man kena.
15 Peseh salamku man turang senina i Laodikea, man Nimpa turangta, bage pe man runggun si pulung i rumahna.
16 Kenca surat enda ibacaken man kena, atur ka gelah surat enda pe ibacaken i runggun Laodikea. Surat si ikirim ku Laodikea pe arus ka ibaca kena.
17 Katakenlah man Arkipus, “Perdiatekenlah pelayanen si ialokenndu selaku pengikut Tuan, gelah banci idungindu.”
18 Alu tanku kutulisken surat enda. Enda me salam i bas aku nari, Paulus. Mbera lias ateNa si mbelin tetap ras kena.
Cataten i teruh
^ Ntah “si Erguna.”
