Lukas 1:1-80
1 Enterem kalak iusahakenna mpepulung ras nulisken keterangen kerna kai si nggo terjadi si banci tuhu-tuhu siteki.
2 Kai si itulisken kalak enda sue ras kai si nggo sibegi arah kalak si ngidah kejadin e bage pe arah si mpeseh berita e.
3 Emaka Teopilus, Si Ihamati, kuputusken ka nuliskenca man bandu alu teratur, erkiteken nggo kuselidiki enda kerina alu megermet tangtangna nari,
4 gelah banci itehndu maka kerina si nggo iajarken man bandu tuhu-tuhu benar.
5 I bas jaman Herodes,* raja Judea, lit sekalak imam si gelarna Sakaria arah kelompok Abia nari. Diberuna arah kesusuren Harun, gelarna Elisabet.
6 Duana ia benar i lebe-lebe Dibata janah tuhu-tuhu ipatuhina kerina perentah bage pe kerina si isuruh Jahwe si arus ilakoken.
7 Tapi la lit anakna, erkiteken Elisabet la banci melahirken, janah kalak e nggo metua kel.
8 Paksa Sakaria ngelayani selaku imam, sanga kelompokna ndalanken tugas i lebe-lebe Dibata,
9 menurut kebiasan imam-imam, terpilih me Sakaria guna mpersembahken kemenyan i bas ingan si badia Jahwe.
10 Enterem kel kalak ertoto i darat sanga kemenyan ipersembahken.
11 Ijumpai malekat Jahwe me Sakaria janah cinder arah kanan batar-batar persembahen kemenyan.
12 Mamang ate Sakaria ngidah si e janah mbiar kel ia.
13 Tapi nina malekat e, “Ula kam mbiar Sakaria, sebap pemindonndu nggo ibegiken. Lahir me pagi sekalak anak dilaki arah diberundu Elisabet, banlah gelarna Johanes.
14 Meriah janah malem kel pagi atendu, janah nterem kalak ermeriah ukur erkiteken kelahiren anak e,
15 sebap ia jadi kalak si penting pagi i lebe-lebe Jahwe. Tapi la banci inemna anggur ntah pe inemen si deban si lit alkoholna. Ope lenga lahir* pe ia nggo dem alu kesah si badia.
16 Janah ibanna pagi nterem kalak Israel mulihken ku Jahwe, Dibata kalak e.
17 Selain si e, alu semangat ras kuasa si bali bagi Elia, leben pagi ia lawes asangken Dibata. Ibanna pusuh perbapan mulihken bagi pusuh anak-anak janah ibanna kalak si la patuh ndatken kepentaren arah kalak si benar. Alu bage, nggo metunggung* kalak e ngelayani Jahwe.”
18 Nina Sakaria man malekat e, “Uga banci aku tek kerna si enda? Aku ras diberuku nggo metua.”
19 Ngaloi malekat e, “Aku Gabriel, si cinder i lebe-lebe Dibata. Aku isuruh guna ngerana ras kam janah mpebetehken berita si meriah enda man bandu.
20 Tapi nenlah! Erkiteken la kam tek man kata-kataku si terjadi pagi bas waktu si nggo itentuken, emaka bisu me kam janah lanai banci ngerana seh asa terjadi si enda kerina.”
21 Paksa si e, jelma si nterem terus nimai Sakaria, janah mamang ate kalak e perban ndekah kel ia i bas ingan si badia.
22 Sanga ia ndarat, lanai ia banci ngerana man kalak e, dungna iteh kalak e maka edenga idahna kai si luar biasa i bas ingan si badia. Perban ia bisu, terus ibanna tanda alu tanna man kalak e.
23 Kenca dung wari-wari pelayanenna si badia e, mulih ia ku rumahna.
24 Piga-piga wari kenca si e, hamil me diberuna Elisabet, janah la ia ndarat-ndarat i rumah nari lima bulan dekahna, nina,
25 “Enda me si ilakoken Jahwe man bangku gundari. Enggo iperdiatekenNa aku gelah ula nai ihina kalak aku.”
26 Kenca enem bulan Elisabet hamil, isuruh Dibata me malekat Gabriel ku kota Nasaret i Galilea,
27 ndahi sekalak singuda-nguda si nggo ertunangen ras sekalak dilaki si gelarna Jusup arah kesusuren Daud, janah gelar singuda-nguda e Maria.
28 Sanga jumpa, nina malekat e man bana, “Mejuah-juah, o kam si jadi kel ate Dibata, Jahwe kap ras kam.”
29 Tapi sengget kel ia megi kata-katana e janah iusahakenna ngangkai erti kata e.
30 Emaka nina malekat e bana, “Ula kam mbiar Maria, sebap jadi kel ate Dibata nandangi kam.
31 Nenlah! Hamil pagi kam janah ilahirkenndu sekalak anak dilaki, banlah gelarna Jesus.
32 Jadi kalak si penting pagi ia janah igelari Anak Dibata Si Meganjangna. Ibere Dibata Jahwe ka pagi man bana tahta Daud bapana,
33 jadi Raja pagi ia nandangi kesusuren Jakup seh rasa lalap, janah Kerajanna la erkeri-kerin.”
34 Tapi nina Maria man malekat e, “Uga enda banci terjadi? Aku me singuda-nguda denga.”
35 Ngaloi malekat e, “Nusur pagi kesah si badia ku datasndu, janah kuasa Dibata Si Meganjangna nutupi kam pagi. Erkiteken si e, anak si lahir e pagi igelari badia, Anak Dibata.
36 Janah nen! Kade-kadendu Elisabet pe si igelari kalak diberu si la banci melahirken janah nggo metua, gundari nggo enem bulan ia hamil, anak si i bas beltekna e dilaki.
37 Sebap kerina si ikataken Dibata pasti terjadi.”
38 Jenari nina Maria, “Nenlah! Aku budak Jahwe si diberu! Terjadilah man bangku bagi si nggo ikatakenndu e.” Kenca si e, lawes me malekat ndai nadingken ia.
39 Emaka la ndekah kenca si e, minter Maria berkat ku sada kota i Juda, daerah si erdeleng-deleng.
40 Masuk ia ku rumah Sakaria janah ikatakenna mejuah-juah man Elisabet.
41 Kenca ibegi Elisabet ikataken Maria mejuah-juah, minter kemuit anak si lit i bas beltekna e, janah Elisabet dem alu kesah si badia.
42 Alu sora si megang, nina, “Ipasu-pasu me kam i bas kerina diberu, janah ipasu-pasu me anak si lit i bas beltekndu!
43 Sada kinihamaten man bangku banci aku idahi nande Tuanku!
44 Sebap nen! Kenca kubegi sorandu, minter kemuit anak si lit i bas beltekku alu meriah ukur.
45 Ermeriah ukurlah kam si tek, sebap kerina si ikataken Jahwe man bandu pasti terjadi.”
46 Nina Maria, “Kumuliaken Jahwe,
47 janah seh kel riahna ukurku erkiteken Dibata Juru Selamatku,
48 sebap nggo iperdiatekenNa budakNa si diberu si meteruk enda. Nen! Mulai gundari nari kerina kalak ngataken aku ermeriah ukur,
49 erkiteken Dibata si erkuasa nggo ngelakoken melala perbahanen si mbelin man bangku. Badia me gelarNa,
50 janah seh rasa lalap icidahkenNa perkuah ateNa man kalak si mbiar* man baNa.
51 IcidahkenNa kuasaNa alu tanNa. ImerapkenNa kalak si meganjang ukurna.
52 IpesusurNa kalak si erkuasa i bas tahtana nari janah ipeganjangNa kalak si meteruk.
53 IbesuriNa kel kalak si melihe alu kai si mehuli janah ipelawesNa kalak si bayak alu la maba kai pe.
54 IsampatiNa suruh-suruhenNa eme Israel, erkiteken ingetNa janjiNa guna ncidahken perkuah ate,
55 bagi si nggo ikatakenNa man nini bulangta nai, man Abraham ras man kesusurenna, seh rasa lalap.”
56 Maria tading ras Elisabet kira-kira telu bulan dekahna, kenca si e mulih ia ku rumahna.
57 Seh me waktuna Elisabet melahirken janah ilahirkenna sekalak anak dilaki.
58 Tetangga-tetangga bage pe kade-kadena megi maka nggo ibuktiken Jahwe perkuah ateNa si mbelin man ia, emaka ermeriah ukur kalak e ras ia.
59 I bas wari si pewaluhken, reh kalak e paksa anak e nandangi isunat. Ibanna atena gelarna Sakaria, bagi gelar bapana.
60 Tapi ngaloi nandena, “Ula! Johanes ban gelarna.”
61 Nina kalak e man bana, “La kap lit sada pe gelar kade-kadendu bagena.”
62 Emaka iban kalak e tanda man bapana guna nungkun ise nge atena iban gelar anak e.
63 Emaka ipindona sada lambar papan jenari itulisna, “Johanes gelarna.” Mamang kel ate kalak e kerina.
64 Paksa si e minter terbuka babahna janah dilahna pe bebas, jenari mulai ia ngerana ras muji Dibata.
65 Mbiar me kerina kalak si tading i sekelilingna, janah kerina enda mulai icakapken i bas kerina daerah Judea si erdeleng-deleng.
66 Kerina si megisa tersungkun-sungkun i bas pusuhna, nina, “Jadi kai nge ndia pagi anak e?” Sebap tan Jahwe tuhu-tuhu ras ia.
67 Kenca si e, Sakaria eme bapak anak e dem alu kesah si badia janah ernubuat, nina,
68 “Terpujilah Jahwe, Dibata Israel, erkiteken nggo iperdiatekenNa umatNa janah ibebaskenNa kalak e.
69 Enggo ibereNa man banta juru selamat si mbisa arah kesusuren Daud pelayanNa,
70 bagi si nggo ikatakenNa arah nabi-nabiNa si badia si nai,
71 kerna keselamaten i bas musuh-musuhta nari ras i bas tan kerina kalak si rate segat banta,
72 guna mbuktiken perkuah ate si nggo ikatakenNa man nini bulangta janah nginget perjanjinNa si badia,
73 eme sumpahNa man Abraham bulangta.
74 Kenca Dibata nelamatken kita i bas tan musuh nari, iberekenNa man banta kinihamaten guna mereken pelayanen si badia man baNa alu la lit kebiaren,
75 alu kesetian ras perbahanen si benar i lebe-lebeNa segedang geluhta.
76 Tapi kam, o anakku, igelari me kam pagi nabi Dibata Si Meganjangna, sebap kam pagi ngelebei Jahwe guna nikapken dalan man baNa,
77 guna mere pemeteh kerna keselamaten man umatNa arah pengampunen dosa-dosa kalak e,
78 erkiteken perkuah ate si lembut i bas Dibatata nari. Alu perkuah ate enda me sinar matawari reh ndahi kita arah ingan si meganjang,
79 guna nerangi kalak si kundul bas kegelapen bage pe bas bayangen kematen janah mabai naheta i bas dalan kedamen.”
80 Reh belinna me anak e janah reh paguhna kinitekenna. Terus ia tading i taneh mesawang* seh asa icidahkenna dirina man kalak Israel.
Cataten i teruh
^ Nen Kamus.
^ Ntah “Mulai lit i bas bertin nandena.”
^ Ntah “cocok.”
^ Ntah “erkemalangen.”
^ Taneh si mbelang si jarang iingani.
