Lukas 10:1-42
10 Kenca si e kerina, ipilih Tuan me 70 kalak si deban janah isuruhna kalak e dua-dua ngelebei ia ku tiap kota ras ingan si atena idahina.
2 Jenari nina man kalak e, “Mbelang man peranin, tapi kurang si erdahin. Emaka pindolah man Si Mada peranin, gelah isuruhNa si erdahin guna peraninNa e.”
3 Berkatlah! Kusuruh kena lawes bagi anak biri-biri ku tengah-tengah srigala.
4 Ula baba ingan sen ntah pe ingan pangan ntah selop, janah ula perkuanken ise pe bas dalan.
5 Ku rumah ise pe kena masuk, kataken lebe, ‘Mbera lit kedamen bas rumah enda.’
6 Adi la lit si ngarapken dame i je, mulih me kedamen e man kena. Tapi, adi lit si ngarapken dame i je, tading me kedamen kena bas ia.
7 Emaka tadinglah i rumah e, pan ras inemlah si isikapkenna, sebap kalak si erdahin patut ndatken upahna. Ula rusur pindah-pindah ku rumah si deban.
8 “Bage ka pe, ku kota si apai pe kena lawes janah ialo-alona kena, panlah kai si isikapken man kena
9 janah pepalemlah kalak si sakit si lit i je, jenari kataken bana, ‘Kerajan Dibata nggo ndeher.’
10 Tapi ku kota si apai pe kena lawes janah la kena ialokenna, laweslah ku pasar-pasarna si galang janah kataken,
11 ‘Kisamken kami abu kota kena si leket i bas nahe kami. Aminna pe bage, gelah iteh kena, Kerajan Dibata nggo ndeher.’
12 Kukataken man kena maka beraten ukumen man kota e asangken man Sodom i bas Wari Penghakimen pagi.
13 “Cilaka me kam, o Korasin! Cilaka me kam, o Betsaida! Bicara i Tirus ras i Sidon min ndai iban perbahanen si dem kuasa si nggo iban i tengah-tengah kena, nggo min nai nari kalak e ertobat* janah kundul alu kain guni ras abu.
14 Erkiteken si e, beraten ukumen kena asangken ukumen man Tirus ras Sidon i bas Wari Penghakimen pagi.
15 Kam pe, o Kapernaum, ipeganjang kin kam pagi seh ku langit? Nusur nge kam pagi ku Kuburen!*
16 “Ise pe si megiken kena, megiken aku. Ise pe si nulak kena, nulak aku ka nge. Janah ise pe si nulak aku, itulakna ka Ia si nuruh aku.”
17 Kenca si e, mulih me si 70 kalak ndai alu ermeriah ukur, nina, “O Tuan, malekat-malekat jahat pe patuh man kami sanga igunaken kami gelarndu.”
18 Emaka nina Jesus, “Kuidah Setan nggo ndabuh bagi kilat i langit nari.
19 Enggo kubereken man kena kuasa guna merjaki nipe ras kacip gelang, bage pe kuasa guna naluken kerina kuasa musuh, janah la lit kai pe si banci ncilakai kena.
20 Aminna pe bage, ula ermeriah ukur perban malekat-malekat jahat e patuh man kena, tapi ermeriah ukurlah perban gelar kena nggo itulis i surga.”
21 Paksa si e pe, meriah kel akap Jesus iban kesah si badia janah nina, “O Bapak, Tuhan si erkuasa i langit ras doni, kupuji Kam i lebe-lebe jelma si nterem, sebap nggo ipebetehkenNdu man anak-anak kai si ibunikenNdu alu megermet man kalak pentar ras erpemeteh. O Bapak, enda kap si ngena ateNdu.”
22 Nina Jesus ka, “Enggo ibereken Bapakku kerinana man bangku. Ise pe labo nandai Anak selain Bapak, janah ise pe labo nandai Bapak selain Anak. Bapak e banci itandai kalak adi nggit Anak e mpebetehkenca kerna Bapak.”
23 Kenca si e itulihkenna ku murid-muridna saja, janah nina, “Ermeriah ukur me kalak si ngidah kai si idah kena.
24 Situhuna, nterem nabi bage pe raja, merincuh ngidah kai si idah kena gundari e, tapi la banci, janah merincuh kalak e megi kai si ibegi kena, tapi la banci.”
25 Sekalak ahli Undang-Undang Musa cinder guna nguji Jesus janah nina, “O Guru, kai si arus kulakoken gelah ndatken kegeluhen si rasa lalap?”
26 Ngaloi Jesus, “Kai kin si tertulis i bas Undang-Undang Musa? Kai si iangkaindu?”
27 Ijawapna, “‘Arus ikelengindu Jahwe Dibatandu alu kerina kegeluhenndu,* pusuhndu, gegehndu, ras perukurenndu,’ ras ‘kalak si deban bagi dirindu sendiri.’”
28 Nina Jesus man bana, “Tuhu jawapenndu ena. Teruslah lakoken e janah datndu kari kegeluhen.”
29 Tapi ibuktikenna atena dirina benar, emaka nina man Jesus, “Ise dage si arus kukelengi?”
30 Ngaloi Jesus, “Sekalak dilaki lawes arah Jerusalem nari ku Jeriho. I bas dalan, irampok kalak ia, ibuatna kerinana, ipekpekina ia, jenari lawes perampok e, itadingkenna ia menam mate.
31 Rembang lewat sekalak imam arah dalan e, tapi sanga idahna ia, isilahkenna, jenari iteruskenna perdalanenna.
32 Bage ka pe sekalak Lewi, sanga seh ia bas ingan e, idahna ia, isilahkenna ka, jenari iteruskenna perdalanenna.
33 Tapi sanga lewat kalak Samaria arah dalan e janah idahna ia, mekuah atena.
34 Emaka ideherina ia, itamana minak ras anggur ku luka-lukana, janah ibalutina. Kenca si e, iangkatna ia ku keledena jenari ibabana ku penginapen ras irawatna.
35 Pepagina, iberena dua dinar* man pengurus penginapen, janah nina, ‘Rawatlah ia, adi la kari bias enda, kugalari kari kenca aku reh.’
36 Adi menurutndu, ise i bas kalak si telu enda si ngkelengi kalak si irampok ndai?”
37 Nina, “Kalak si rate mekuah man bana.” Emaka nina Jesus, “Laweslah janah ban ka lah bage.”
38 Iterusken kalak e perdalanenna janah masuk ia ku bas sada kuta. I je, lit sekalak diberu si gelarna Marta. Ialo-alona Jesus jadi tamu i rumahna.
39 Lit ka sekalak seninana si gelarna Maria. Kundul ia i deher nahe Tuan janah terus ibegikenna kai si ikatakenna.
40 Tapi Marta la mperdiatekenca sebap sibuk ia ndahiken dahinna. Emaka idahina Jesus janah nina, “O Tuan, la nge iakapndu dalih adi ipediat seninaku aku sisada ndahiken kerina dahin e? Suruh min ia nampati aku.”
41 Nina Tuan bana, “Marta, Marta, mbuesa si iukurindu e.
42 Padahal, sitik ngenca si iperluken, sada ngenca. Maria nggo milih bagin si mehulina, janah e la banci ibuat i bas ia nari.”
Cataten i teruh
^ Ntah “jera dingen robah.”
^ Nen Kamus.
^ I bas bahasa Junani, psykhe. Nen Kamus.
^ Sen logam pirak kalak Roma.
