Lukas 12:1-59
-
Ragi kalak Parisi (1-3)
-
Mbiar man Dibata, labo man manusia (4-7)
-
Ngaku ersada ras Kristus (8-12)
-
Perumpaman kerna kalak bayak si motu (13-21)
-
Ula nari kena kuatir (22-34)
-
Rarasen si kitik (32)
-
-
Erjaga-jaga (35-40)
-
Pengurus si setia ras si la setia (41-48)
-
Labo perdamen, tapi perpecahen (49-53)
-
Perlu iangkai kai si sangana terjadi (54-56)
-
Ndungi perjengilen (57-59)
12 Paksa si e, sanga ribun jelma pulung, siperjak-perjaken nahe kalak perban seh teremna. Tangtangna ngerana me Jesus man murid-muridna, “Hati-hatilah nandangi ragi kalak Parisi, eme sipatna si munapik.
2 Kerina si tertutup alu rapat terbuka nge pagi, janah kerina rahasia tereteh nge pagi.
3 Emaka, kai pe si ikataken kena i bas kegelapen, terbegi nge pagi i bas terang. Janah kai pe si ikusikken kena i bas kamar, iberitaken nge pagi arah atap rumah nari.
4 Kukataken ka man kena temanku, ula kena mbiar man kalak si banci munuh daging tapi kenca si e kai pe la banci ilakokenna.
5 Tapi kukataken man ise arusna kena mbiar: Mbiarlah man Ia si kenca munuh, lit kuasaNa guna ngambekken ku Gehena.* Tuhu, mbiarlah man baNa.
6 La kin lima perik cipcip adi idayaken ergana dua sen logam si kitik ngenca? Tapi labo sada pe perik e ilupaken* Dibata.
7 Janah buk takal kena pe itehNa asa buena. Emaka ula kena mbiar, ergan nge kena asangken melala perik cipcip.
8 “Kukataken man kena, ise pe ngakui aku i lebe-lebe manusia, Anak manusia pe ngakui ia pagi i lebe-lebe malekat-malekat Dibata.
9 Tapi ise pe mersoken* aku i lebe-lebe manusia, ipersoken ka nge pagi i lebe-lebe malekat-malekat Dibata.
10 Ise pe ngerana ngelawan Anak manusia iampuni nge pagi, tapi ise pe nghina kesah si badia la banci iampuni.
11 Sanga kena ibaba ku perpulungen jelma si nterem,* ku lebe-lebe pegawai pemerentah, ras ku penguasa-penguasa, ula kena kuatir kerna uga kena mbela diri ntah kai si arus ikataken kena,
12 sebap paksa si e, iajari kesah si badia nge kari kena kerna kai si arus ikataken kena.”
13 Kenca si e, ngerana sekalak i bas jelma si nterem e nari, nina, “O Guru, suruhlah seninaku erbagi warisen ras aku.”
14 Ngaloi Jesus, “Ise si ngangkat aku jadi hakim ntah pe jadi kelang-kelang i bas kena duana?”
15 Jenari nina man kalak e, “Teruslah buka mata kena janah hati-hatilah nandangi erbage-bage kerangapen,* sebap aminna pe sekalak jelma melala ertana, kegeluhenna labo asil arah kai si lit i bas ia.”
16 Jenari, iceritakenna sada perumpaman,* nina, “Lit sekalak dilaki si bayak, melala kel asil jumana.
17 Emaka mulai ia rukur, ‘Lanai lit ingan mpepulung asil peraninku, jadi kai nge si arus kulakoken gundari?’
18 Nina ka, ‘Enda si kulakoken: Kusontarken saja lumbung-lumbungku, jenari kubangun tergalangen. I je kari kupepulung kerina gandumku ras barang-barangku,
19 janah ningku man bangku: “Enggo melala barang-barangndu si mehuli si banci kari ertahun-tahun inanamindu. Pesenanglah bandu, man, minem, janah ermeriah-meriahlah.”’
20 Tapi nina Dibata bana, ‘O kalak si la masuk akal! I bas berngi enda, bene me kesahndu.* Adi bage, man ise kari kerina si ipepulungndu e?’
21 Bage me jadina kalak si mpepulung erta man dirina, tapi la bayak i lebe-lebe Dibata.”
22 Jenari nina man murid-muridna, “Eme sebapna kukataken man kena: Ula nari kena kuatir kerna kegeluhen kena, kerna kai si ipan kena, kerna daging kena ntah kerna kai si ipake kena.
23 Sebap ergan nge kegeluhen asangken pangan, janah ergan nge daging asangken baju.
24 Perdiateken min perik kak: La ia nuan benih ntah pe rani, la lit lumbungna ntah pe gudangna, tapi ibere Dibata ia man. La kin kena ndauh ergan asangken perik-perik e?
25 Ise i bas kena nari si banci nambahi sitik* umurna alu perasan kuatir?*
26 Emaka, adi si kitik saja pe la banci ilakoken kena, ngkai maka kuatir kena kerna si debanna?
27 Perdiatekenlah perturah bunga-bunga:* La ia erdahin, la ia njait, Salomo si seh kel muliana pe, pakenna la bagi salah sada bunga e jilena.
28 Jadi, adi ibereken Dibata paken si bage man bunga-bunga si turah bage saja, si gundari lit janah pagi itutung, terlebih ka kena, o kalak si kitik kinitekenna!
29 Emaka ula nari kena kuatir kerna kai kari si ipan kena, ras kai kari si inem kena. Ula nari kena kuatirsa.
30 Sebap kerina e iayaki bangsa-bangsa i doni enda alu semangat, tapi iteh Bapak kena maka iperluken kena kerina e.
31 Sebalikna, teruslah darami KerajanNa, janah kerina enda ibereken kari man kena.
32 “Ula mbiar, o rarasen si kitik, sebap nggo meriah ukur Bapak kena mere Kerajan man kena.
33 Dayaken kerina erta kena janah berekenlah man kalak mesera. Banlah ingan sen si la banci ceda, erta si i surga si la banci keri, i je pinangko la banci reh ntah pe ipan serangga.*
34 Sebap i ja erta kena, i je ka me ukur kena.
35 “Erbajulah ras ersikaplah,* janah pastikenlah lampu kena tetap gara.
36 Kena arus bagi kalak si nimai tuanna mulih i bas pesta perjabun nari, alu bage sanga ia reh janah ituktukna pintu, banci mis italangi kalak e.
37 Ermeriah ukur me budak-budak si paksa tuanna reh, idapetina kalak e erjaga-jaga! Situhuna, ersikap me tuan e,* isuruhna kalak e kundul i lebe-lebe meja, kenca si e ideherina janah ilayanina kalak e.
38 Janah adi reh ia i bas giliren jaga si peduaken,* ntah pe si peteluken,* idapetina kalak e nggo ersikap, ermeriah ukur me kalak e!
39 Tapi ukuri enda, adi nggo iteh tuan rumah jam piga pinangko reh, pasti la ipediatna rumahna ibongkar.
40 Kena pe, tetaplah ersikap, sebap Anak manusia pe reh i bas jam si la isangka kena.”
41 Jenari nina Petrus, “O Tuan, man kami saja nge ikatakenndu perumpaman* enda ntah man kerina jelma ka nge?”
42 Ngaloi Tuan, “Ise situhuna pengurus* si setia, si pentar, si ipilih tuanna ngurus pelayan-pelayan rumahna guna terus mereken pangan man kalak e i bas waktu si tepat?
43 Ermeriah ukur me budak e adi sanga tuanna reh, idapeti tuanna ia ngelakoken pendahinna!
44 Situhuna, ipilih tuanna kari ia ngurus kerina erta-ertana.
45 Tapi bicara nina budak e i bas ukurna, ‘Tuanku ndekah denga reh,’ jenari mulai ipekpekina pelayan-pelayan si dilaki ras si diberu, kenca si e man ras minem ia ngayak mabuk,
46 reh me tuan budak ndai i bas wari si la isangkana ras i bas jam si la itehna, janah seh kel beratna kari ibanna ukumen kalak e janah ipersadana kari ia i bas ingan kalak si la setia.
47 Kenca si e, budak si ngangkai peraten tuanna tapi la ersikap-sikap ntah pe la ngelakoken kai si isuruhna,* ipekpekina kari ia.
48 Tapi budak si ngelakoken kesalahen erkiteken la iangkaina, ia patut ipekpeki, tapi piga-piga kali ngenca. Situhuna, man kalak si ibereken mbue, mbue ka si ituntut i bas ia nari, janah man kalak si ibereken melala tanggung jawap, ituntut ka terbuen asangken biasana.
49 “Reh aku guna mpegara api i bas doni. Apina nggo gara, kai nari kin si kuarapken?
50 Situhuna, arus kudalani sada peridin, janah ope lenga e dung, gulut kel ukurku!
51 Akap kena kin aku reh maba dame i doni? Lang, tapi maba perpecahen.
52 Mulai gundari nari, lit kari perpecahen i bas sada keluarga. Adi lit lima kalak, telu ngelawan dua janah dua ngelawan telu.
53 Pecah kari kalak e: bapak ngelawan anakna si dilaki janah anak si dilaki ngelawan bapakna, nande ngelawan anakna si diberu janah anak si diberu ngelawan nandena, bibi simetua ngelawan permenna janah permen ngelawan bibi simetuana.”
54 Jenari nina Jesus ka man jelma si nterem, “Sanga idah kena embun si mbiring arah barat, mis ikataken kena, ‘Nandangi reh udan si seh kel mederna,’ janah e me si terjadi.
55 Bage pe sanga idah kena angin selatan rembus, ikataken kena, ‘Melas kel kari wari,’ janah e me si terjadi.
56 O kalak munapik, iteh kena cara ngangkai tanda-tanda i doni ras i langit, tapi ngkai maka la iteh kena cara ngangkai kai si terjadi gundari?
57 Engkai maka la ihakimi kena ka diri kena kerna kai si benar?
58 Contohna, adi lawes kam ras kalak si ngaduken kam ndahi sekalak penguasa, usahakenlah ndungi perjengilenndu ras ia sanga i bas dalan denga, gelah la kam ibabana ku lebe-lebe hakim, janah hakim nerahken kam ku petugas pengadilen, janah petugas pengadilen namaken kam ku penjara.
59 Kukataken bandu, pasti la banci kam ndarat i je nari adi lenga igalarindu kerina utangndu seh ngasa iberekenndu kerina senndu.”
Cataten i teruh
^ Nen Kamus.
^ Ntah “la iperdiateken.”
^ Ntah “nulak.”
^ Ntah “ku ingan pulung kalak Jahudi.”
^ Ntah “janah ula ermengga ate nandangi jang kalak.”
^ Ntah “anding-andingen.”
^ Ntah “kegeluhenndu.”
^ Ntah “aru ate.”
^ As. “sada hasta,” kira-kira 44,5 cm.
^ Ntah “bunga lili.”
^ Ntah “nget-nget.”
^ As. “ras pakelah ikat pinggang.”
^ Ntah “ipake tuan e me ikat pinggang.”
^ Kira-kira jam 9 berngi seh tengah berngi.
^ Mulai tengah berngi seh kira-kira jam 3 erpagi-pagi.
^ Ntah “anding-andingen.”
^ Ntah “pengurus rumah tangga.”
^ Ntah “si sue ras peraten tuanna.”
