Lukas 22:1-71
-
Rencana imam-imam munuh Jesus (1-6)
-
Persikapen guna Paskah si terakhir (7-13)
-
Man Berngi ras Tuan si jadi ikuten (14-20)
-
“Si nghianati aku ras aku i meja enda” (21-23)
-
Perubaten kerna ise si mbelinna (24-27)
-
Perjanjin Jesus guna sada kerajan (28-30)
-
Inubuatken kerna Petrus mersoken Jesus (31-34)
-
Perlu erban persikapen; dua pedang (35-38)
-
Toto Jesus i Deleng Saitun (39-46)
-
Jesus itangkap (47-53)
-
Petrus mersoken Jesus (54-62)
-
Jesus ihina (63-65)
-
Persidangen i Pengadilen Agama Jahudi (66-71)
22 Enggo ndeher Perayan Roti si La Itama Ragi, si igelari Paskah.
2 Ibunuh imam-imam kepala ras ahli Undang-Undang Musa atena Jesus, tapi perban mbiar man jelma si nterem, idarami kalak e cara si cocok guna munuh Jesus.
3 Kenca si e ipengaruhi Setan me Judas, si igelari Iskariot, sekalak i bas 12 rasul nari,
4 jenari ijumpaina me imam-imam kepala ras kepala penjaga rumah pertoton guna ncakapken cara nerahken Jesus man kalak e.
5 Meriah ukur kalak e megisa janah ijanjikenna mere sen pirak bana.
6 Emaka setuju ia janah mulai idaramina kesempaten si cocok guna nerahken Jesus man kalak e alu la iteh jelma si nterem.
7 Seh me Perayan Roti si La Itama Ragi, eme waktuna korban Paskah arus ipersembahken.
8 Emaka isuruh Jesus me Petrus ras Johanes, nina, “To laweslah, sikapken pangan Paskahta.”
9 Ngaloi kalak e, “I ja atendu isikapken kami?”
10 Ijawap Jesus, “Sanga masuk kena ku bas kota, lit kari sekalak dilaki si maba kudin taneh ingan lau njumpai kena. Ikutken ia ku rumah si imasukina.
11 Kataken man tuan rumah e, ‘Bagenda nina Guru, “I ja ruang tamu si banci jadi inganku man pangan Paskah ras murid-muridku?”’
12 Icidahken dilaki e kari man kena sada ruangen si mbelang i das loteng, si nggo isikapken gelah sipake. Sikapkenlah pangan Paskahta i je.”
13 Emaka lawes me kalak e janah idapetina kerina bagi si nggo ikataken Jesus, jenari isikapkenna me perayan Paskah.
14 Emaka sanga nggo seh waktuna, kundul Jesus i lebe-lebe meja ras rasul-rasulna.
15 Kenca si e nina Jesus, “Merincuh kel aku man pangan Paskah enda ras kena ope lenga aku ngenanami kiniseran.
16 Sebap lanai pagi kupan e ngayak kerinana terjadi i bas Kerajan Dibata.”
17 Kenca ialokenna calung,* ertoto ia ngata bujur, jenari nina, “Buatlah enda, minemlah kena sekalak-sekalak je nari.
18 Sebap mulai gundari nari lanai kuinem anggur seh ngayak reh Kerajan Dibata.”
19 Ibuatna ka roti, ertoto ia ngata bujur, jenari icepik-cepikkenna. Kenca si e, iberekenna man kalak e, nina, “Enda ngertiken dagingku, si ibereken guna kepentingen kena. Teruslah lakoken enda jadi peringet-ingeten man bangku.”
20 Bage ka me ilakokenna nandangi calung* e kenca kalak e man berngi, nina, “Calung enda ngertiken perjanjin baru si isahken alu darehku, si iamburken pagi guna kepentingen kena.
21 “Tapi, si nghianati aku ras aku i meja enda.
22 Sebap, lawes me Anak manusia bagi si nggo itetapken. Tapi la banci lang, cilaka me kalak si nghianati ia!”
23 Emaka mulai sisungkun-sungkunen rasul-rasul kerna ise situhuna i bas kalak e si erban bage.
24 Turah ka me perubaten si mekelek kerna ise si mbelinna i bas kalak e.
25 Nina Jesus man kalak e, “Raja bangsa-bangsa ngkuasai rakyatna, janah kalak si erkuasa nandangi kalak e igelari Kalak Melumbar.*
26 Tapi kena la banci bage. Kalak si mbelinna i bas kena arus bagi kalak si ngudana, janah kalak si muat pinpinen bagi kalak si ngelayani.
27 Sebap si apai nge belinen, kalak si man ntah kalak si ngelai?* Tentu kalak si man. Tapi aku i tengah-tengah kena jadi kalak si ngelai.*
28 “Kena me si lalap ras aku paksa kuadapi percuban.
29 Janah kuban perjanjin ras kena bali bagi Bapakku nggo erban perjanjin ras aku guna sada kerajan,
30 gelah banci kena man ras minem bas mejaku i bas Kerajanku, janah kundul i datas tahta guna nghakimi 12 suku Israel.
31 “Simon, Simon, nenlah! Enggo ipindo Setan gelah ipiarina kena kerina bagi gandum.
32 Tapi nggo kutotoken kam gelah ula bene kinitekenndu, janah kenca kam jera dingen robah, pegegehilah senina-seninandu.”
33 Jenari nina man Jesus, “O Tuan, nggit nge aku masuk penjara bage pe mate ras kam.”
34 Tapi nina Jesus, “O Petrus, kukataken bandu, i bas wari enda, ope lenga tekuak manuk, nggo ipersokenndu kari aku telu kali.”
35 Nina ka, “Sanga kusuruh kena lawes alu la maba ingan sen, kantong pangan, ras selop, me labo kena kurang kai pe?” Ngaloi kalak e, “Lang!”
36 Jenari nina, “Tapi gundari, adi lit ingan sen kena ntah pe kantong pangan kena, babalah. Adi la lit pedang kena, dayakenlah uis kena si arah darat guna nukursa.
37 Sebap kai si tertulis arus terjadi bangku, eme, ‘Ipeseri kari ia ras kalak si ngelanggar undang-undang.’ Sebap kai si tertulis kerna aku paksana terjadi.”
38 Kenca si e nina kalak e, “O Tuan, nenlah! Lit dua pedang i jenda.” Ngaloi Jesus, “Enggo bias ena.”
39 Kenca si e, bagi biasa, lawes ia ku Deleng Saitun, murid-muridna ngikutken ia.
40 Seh kenca i je, nina man kalak e, “Teruslah ertoto, gelah ula kena nyerah ku bas percuban.”
41 Jenari lawes ia sitik terdauhen arah kalak e, dauhna kira-kira asa gegeh mbenterken batu. I je erjimpuh ia janah mulai ertoto.
42 Nina, “O Bapak, adi nggit Kam, agui min calung* enda i bas aku nari. Tapi labo peratenku, peratenNdulah si jadi.”
43 Kenca si e, reh me sada malekat surga nari mpegegehi ia.
44 Tapi getem kel pusuhna, emaka terus ia ertoto reh gegehna, janah naktaken panasna ku taneh bali bagi taktak dareh.
45 Kenca dung ia ertoto, idahina murid-muridna. Idapetina kalak e paksana medem, latih iakap kalak e perban ceda atena.
46 Nina man kalak e, “Engkai maka kena medem? Medakken janah teruslah ertoto, gelah ula kena nyerah ku bas percuban.”
47 Sanga ia ngerana denga, reh me sada rombongen si nterem. Si minpinsa eme si igelari Judas, sekalak i bas 12 rasul nari. Ideherina Jesus janah iemana.
48 Tapi nina Jesus bana, “O Judas, alu ema enda kin Anak manusia ihianatindu?”
49 Paksa murid-murid si lit i deherna ngidah kai si nandangi terjadi, nina, “O Tuan, arus kin iserang kami kalak e alu pedang?”
50 Sekalak i bas kalak e nari nerang budak imam si mbelin, retap ibanna cupingna si arah kanan.
51 Tapi nina Jesus, “Enggo me.” Jenari idadapna cuping kalak ndai janah ipepalemna.
52 Kenca si e ngerana Jesus man imam-imam kepala, kepala penjaga rumah pertoton, ras peminpin-peminpin si reh guna nangkap ia, “Akap kena kin aku enda perampok maka reh kena maba pedang ras perpalu?
53 Sanga tiap wari aku ras kena i rumah pertoton, labo itangkap kena aku. Tapi enda me waktuna man kena janah waktuna kegelapen erkuasa.”
54 Kenca si e, itangkap kalak e ia janah ibabana ku rumah imam si mbelin. Tapi Petrus ngikutisa dauh-dauh nari.
55 I tengah-tengah halamen rumah e, lit si mpegara api janah cudu kalak e i sekeliling api e. Petrus pe ikut kundul i je.
56 Sekalak pelayan si diberu ngidah ia kundul i deher api e, iperdiatekenna kel ia janah nina, “Dilaki enda pe ras ia kap.”
57 Tapi ipersokenna, nina, “La ia kutandai pe.”
58 La ndekah kenca si e, kalak si deban ngidah ia janah nina, “Kam pe pasti salah sada i bas kalak e nari.” Tapi ngaloi Petrus, “Labo!”
59 Kira-kira sada jam kenca si e, lit ka si ngerana alu tegas, nina, “Pasti dilaki enda pe ras ia, sebap ia kalak Galilea!”
60 Tapi ngaloi Petrus, “La kuteh kai si ikatakenndu e.” Sanga ia ngerana denga minter tekuak manuk.
61 Jenari, itulihken Tuan ku Petrus. Mis inget Petrus ranan Tuan man bana, “Ope lenga tekuak manuk i bas wari enda, nggo ipersokenndu aku telu kali.”
62 Jenari lawes ia ndarat janah nderkuh ia tangis.
63 Kenca si e, kalak si nagangi Jesus mulai nghina ras mekpeki ia.
64 Itutupi kalak e ayona, jenari terus ikatakenna, “Adi nabi kin kam, kataken dage man kami ise si nggudam kam!”
65 Melala denga penghinan si ikataken kalak e man bana.
66 Kenca terang wari, pulung me peminpin-peminpin bangsa e, eme imam-imam kepala ras ahli Undang-Undang Musa. Ibaba kalak e ia ku ruang Pengadilen Agama Jahudi* janah nina,
67 “Kam kin Kristus e? Kataken dage man kami.” Tapi ijawapna, “Aminna pe kukataken man kena, labo kari kena tek.
68 Janah adi kusungkun kena, labo kari jawap kena.
69 Tapi mulai gundari nari kundul me Anak manusia arah kanan Dibata si erkuasa.”
70 Jenari nungkun kalak e kerina, “Adi bage, Anak Dibata kin kam?” Ngaloi ia, “Kena sendiri si ngatakenca aku Anak Dibata.”
71 Jenari nina kalak e, “Kita lanai perlu saksi! Enggo sibegi arah babahna sendiri.”
Cataten i teruh
^ Ntah “cangkir.”
^ Ntah “cangkir.”
^ Enda penggelaren man kalak si nggit nampati.
^ Ntah “ngelayani.”
^ Ntah “ngelayani.”
^ Ntah “cangkir.” Enda ngertiken peraten Dibata guna mpediat Jesus mate alu tuduhen ihinana Dibata.
^ As. “Sanhedrin.”
