Lukas 23:1-56
23 Emaka lawes kalak e kerina maba Jesus ku Pilatus.
2 Kenca si e mulai ituduh kalak e ia, nina, “Enggo itipuna bangsa kami, ilarangna kami nggalar pajak man Kaisar, janah ikatakenna ka ia Kristus, sekalak raja.”
3 Emaka isungkun Pilatus ia, “Kam kin Raja Kalak Jahudi?” Ijawapna, “Kam sendiri si ngatakenca.”
4 Jenari nina Pilatus man imam-imam kepala ras jelma si nterem, “La lit kudat kesalahen kai pe bas dilaki enda.”
5 Tapi terus igegehi kalak e, “Iajuk-ajukna kalak si lit i belang-belang Judea alu pengajarenna. Tangtangna i Galilea, gundari nggo seh jenda.”
6 Megi si e nungkun Pilatus, “Kalak Galilea kin ia?”
7 Kenca itehna maka asalna i bas daerah kekuasan Herodes nari, ikirim Pilatus ia man Herodes, si paksana ka i Jerusalem.
8 Meriah kel ukur Herodes sanga idahna Jesus, sebap nggo ndekah kel ia merhat jumpa ras Jesus. Enggo melala si ibegina kerna ia janah iarapkenna ngidah mukjizat si ibanna.
9 Emaka melala penungkunenna man Jesus, tapi la ijawapna.
10 Mulih-ulih imam-imam kepala ras ahli Undang-Undang Musa cinder janah merawa-rawa nuduh Jesus.
11 Kenca si e, Herodes ras prajurit-prajuritna nghina Jesus. Nokoh Herodes man bana alu makeken baju si mehaga man bana, jenari ikirimna ia mulihken ku Pilatus.
12 Mulai i bas wari e, erteman me Herodes ras Pilatus. Sebap ope si e kalak e ermusuhen.
13 Kenca si e ipepulung Pilatus imam-imam kepala, penguasa-penguasa, ras jelma si nterem,
14 nina, “Ibaba kena dilaki enda bangku janah ituduh kena ia ngajuk-ngajuk kalak gelah mberontak. Enggo kuperiksa ia i lebe-lebe kena, tapi la lit kudat salahna bagi si ikataken kena ndai.
15 Herodes pe la idatna salahna, emaka ikirimna ia mulihken man kami. La lit kai pe si erbanca ia patut iukum mate.
16 Emaka, kuligasi sajalah ia jenari kubebasken.”
17 *——
18 Tapi serko jelma si nterem e, “Bunuh saja ia! Bebasken Barabas man kami!”
19 (Barabas ipenjaraken erkiteken munuh janah ikut i bas pemberontaken i kota.)
20 Mulihi Pilatus ngerana man kalak e, sebap ibebaskenna atena Jesus.
21 Tapi, sekali nari serko kalak e, “Bunuh ia i bas tiang!* Bunuh ia i bas tiang!”*
22 Ngerana Pilatus petelu kaliken, nina, “Engkai? Kejahaten kai kin si ilakokenna? Kai pe la lit kudat si erbanca ia patut iukum mate. Emaka, kuligasi sajalah ia jenari kubebasken.”
23 Tapi reh gangna iban kalak e sorana, ipaksana gelah ia iukum mate.* Dungna menang me kalak e.
24 Emaka iban Pilatus keputusen sue ras pemindon kalak e.
25 Ibebaskenna me dilaki si ipindo kalak e, si ipenjaraken erkiteken mberontak ras munuh. Tapi iserahkenna Jesus guna iukum mate, bagi si ipindoken kalak e.
26 Ibaba kalak e me Jesus lawes. Bas tengah dalan, itangkap kalak e Simon kalak Kireni si rehna arah kuta nari. Itama kalak e tiang siksan* Jesus i barana janah isuruhna erdalan arah pudi Jesus.
27 Enterem kel jelma ngikutken ia, termasuk piga-piga diberu si tangis, si mekpeki bana ban cedana atena.
28 Itulihken Jesus ku diberu-diberu e janah nina, “O diberu-diberu Jerusalem, ula nari tangisi kena aku. Tangisilah diri kena ras anak-anak kena.
29 Reh me warina paksa ikataken kalak, ‘Ermeriah ukur me diberu si la banci melahirken, si la pernah melahirken, ras si la pernah pepinemken!’
30 Jenari ikataken kalak e man deleng-deleng, ‘Dabuhi min kami!’ janah man uruk-uruk, ‘Tamburi min kami!’
31 Adi sanga meratah denga pe batang kayu e bage perbahanen kalak e, uga ka adi nggo kerah?”
32 Lit ka dua penjahat si ibaba ras ia guna iukum mate.
33 Seh kenca kalak e i bas ingan si igelari Tengkorak, ipakuken kalak e ia i bas tiang* ras dua penjahat ndai, sada arah kananna, janah sada nari arah kirina.
34 Tapi nina Jesus, “O Bapak, ampunilah kalak e, sebap la iangkana kai si ilakokenna.” Ibagi-bagiken kalak e ka uisna alu erban undi.
35 Cinder jelma si nterem ngenen-ngenenca. Tapi peminpin-peminpin nghina ia, nina, “Kalak si deban iselamatkenna, adi Kristus kin ia, Kalak si Ipilih Dibata, pediatlah ia nelamatken bana.”
36 Prajurit-prajurit pe nggombangi ia. Ideherina ia janah iberekenna anggur si macem
37 janah nina, “Adi Raja Kalak Jahudi kin kam, selamatken dage bandu.”
38 Lit ka tulisen i datasna, “Enda me Raja Kalak Jahudi.”
39 Sekalak penjahat si ipakuken e mulai nghina Jesus, nina, “Kam me Kristus! Selamatken dage bandu bage pe kami!”
40 Tapi irawai penjahat si sada nari ia, nina, “La kin kam mbiar man Dibata? Seri kap ukumenndu ras ia.
41 Adi kita nggo patut iukum sue ras perbahanenta. Tapi dilaki enda la lit salahna.”
42 Kenca si e nina, “O Jesus, inget min aku sanga kam masuk ku Kerajanndu.”
43 Ngaloi Jesus, “Situhuna kukataken bandu wari enda: Kam ras aku i Pardis pagi.”
44 Paksa si e, kira-kira jam 12 ciger,* tapi kerina daerah e jadi gelap seh asa jam 3 karaben,*
45 erkiteken matawari la ersinar. Janah tirai bas ingan si badia merigat jadi dua.
46 Emaka erlebuh Jesus alu sora si megang nina, “O Bapak, kuserahken geluhku ku bas tanNdu.” Kenca bage nina, mate me ia.
47 Sanga idah sekalak perwira kai si terjadi, imuliakenna Dibata janah nina, “Dilaki enda tuhu-tuhu la ersalah.”
48 Kenca idah kalak si pulung i je kai si terjadi, mulih kalak e ku rumah ipekpekina bana.
49 Kerina kalak si nandai ia cinder dauh-dauh nari. Bage ka pe diberu-diberu si ikut ras ia i bas Galilea nari ngidah kerina si terjadi.
50 I je lit sekalak anggota Pengadilen Agama Jahudi,* gelarna Jusup. Ia kalak si bujur ras benar.
51 (Dilaki enda la setuju nandangi rencana ras perbahanen Pengadilen Agama e.) Asalna i kota Arimatea, i Judea nari. Ia sangana nimai Kerajan Dibata.
52 Lawes ia ngadap man Pilatus janah ipindona mayat Jesus.
53 Kenca ipenusurna mayat Jesus, ibalutina alu uis linen halus jenari iamparkenna ku bas kuburen si nggo ikurak i uruk batu, si lenga pernah ipake.
54 Wari e eme wari Persikapen janah Sabat nandangi imulai.
55 Diberu-diberu si reh ras Jesus i Galilea nari pe ngikutken Jusup guna ngenen kuburen e ras uga mayat Jesus iamparken.
56 Kenca si e, mulih kalak e nikapken rempah-rempah ras minak wangi. Tapi i bas wari Sabat kalak e la erdahin bagi si iperentahken Undang-Undang.
Cataten i teruh
^ Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
^ Ntah “kayu.”
^ Ntah “kayu.”
^ Ntah “gelah ipakuken i tiang.”
^ Nen Kamus.
^ Ntah “kayu.”
^ I bas kalak Jahudi, enda jam si peenemken.
^ I bas kalak Jahudi, enda jam si pesiwahken.
^ As. “Sanhedrin.”
