Lukas 4:1-44
4 Jenari, Jesus si dem alu kesah si badia, lawes i bas Lau Jordan nari. Kenca si e ibabai kesah Dibata ia ku taneh si mesawang*
2 sedekah 40 wari. I je icubai Iblis ia. Kai pe la lit ipanna, kenca dung wari-wari e igejapna melihe.
3 Emaka nina Iblis man bana, “Adi anak Dibata kin kam, suruh dage batu enda jadi roti.”
4 Tapi ngaloi Jesus, “Lit tertulis, ‘Manusia arus nggeluh labo arah roti saja.’”
5 Emaka ibaba Iblis ia ku ingan si meganjang. Alu sengkemirep mata* icidahkenna man Jesus kerina kerajan doni.
6 Jenari nina Iblis, “Kubereken kari kerina kuasa enda ras kerina kemulianna man bandu. Erkiteken enda nggo iserahken man bangku, banci kubereken man ise pe ateku.
7 Emaka, adi isembahndu aku sekali saja, kerina enda jadi jangndu.”
8 Ngaloi Jesus, “Lit tertulis, ‘Jahwe Dibatandu si arus isembahndu, janah man baNa saja ngenca kam arus mereken pelayanen si badia.’”
9 Kenca si e, ibabana Jesus ku Jerusalem ku ingan si meganjangna i rumah pertoton janah ikatakenna man bana, “Adi anak Dibata kin kam, dabuhken dage bandu jenda nari,
10 sebap lit tertulis, ‘IsuruhNa kari malekat-malekatNa guna njagai kam,’
11 janah, ‘Itatangna kari kam i bas tanna, alu bage la banci nahendu terantuk ku batu.’”
12 Nina Jesus man bana, “Lit tertulis, ‘Ula icubaindu Jahwe Dibatandu.’”
13 Emaka, kenca dung icubaina Jesus, lawes me Iblis janah itimaina lit kesempaten si cocok.
14 Jesus si dem alu kesah si badia mulih ku Galilea. Terbegi me berita si mehuli kerna ia ku kerina daerah e.
15 Mulai ka ia ngajar i bas ingan-ingan pulung kalak Jahudi* si lit i je, janah kerina kalak nghamati ia.
16 Jenari lawes ia ku Nasaret, ingan ia ipebelin, janah bagi kebiasanna i bas wari Sabat, masuk ia ku ingan pulung kalak Jahudi.* Sanga tedis ia guna mbaca,
17 ibereken man bana gulungen kitap Nabi Jesaya, jenari ibukana kitap e janah idatna i je lit tertulis:
18 “Kesah Jahwe lit i bas aku, erkiteken ipilihNa aku guna mberitaken berita si meriah man kalak si mesera. IsuruhNa aku guna mberitaken kebebasen man kalak tabanen, erban kalak pentang erpengidah, mbebasken kalak si itindas,
19 janah mpebetehken kerna waktuna ipasu-pasu Jahwe kari kalak e mulihi.”
20 Jenari igulungna gulungen e, iulihkenna man petugas, kenca si e kundul ia. Kerina mata kalak si lit i bas ingan pulung kalak Jahudi* e natap ia.
21 Jenari nina man kalak e, “Gundari terjadi me ayat si edenga ibegi kena.”
22 Kerina kalak e mulai muji-muji ia janah jengang kalak e megi kata-katana si mehuli si ndarat i bas babahna nari, janah nina kalak e, “La kin ia anak Jusup?”
23 Ngaloi Jesus, “Pasti ikataken kena bangku, ‘O dokter, pepalemlah bandu. Lakoken ka i jenda, i kutandu, bagi si nggo ibegi kami kerna kai si ilakokenndu i Kapernaum.’”
24 Nina Jesus ka, “Situhuna, la lit nabi si ialoken i bas kutana sendiri.
25 Contohna, sanga jaman Elia, la reh udan telu tahun enem bulan dekahna janah terjadi kelihen si mbelin i bas kerina negri e. Aminna pe nterem diberu si mbalu i bas Israel,
26 Elia la isuruh ndahi ise pe i bas kalak e nari, tapi isuruh ia ndahi sekalak diberu si mbalu si tading i Sarpat i taneh Sidon ngenca.
27 Sanga jaman Nabi Elisa, lit ka nterem kalak si sakit kusta bas Israel. Tapi sada pe la ipepalemna* selain Naman kalak Siria.”
28 Megi si e, merawa kel kerina kalak si lit i bas ingan pulung kalak Jahudi* e,
29 cinder kalak e jenari ibabana ia ku darat kota kalak e, si lit i das deleng. Ibabana ia ku tepi embang gelah idabuhken ia je nari.
30 Tapi lawes ia i tengah-tengah kalak e nari janah iteruskenna perdalanenna.
31 Lawes me ia ku Kapernaum, sada kota i Galilea. I je iajarina kalak i bas wari Sabat,
32 janah jengang kalak e nandangi carana ngajar erkiteken ia ngerana selaku kalak si lit kuasana.
33 I bas ingan pulung kalak Jahudi* lit sekalak dilaki si irasuki malekat jahat, serko ia alu sora si megang,
34 “Hah! Kai urusenndu ras kami, o Jesus kalak Nasaret? Ikernepkenndu kin atendu kami? Kuteh nge ise kam situhuna, Si Badia i bas Dibata nari.”
35 Tapi isergang Jesus ia, “Sinikken! Ndaratlah i bas ia nari.” Emaka kenca idampeskenna dilaki e ku tengah-tengah jelma si nterem, ndarat me malekat jahat e i bas ia nari janah la ilukaina ia.
36 Emaka jengang kerina kalak e, janah nina sapih-sapih ia, “Kata-kata si uga kin enda? Sebap iperentahkenna malekat jahat alu wewenang ras kuasa janah ndarat ka ia!”
37 Emaka berita kerna ia terus terbegi ku belang-belang kota e.
38 Kenca nadingken ingan pulung kalak Jahudi,* lawes ia ku rumah Simon. Paksa si e mami Simon tinggi kel demamna, emaka ipindo kalak e gelah isampati Jesus ia.
39 Cinder me Jesus i sampingna jenari ipepalemna demamna e, emaka lanai ia demam. Minter tedis ia janah isikapkenna pangan man kalak e.
40 Sanga sundut* matawari, ibaba me kerina kalak si erbage-erbage pinakitna man Jesus. Ipepalem Jesus kalak e alu namaken tanna ku datasna sekalak-sekalak.
41 Malekat-malekat jahat pe ndarat i bas nterem jelma nari, serko ia, “Kam kap Anak Dibata.” Tapi isergang Jesus ia janah ilarangna ngerana, sebap iteh kalak e ia Kristus.
42 Sanga pultak matawari, berkat ia ku ingan si melungen. Tapi jelma si nterem mulai ndarami ia. Kenca jumpa, iusahaken kalak e gelah ula Jesus lawes i bas kalak e nari.
43 Tapi nina man kalak e, “Aku pe arus ka mberitaken berita si meriah kerna Kerajan Dibata ku kota-kota si deban, sebap erkiteken si e me aku isuruh.”
44 Emaka lawes ia erberita i bas ingan-ingan pulung kalak Jahudi* i Judea.
Cataten i teruh
^ Taneh si mbelang si jarang iingani.
^ Ntah “sekejap mata.”
^ As. “sinagoga.” Nen Kamus.
^ As. “sinagoga.” Nen Kamus.
^ As. “sinagoga.” Nen Kamus.
^ As. “ibersihkenna.”
^ As. “sinagoga.” Nen Kamus.
^ As. “sinagoga.” Nen Kamus.
^ As. “sinagoga.” Nen Kamus.
^ Ntah “terbenam.”
^ As. “sinagoga-sinagoga.” Nen Kamus.
