Lukas 6:1-49
-
Jesus “Tuan nandangi wari Sabat” (1-5)
-
Dilaki si lumpuh tanna sada ipepalem (6-11)
-
Lit 12 rasul (12-16)
-
Jesus ngajar ras mpepalem (17-19)
-
Keriahen ukur ras cilaka (20-26)
-
Ngkelengi musuh (27-36)
-
Ula nai nghakimi (37-42)
-
Itandai arah buahna (43-45)
-
Rumah si ibangun alu mehuli; rumah si la lit pondasina (46-49)
6 Paksa wari Sabat, erdalan Jesus ngelewati perjuman gandum, iputikken murid-muridna gandum e, ipiuna alu tanna jenari ipanna.
2 Emaka nina piga-piga kalak Parisi, “Engkai maka ilakoken kena kai si ilarang i bas wari Sabat?”
3 Tapi ngaloi Jesus, “Lenga kin pernah ibaca kena kerna kai si ilakoken Daud paksa melihe ia ras teman-temanna?
4 Masuk ia ku rumah Dibata janah ialokenna roti persembahen jenari ipanna janah iberekenna man teman-temanna, si arusna ise pe la banci manca selain imam-imam.”
5 Kenca si e nina Jesus, “Anak manusia kap Tuan nandangi wari Sabat.”
6 I bas wari Sabat si deban masuk ia ku ingan pulung kalak Jahudi* janah mulai ngajar. I je lit sekalak dilaki si lumpuh tanna si kanan.
7 Ahli-ahli Undang-Undang Musa ras kalak Parisi ndarami alasen guna nuduh Jesus, emaka iperdiateken kalak enda kel ia guna ngenen ipepalemna nge kari kalak ntah lang bas wari Sabat.
8 Tapi erkiteken itehna perukuren kalak e, nina man si tanna lumpuh ndai, “Kekeken janah cinderlah i tengah.” Keke ia janah cinder ia i je.
9 Kenca si e, nina Jesus man kalak e, “Nungkun ateku, si apai kin si banci ilakoken bas wari Sabat: si mehuli nge ntah si jahat, nelamatken kegeluhen ntah ngkernepkenca?”
10 Kenca itatapna kerina kalak e, ikatakenna man dilaki e, “Pepinter tanndu.” Emaka ipepinterna janah malem me tanna e.
11 Tapi merawa kel kalak ndai janah mulai arih-arih kerna kai si banci ilakoken kalak e man Jesus.
12 I bas sada wari, lawes ia ku deleng guna ertoto. I je sada berngin ia ertoto man Dibata.
13 Kenca terang wari, ilebuhna murid-muridna janah ipilihna 12 i bas kalak e nari, si igelarina ka rasul-rasul:
14 Simon si igelarina ka Petrus, Andreas seninana, Jakup, Johanes, Pilipus, Bartolomeus,
15 Matius, Tomas, Jakup anak Alpeus, Simon si igelari “kalak si semangat,”
16 Judas anak Jakup, ras Judas Iskariot si jadi penghianat.
17 Jenari, nusur me Jesus ras kalak e janah cinder i bas ingan si rata. I je nterem kel murid-muridna, nterem ka kalak si deban si rehna arah kerina Judea ras Jerusalem bage pe arah daerah pantai Tirus ras Sidon nari. Kalak e reh guna megiken Jesus janah ate kalak e gelah ipepalem pinakitna.
18 Kalak si iganggu malekat jahat pe ipepalem.
19 Janah iusahaken kalak e kerina ndadap Jesus, erkiteken lit kuasa si ndarat i bas ia nari janah kerina kalak ipepalem.
20 Itatapna murid-muridna janah nina,
“Ermeriah ukurlah kena si mesera,* sebap man kena me Kerajan Dibata.
21 “Ermeriah ukurlah kena si melihe gundari, sebap ibesuri me kena pagi.
“Ermeriah ukurlah kena si ngandung gundari, sebap tawa me kena pagi.
22 “Ermeriah ukurlah kena adi segat ate kalak kena, itulakna kena, ihinana kena, janah ikatakenna kena jahat erkiteken Anak manusia.
23 Sebap bage ka nge nai si ilakoken nini bulang kalak e man nabi-nabi. Ermeriah ukurlah i bas wari e janah lompatlah alu meriah sebap upah kena mbelin i surga.
24 “Tapi cilaka me kena si bayak, sebap nggo ialoken kena kerina pengapul.
25 “Cilaka me kena si besur gundari, sebap melihe nge kena pagi.
“Cilaka me kena si tawa gundari, sebap erceda ate ras tangis nge kena pagi.
26 “Cilaka me kena adi kerina kalak ngataken si mehuli kerna kena, sebap bage ka nge nai si ilakoken nini bulang kalak e man nabi-nabi palsu.
27 “Tapi kukataken man kena si megi: Teruslah kelengi musuh-musuh kena, mehulilah perbahanen kena man kalak si rate segat man kena,
28 pasu-pasulah kalak si numpahi kena, totokenlah kalak si nghina kena.
29 Adi iparap kalak sembelah ayondu, bereken ka si sembelah nari. Adi ibuat kalak uisndu si arah darat, bereken ka uisndu si arah bas.
30 Ise pe si mindo bandu, berekenlah. Adi ibuat kalak barangndu, ula pindo gelah iulihkenna.
31 “Selain si e, kai si ate kena ilakoken kalak man kena, lakoken ka si bage man bana.
32 “Adi kalak si ngkelengi kena ngenca ikelengi kena, kai kelebihen kena? Sebap kalak perdosa pe ngkelengi kalak si ngkelengi ia.
33 Janah adi man kalak si mehuli kena ngenca mehuli, kai kelebihen kena? Kalak perdosa pe bage ka nge.
34 Selain si e, adi ibereken kena pinjamen* man kalak si akap kena banci nggalarisa, kai kelebihen kena? Kalak perdosa pe mereken pinjamen man kalak perdosa gelah kalak e ngaloken ka mulihi asa si iberekenna.
35 Sebalikna, teruslah kelengi musuh-musuh kena, lakokenlah si mehuli, berekenlah pinjamen alu la ngarapken mulihi. Emaka mbelin me upah kena janah kena jadi anak-anak Dibata Si Meganjangna, sebap mehuli Ia man kalak si la meteh ngata bujur ras kalak jahat.
36 Teruslah rate mekuah, bagi Bapak kena pe rate mekuah.
37 “Selain si e, ula nai kena nghakimi gelah kena pe la ihakimi. Ula nai isalahken kena kalak gelah kena pe la isalahken. Teruslah ampuni gelah kena pe iampuni.*
38 Teruslah mere, maka kena pe ibere. Itungtungken kalak pagi ku bas kantong jubah kena alu sukaten si mehuli, si ipadatken, iugur-ugur seh mambur. Sebap uga perbahanen kena man kalak si deban, bage ka nge kari perbahanenna man kena.”*
39 Kenca si e iceritakenna ka sada perumpaman:* “Me labo banci kalak pentang negu-negu kalak pentang? Me duana kari ia ndabuh ku lubang?
40 Labo ganjangen sekalak murid asangken guruna, tapi kerina kalak si iajar alu sempurna banci bagi guruna.
41 Emaka, ngkai idahndu rintep* i bas mata seninandu tapi la idahndu balok i bas matandu sendiri?
42 Uga banci ikatakenndu man seninandu, ‘O senina, pediat aku mpedarat rintep* i bas matandu,’ padahal balok i bas matandu sendiri pe la idahndu? O kalak si munapik! Pedarat lebe balok i bas matandu nari, kenca si e banci jelas pengidahndu guna mpedarat rintep* i bas mata seninandu.
43 “Sebap la lit batang kayu si mejile ngasilken buah si macik, janah la lit batang kayu si macik ngasilken buah si mejile.
44 Sebap tiap batang kayu itandai arah buahna. Contohna, la ipepulung kalak buah ara i bas sinuan si erduri nari, bage ka pe labo iputikken kalak buah anggur i bas peren duri nari.
45 Kalak si mehuli mpedarat kai si mehuli si lit i bas pusuhna, tapi kalak si jahat mpedarat kai si jahat si lit i bas pusuhna. Sebap kai si ndarat i bas babah nari rehna i bas pusuh nari.
46 “Adi bage, ngkai maka ilebuh kena aku ‘Tuan! Tuan!’ tapi la ilakoken kena si kukataken?
47 Bagenda me kalak si reh bangku janah megiken kata-kataku ras ndalankenca:
48 Ia bali bagi kalak si mbangun rumah. Mbages ikurakna taneh seh asa jumpa batu, i je ibanna pondasina. Emaka, sanga reh banjir janah ientam lau si mbelin rumah e, rumah e la mugur-ugur sebap paguh ibangun.
49 Sebalikna, ise pe si megi tapi la ngelakoken kai pe, ia bali bagi kalak si mbangun rumah i datas taneh tapi la lit pondasina. Sanga ientam lau si mbelin rumah e, minter sontar janah seh kel cedana.”
Cataten i teruh
^ As. “sinagoga.” Nen Kamus.
^ Ntah “musil.”
^ Maksudna, la erbunga.
^ Ntah “ialemi.”
^ Ntah “uga sukaten si igunaken kena nukati, alu e ka nge kari isukatken man kena.”
^ Ntah “anding-andingen.”
^ Ntah “kai pe si kitik kel.”
^ Ntah “kai pe si kitik kel.”
^ Ntah “kai pe si kitik kel.”
