Lukas 7:1-50
7 Kenca dung ikataken Jesus si ndai kerina man jelma si nterem, masuk ia ku Kapernaum.
2 I je lit sekalak perwira, keleng atena budakna si sangana mekelek penakitna janah nandangi mate.
3 Paksa ibegi perwira e kerna Jesus, isuruhna piga-piga peminpin Jahudi gelah mindo man Jesus guna reh mpepalem budakna e.
4 Idahi kalak e Jesus janah mindo kel ia, nina, “Cocok kel isampatindu perwira e,
5 sebap keleng atena bangsata janah ibangunna ingan pulung kalak Jahudi* man kami.”
6 Emaka lawes Jesus ras kalak e. Tapi sanga nggo ndeher ia ku rumah e, isuruh perwira e teman-temanna ngataken man Jesus, “O Pak, la padah latih iakapndu, sebap la aku metunggung* ngalo-ngalo kam i rumahku.
7 Eme sebapna la kuakap metunggung* bangku ndahi kam. Tapi sitik saja gia kam ngerana pasti malem nge budakku e.
8 Sebap aku pe lit nge si ganjangen asa aku, janah lit ka nge prajurit-prajurit teruhenku. Adi ningku man bana, ‘Laweslah!’ minter nge ia lawes. Adi ningku man si deban, ‘Rehlah!’ minter nge ia reh. Janah adi ningku man suruh-suruhenku, ‘Ban enda!’ minter nge ibanna.”
9 Jengang Jesus megi rananna e, janah itulihkenna ku jelma si nterem si ngikuti ia, nina, “Lenga pernah aku jumpa bas Israel kalak si bage kel belinna kinitekenna.”
10 Sanga mulih kalak si isuruhna ndai ku rumah, idapetina nggo malem budak e.
11 La ndekah kenca si e, lawes Jesus ku sada kota si igelari Nain, ikut ka murid-muridna bage pe jelma si seh kel teremna.
12 Sanga nggo ndeher ia ku gerbang kota e, lit kalak si sangana maba mayat. Si mate e anak tonggal sekalak diberu si nggo mbalu. Seh kel teremna jelma arah kota e nemani diberu e.
13 Sanga idah Tuan diberu e, mekuah kel atena, janah nina, “Ula nai kam ngandung.”
14 Emaka ideherina janah ijemakna ingan maba mayat e, janah ngadi me kalak si mabasa. Jenari nina Jesus, “O anak perana, kukataken man bandu, kekeken!”
15 Kundul me kalak mate ndai janah mulai ngerana, jenari ibereken Jesus ia man nandena.
16 Mbiar kel kalak e kerina, janah imuliakenna Dibata, nina, “Sekalak nabi si mbelin nggo reh ku tengah-tengahta,” janah, “Enggo iperdiateken Dibata mulihken umatNa.”
17 Berita kerna ia terbegi ku belang-belang Judea bage pe ku sekeliling daerah e.
18 Ilaporken murid-murid Johanes kerina enda man Johanes.
19 Emaka ilebuh Johanes dua muridna janah isuruhna kalak e ndahi Tuan guna nungkun, “Kam kin kalak si nandangi reh e, ntah itimai kami denga kalak si deban?”
20 Sanga jumpa kalak e ras Jesus, nina, “Isuruh Johanes Peridiken kami guna nungkun bandu, ‘Kam kin kalak si nandangi reh e, ntah itimai kami denga si deban?’”
21 Paksa si e, ipepalemna nterem kalak si kurang sehat bage pe si mekelek penakitna, ipelawesna malekat jahat, janah ibanna nterem kalak pentang erpengidah.
22 Ijawap Jesus kalak e, “Dahilah Johanes, kataken man bana kai si nggo idah kena ras si ibegi kena: Kalak pentang gundari erpengidah, si lumpuh erdalan, si sakit kusta ipepalem, si pasek erpemegi, si mate ipekeke, janah berita si meriah iberitaken man kalak mesera.
23 Meriah me ukur kalak si la ragu erkiniteken man bangku.”*
24 Paksa persuruhen Johanes e nggo lawes, mulai iceritaken Jesus kerna Johanes man jelma si nterem, nina, “Kai kin si man nehenen kena adi lawes kena ku taneh mesawang?* Peren si iembus angin nge?
25 Kai dage si man nehenen kena ku je? Kalak si mehaga uisna? Kalak si mejile uisna janah si jore geluhna inganna i bas istana.
26 Jadi, kai nehenen kena ku je? Sekalak nabi? Payo, kukataken man kena maka ia lebihen asangken sekalak nabi.
27 Ia me si ikataken i bas tulisen enda, ‘Nenlah! Kusuruh persuruhenKu leben asangken kam, ia pagi si nikapken dalan man bandu.’
28 Johanes kap si mbelinna i bas kerina si lahir i bas diberu nari, tapi si kitikna i bas Kerajan Dibata belinen asangken ia.”
29 (Sanga kerina kalak ras pengalo cuke megi si e, iakui kalak e maka Dibata benar, sebap kalak e nggo iperidiken alu peridin Johanes.
30 Tapi kalak Parisi ras ahli Undang-Undang Musa la mperdiateken pedah* si ibereken Dibata man kalak e, sebap kalak e la iperidiken Johanes.)
31 “Adi bage, ras ise arus kupeseri kalak enda, janah bagi ise kin kalak enda?
32 Kalak enda bali bagi anak-anak si kundul i bas pajak, si ngelebuh teman-temanna, nina, ‘Enggo iembus kami suling tapi la kena landek, iendeken kami lagu tangis-tangis tapi la kena tangis.’
33 Bage ka pe, Johanes Peridiken nggo reh, la ia man roti ntah pe minem anggur, tapi ning kena, ‘Lit bas ia malekat jahat.’
34 Anak manusia reh, man ras minem, tapi ning kena, ‘Nenlah! Ia kalak rangap ras peminem anggur, temanna pe pengalo cuke ras kalak perdosa!’
35 Amin bage gia, kepentaren teridah arah asilna kap.”*
36 Salah sada kalak Parisi terus mindo gelah ras Jesus ia man. Emaka reh Jesus ku rumah kalak Parisi e, kundul ia janah man i je.
37 Nen! Sekalak diberu si terberita selaku kalak perdosa i bas kota e meteh maka Jesus sangana man i rumah kalak Parisi. Emaka ibabana sada botol marmar minak wangi.
38 Ibuatna inganna i bas pudi Jesus i deher nahena, ngandung ia seh bernak nahe Jesus iban iluhna, jenari ielapna alu bukna, iemana ka nahe Jesus alu lembut janah icurcurkenna minak wangi ku je.
39 Ngidah si e, kalak Parisi si nggo ngundang Jesus ngerana i bas pusuhna, “Adi tuhu-tuhu nabi kin dilaki enda, pasti itehna ise ras diberu si uga kin si ndadap ia e, ia me kalak perdosa.”
40 Erkiteken iteh Jesus kai si lit i bas pusuhna, nina man bana, “Simon, lit ateku si kukataken bandu.” Ngaloi Simon, “Katakenlah Guru!”
41 “Dua kalak dilaki rutang man sekalak jelma, sekalak utangna 500 dinar* janah sekalak nari 50.
42 Sanga la lit kai pe i bas kalak e guna nggalarisa, isasapkenna utang* kalak e. Adi bage, si apai nge i bas kalak e duana si kelengen atena perutangenna ndai?”
43 Ngaloi Simon, “Kuakap kalak si buen utangna.” Nina Jesus bana, “Payo katandu ena.”
44 Jenari itulihkenna ku diberu ndai janah nina man Simon, “Idahndu nge diberu enda? Reh aku ku rumahndu, la iberendu lau guna mburihi naheku. Tapi diberu enda ibernakina naheku alu iluhna janah ielapna alu bukna.
45 Kam, la iemandu aku, tapi diberu enda, mulai kin aku reh ndai la erngadi-ngadi iemana naheku alu lembut.
46 La icurcurkenndu minak ku takalku, tapi diberu enda icurcurkenna minak wangi ku naheku.
47 Erkiteken si e, kukataken bandu, aminna pe dosa-dosana seh buena,* nggo iampuni sebap mbelin kekelengenna. Tapi kalak si kitik kekelengenna, sitik ka iampuni.”
48 Kenca si e nina Jesus man diberu ndai, “Dosa-dosandu nggo iampuni.”
49 Kalak si man ras Jesus mulai ngerana sapih-sapih ia, “Ise kin dilaki enda maka dosa pe banci iampunina?”
50 Tapi nina Jesus man diberu e, “Kinitekenndu nggo nelamatken kam, laweslah alu dame.”
Cataten i teruh
^ As. “sinagoga.” Nen Kamus.
^ Ntah “cocok.”
^ Ntah “cocok.”
^ As. “si la tertuktuk erkiteken aku.”
^ Taneh si mbelang si jarang iingani.
^ Ntah “petunjuk.”
^ As. “kepentaren terbukti benar arah kerina anakna.”
^ Sen logam pirak kalak Roma.
^ Ntah “tuhu-tuhu iampunina.”
^ Ntah “belinna.”
