Markus 13:1-37
13 Sanga ia ndarat i bas rumah pertoton nari, sekalak muridna ngataken, “O Guru, nenlah! Luar biasa kel batu-batu ras bangunen enda!”
2 Tapi nina Jesus, “Idah kena nge kerina bangunen si galang enda? Situhuna, lanai pagi lit sada batu pe si lit i jenda itadingken i datas batu si debanna janah kerina iruntuhken.”
3 Sanga ia kundul i Deleng Saitun, ngala ku rumah pertoton, nungkun Petrus, Jakup, Johanes, ras Andreas man bana, paksa ise pe la lit i je,
4 “Kataken man kami, ndigan kin e terjadi, janah kai nge pagi jadi tanda paksa kerina enda seh ku kedungenna?”
5 Emaka nina Jesus man kalak e, “Hati-hatilah, ula sempat lit si erbanca kena papak,
6 perban nterem pagi si reh make gelarku, nina, ‘Aku kap ia,’ janah nterem ibanna jelma papak.
7 Selain si e, sanga ibegi kena sora perang ras berita-berita kerna perang, ula kena mbiar. Enda kerina arus terjadi, tapi kedungen e lenga seh.
8 “Bangsa pagi ngelawan bangsa ras kerajan ngelawan kerajan. I japa pe terjadi gempa ras kurang pangan. Enda kerina bena-bena kiniseran* denga nge.
9 “Hati-hatilah kena. Ibaba kalak pagi kena ku pengadilen setempat, ipekpeki i bas ingan pulung kalak Jahudi,* ibaba ku lebe-lebe gubernur-gubernur ras raja-raja erkiteken aku, gelah ersaksi kena man kalak e.
10 Janah, berita si meriah e arus iberitaken lebe man kerina bangsa.
11 Sanga ibaba kalak pagi kena guna iserahken, ula gulut ukur kena kerna kai si ikataken kena, tapi kai pe si ibereken man kena i bas paksa si e, katakenlah, sebap labo kena si ngerana tapi kesah si badia.
12 Selain si e, kalak si ersenina nerahken seninana pagi gelah ibunuh, bage pe bapak nandangi anakna. Anak pe pagi ngelawan orang tuana, janah ibunuhna ka.
13 Segat pagi ate kerina kalak man kena erkiteken gelarku. Tapi kalak si megenggeng seh ku kedungenna iselamatken pagi.
14 “Tapi sanga idah kena kai si erban ciga ate si erban hancur cinder bas ingan si arusna la i je (perlu iukuri kalak si mbaca sanga mbaca enda), kalak si lit i bas Judea arus kiam ku deleng-deleng.
15 Kalak si lit i bas atap rumah* ula ku teruh ntah pe ku bas guna muat kai pe si lit bas rumahna,
16 janah kalak si sangana bas juma ula mulihken guna ngelegi uisna.
17 Cilaka kel diberu si sangana hamil ras si sangana pepinemken anakna paksa si e!
18 Teruslah ertoto gelah si e ula terjadi i bas musim mbergeh.
19 Sebap, i bas wari-wari e pagi terjadi kiniseran. Kiniseran si bage lenga pernah terjadi mulai kin doni iciptaken Dibata seh asa gundari, janah ndigan pe lanai terjadi.
20 Situhuna, adi la ipegendek Jahwe wari-wari e, ise pe la banci iselamatken. Tapi guna kalak si nggo ipilihNa, ipegendekNa me wari-wari e.
21 “Bage ka pe, adi lit si ngataken, ‘Nen! I jenda kap Kristus,’ ntah, ‘Nen! I jah kap ia,’ ula kena tek.
22 Sebap reh me pagi Kristus-Kristus palsu ras nabi-nabi palsu, janah ibanna pagi melala tanda ras mukjizat guna erban kalak papak, termasuk kalak si ipilih e pe.
23 Emaka, hati-hatilah kena. Kerina enda nggo kupebetehken man kena ope lenga terjadi.
24 “Tapi i bas wari e, kenca kiniseran ndai, minter matawari jadi gelap, bulan lanai ersinar,
25 bintang-bintang ndabuhen langit nari, janah kuasa-kuasa i langit pe mugur-ugur.
26 Kenca si e, idah kalak e pagi Anak manusia reh i bas embun alu kuasa ras kemulian si mbelin.
27 Kenca bage, isuruhna pagi malekat-malekatna janah ipepulungna kalak si nggo ipilih i bas empat mata angin nari, arah ujung doni seh ku ujung langit.
28 “Gundari erlajarlah i bas perumpaman* batang ara nari: Kenca dahanna si nguda reh janah erbulung, mis iteh kena maka musim perlego nggo ndeher.
29 Bage ka pe, sanga idah kena kerina enda terjadi, arus iteh kena maka Anak manusia nggo i deher pintu.
30 Situhuna, lit sada kelompok kalak* si la pagi mate seh asa kerina enda terjadi.
31 Langit ras doni masap me pagi, tapi kata-kataku tetap rasa lalap.
32 “Kerna wari ntah pe jamna, ise pe la metehsa, malekat-malekat i surga pe lang, Anak pe lang, tapi Bapak ngenca.
33 Teruslah hati-hati, teruslah sadar, sebap la iteh kena ndigan waktu si itentuken e.
34 Enda bali bagi sekalak dilaki si lawes ku luar negri nadingken rumahna. Iberena kuasa man budak-budakna, ras dahin man tiap budakna, janah isuruhna penjaga pintu gelah terus erjaga-jaga.
35 Emaka, teruslah erjaga-jaga, sebap la iteh kena ndigan tuan rumah e reh, ntah i bas berngi wari ntah tengah berngi ntah ope lenga pagi-pagi si lampas* ntah pe paksa erpagi-pagi.
36 Gelah sanga rempet ia reh, la idapetina kena sangana medem.
37 Tapi kai si kukataken man kena, kukataken ka man kerina: Teruslah erjaga-jaga.”
Cataten i teruh
^ Maksudna, kiniseran bagi persui sekalak diberu sanga melahirken.
^ As. “sinagoga.” Nen Kamus.
^ Buen rumah si i je rata atapna janah melala si banci ilakoken i je.
^ Ntah “anding-andingen.”
^ I bas bahasa Junani, enda maksudna sada kelompok kalak si nggeluh i bas jaman si seri.
^ As. “paksa tekuak manuk.”
