Markus 14:1-72
-
Irencanaken imam-imam munuh Jesus (1, 2)
-
Icurcurken man Jesus minak wangi (3-9)
-
Ihianati Judas me Jesus (10, 11)
-
Paskah si terakhir (12-21)
-
Man Berngi ras Tuan si jadi ikuten (22-26)
-
Nubuat kerna Petrus si merso (27-31)
-
Ertoto Jesus i Getsemane (32-42)
-
Jesus itangkap (43-52)
-
Persidangen i Pengadilen Agama Jahudi (53-65)
-
Petrus mersoken Jesus (66-72)
14 Paskah ras Perayan Roti si La Itama Ragi dua wari nari. Imam-imam kepala ras ahli Undang-Undang Musa ndarami cara nangkap Jesus alu cara si licik guna munuh ia.
2 Sebap nina kalak e, “Ula sanga perayan, perban banci saja kari guntar jelma si nterem.”
3 Sanga Jesus i Betani, man ia i rumah Simon si pernah sakit kusta. Sekalak diberu reh ndahi ia alu maba sada botol marmar, isina minak wangi* si asli si iban i bas urat-urat si merim nari, si seh kel ergana. Ibukana botol e jenari icurcurkenna ku takal Jesus.
4 Ngidah si e, piga-piga kalak jungut-jungut sapih-sapih ia, nina, “Engkai maka isia-siaken minak wangi e?
5 Sebap minak wangi e banci idayaken lebih 300 dinar* ergana janah senna banci ibereken man kalak mesera!” Nembeh kel ate kalak e man* diberu ndai.
6 Tapi nina Jesus, “Pediat sajalah ia. Engkai maka susah iban kena ia? Si mehuli kap ibanna bangku.
7 Sebap kalak mesera lalap nge ras kena, janah banci iban kena si mehuli man kalak e katawari pe ate kena, tapi aku labo lalap ras kena.
8 Ilakokenna kai si banci ilakokenna, icurcurkenna minak wangi ku dagingku ope lenga penguburenku.
9 Situhuna, i japa pe berita si meriah iberitaken i belang-belang doni, kai si ilakoken diberu enda iceritaken ka pagi guna nginget ia.”
10 Judas Iskariot, salah sada arah 12 rasul, lawes ndahi imam-imam kepala guna nerahken Jesus man kalak e.
11 Sanga ibegi kalak e kerna si e, meriah iakapna janah ijanjikenna mere sen pirak man Judas. Emaka mulai idaramina kesempaten guna nerahken Jesus.
12 Sanga wari pertama i bas Perayan Roti si La Itama Ragi, paksa korban Paskah biasana ibereken, nungkun murid-murid man Jesus, “Ku ja atendu kami lawes janah nikapken pangan Paskah man bandu?”
13 Emaka isuruhna dua muridna janah nina, “To laweslah ku kota, i je lit kari sekalak dilaki si maba kudin taneh ingan lau njumpai kena. Ikutkenlah ia,
14 janah ku japa pe ia masuk, kataken man tuan rumah, ‘Nina Guru, “I ja ruang tamu si banci jadi inganku man pangan Paskah ras murid-muridku?”’
15 Icidahkenna kari man kena sada ruangen si mbelang i das loteng, si nggo isikapken guna sipake. Sikapkenlah pangan Paskahta i je.”
16 Berkat me murid-murid e, masuk kalak e ku kota janah idapetina kerina bagi si nggo ikataken Jesus, emaka isikapkenna me perayan Paskah.
17 Paksa berngi, reh ia ras 12 rasulna.
18 Sanga kalak e man, nina Jesus, “Situhuna, sekalak i bas kena nari si man ras aku, ihianatina kari aku.”
19 Mulai ceda ate kalak e janah nungkun man bana sekalak-sekalak, “Me labo aku?”
20 Nina man kalak e, “Ia salah sada i bas 12 rasul enda, si ncelupken roti radu ras aku ku bas mangkok.
21 Lawes me Anak manusia e, bagi si nggo itulisken kerna ia. Tapi cilaka kel kalak si nghianati Anak manusia e! Ulin min ndai ia la lahir.”
22 Sanga kalak e man denga, ibuat Jesus roti, ertoto ia mindo pasu-pasu, icepik-cepikkenna roti e, jenari iberekenna man kalak e, nina, “Buatlah, enda ngertiken dagingku.”
23 Kenca si e, ibuatna sada calung,* ertoto ia ngataken bujur, janah iberekenna man kalak e, kerina ia minem je nari.
24 Nina man kalak e, “Enda ertina darehku, ‘dareh perjanjin’ si iamburken pagi guna nterem jelma.
25 Situhuna kukataken man kena, lanai bo pagi kuinem anggur seh warina kuinem anggur si mbaru i bas Kerajan Dibata.”
26 Dungna, kenca ngendeken puji-pujin,* lawes kalak e ku Deleng Saitun.
27 Nina Jesus man kalak e, “Kerina kari kena nadingken aku, sebap bagi si tertulis, ‘Kuserang pagi permakan e, janah merap pagi biri-biri e.’
28 Tapi kenca aku ipekeke, leben kari aku asa kena ku Galilea.”
29 Ngaloi Petrus, “Aminna pe kerina kalak nadingken kam, aku labo.”
30 Nina Jesus man bana, “Situhuna, sendah, bas berngi enda pe, ope lenga tekuak manuk dua kali, nggo ipersokenndu kari aku telu kali.”
31 Tapi tetap ikataken Petrus, “Aminna pe arus aku mate ras kam, pasti la kam kupersoken.” Kerina murid-murid si deban pe bage ka nina.
32 Jenari seh me kalak e i bas ingan si igelari Getsemane, janah nina man murid-muridna, “Kundullah i jenda, ertoto aku lebe ku jah.”
33 Ibabana Petrus, Jakup, bage pe Johanes ras ia, jenari mulai ceda kel atena janah getem kel pusuhna.
34 Nina man kalak e, “Ceda kel ateku, tempa mate atena. Timai i jenda janah teruslah erjaga-jaga.”
35 Kenca si e miser ia ku lebe, erjimpuh ia i taneh janah mulai ertoto, gelah adi banci kiniseran e ipedauh arah ia.
36 Nina, “Abba,* Bapak, kerina banci ilakokenNdu. Agui min calung* enda i bas aku nari. Tapi, labo peratenku, peratenNdulah si jadi.”
37 Mulihken ia janah idapetina kalak e paksana medem. Nina man Petrus, “O Simon, medem kam e? La nge kam ngasup tetap erjaga-jaga sada jam saja?
38 Teruslah erjaga-jaga janah teruslah ertoto, gelah ula kena nyerah ku bas percuban. Pusuh tuhu semangat, tapi daging lemah.”
39 Lawes ka ia mulihi janah ertoto, ikatakenna ka bagi si ndai.
40 Kenca si e mulihken ka ia janah idapetina kalak e paksana medem, sebap mberat matana, emaka la iteh kalak e uga njawapsa.
41 Jenari mulihken ia petelu kaliken janah nina, “I bas paksa si bagenda pe kena medem ras istirahat! Enggo me bias! Enggo seh jamna! Nenlah! Anak manusia ihianati i bas tan kalak perdosa.
42 Tediskenlah, ota kita lawes. Nen! Si nghianati aku nggo ndeher.”
43 Sanga ia ngerana denga, mis reh Judas, sekalak i bas 12 rasul nari, reh ia radu ras sada rombongen si nterem si maba pedang ras perpalu. Kalak e isuruh imam-imam kepala, ahli Undang-Undang Musa ras peminpin-peminpin.
44 Si nghianati ia nggo mere sada tanda man kalak e, nina, “Ise kari si kuema, ia me jelmana. Tangkaplah ia, babalah, ula sempat pulah.”
45 Kenca si e minter idahina Jesus janah nina, “Guru!”* jenari iemana ia alu lembut.
46 Emaka itangkap kalak e Jesus janah itagangina.
47 Tapi sekalak si cinder i je, ibuatna pedangna janah iserangna budak imam si mbelin, retap ibanna cupingna.
48 Tapi nina Jesus man kalak e, “Akap kena kin aku enda perampok maka reh kena maba pedang ras perpalu nangkap aku?
49 Tiap wari aku ras kena janah ngajar i bas rumah pertoton, tapi la itangkap kena aku. Tapi alu bagenda me terjadi kai nina Kitap si Badia.”
50 Kerina murid-murid kiam nadingken ia.
51 Tapi, lit sekalak anak perana si make uis linen halus ngenca, ngikuti Jesus deher nari. Iusahaken kalak ndai nangkap ia,
52 emaka itadingkenna uis linenna e janah kiam ia la ruis.*
53 Kenca si e, ibaba me Jesus ku imam si mbelin, janah i je nggo pulung kerina imam kepala, peminpin, ras ahli Undang-Undang Musa.
54 Tapi Petrus ngikutken Jesus dauh-dauh nari, seh ku halamen rumah imam si mbelin. I je kundul ia ras pelayan-pelayan rumah janahna cudu deher api.
55 Asum si e, imam-imam kepala ras kerina anggota Pengadilen Agama Jahudi* ndarami kesaksin guna ngelawan Jesus gelah ia iukum mate. Tapi la lit kai pe si idat kalak e.
56 Aminna pe nterem kalak mere kesaksin si palsu kerna ia, tapi sada pe la seri katana.
57 Selain si e, piga-piga kalak cinder janah mereken kesaksin si palsu kerna ia, nina,
58 “Ibegi kami katakenna, ‘Kuruntuhken pagi rumah pertoton enda si iban alu tan manusia, janah i bas telu wari kubangun ka pagi rumah pertoton si deban si la iban alu tan manusia.’”
59 Tapi kesaksin enda pe la seri ras kesaksin kalak si deban.
60 Kenca si e, cinder me imam si mbelin i tengah-tengah kalak e, janah isungkunina Jesus, “La nge atendu katakenndu kai pe? Uga menurutndu tuduhen kalak e bandu?”
61 Tapi Jesus tetap sinik janah sitik pe la ijawapna. Mulihi imam si mbelin e nungkun, “Kam kin Kristus, Anak Dibata Si Badia e?”
62 Ijawap Jesus, “Ue, aku, idah kena pagi Anak manusia kundul arah kanan Si Erkuasa janah reh i datas embun i langit.”
63 Erkiteken si e, irigatken imam si mbelin uisna, nina, “Man kadeta nari kin saksi?
64 Enggo ibegi kena ihinana Dibata. Uga keputusen kena?” Kerina kalak e ngatakenca maka ia patut mate.
65 Piga-piga kalak mulai nciduri ia, itutupina ka ayona, janah itinjuina, nina, “Adi nabi kin kam, kataken dage man kami ise si nggudam kam!” Iparap petugas-petugas pengadilen e ayona, kenca si e ibabana lawes.
66 Sanga Petrus i teruh denga, i halamen, reh me sekalak diberu, pelayan imam si mbelin.
67 Sanga idahna Petrus cudu i je, itatapna ia janah nina, “Kam pe ras Jesus kap, kalak Nasaret e.”
68 Tapi ipersokenna, nina, “La ia kutandai, janah la kuangka kai si ikatakenndu e.” Jenari lawes ia ku gerbang.
69 I je pelayan si diberu e ngidah ia, janah mulihi ikatakenna man kalak si cinder i je, “Ia salah sada i bas kalak e nari.”
70 Mulihi ka ipersokenna. La ndekah kenca si e, kalak si cinder i je ngerana man Petrus, “Pasti kam salah sada i bas kalak e, kam me kalak Galilea.”
71 Tapi mulai Petrus ersumpah, “La kutandai dilaki si ikataken kena ena!”
72 Minter tekuak manuk pedua kaliken, teringet Petrus nandangi kai si nggo ikataken Jesus, “Ope lenga tekuak manuk dua kali, nggo ipersokenndu aku telu kali.” Emaka getem kel pusuhna janah tangis kel ia.
Cataten i teruh
^ As. “minak narwastu.”
^ Sen logam pirak kalak Roma.
^ Ntah “Irawaina; Isergangina.”
^ Ntah “cangkir.”
^ Ntah “masmur.”
^ I bas bahasa Aram, e ertina “O Bapak!”
^ Ntah “cangkir.” Enda ngertiken peraten Dibata guna mpediat Jesus mate alu tuduhen ihinana Dibata.
^ As. “Rabbi.”
^ Ntah “menam tilanjang; make baju dalam ngenca.”
^ As. “Sanhedrin.”
