Markus 2:1-28
2 Tapi kenca piga-piga wari, mulih ka ia ku Kapernaum, janah terberita me maka ia nggo i rumah.
2 Emaka nterem kalak pulung i rumah e dungna lanai siat, i bas deher pintu pe lanai siat. Jenari mulai ia ngerana kerna kata Dibata man kalak e.
3 Kenca si e lit empat kalak maba sekalak dilaki si lumpuh.
4 Tapi la banci ibaba kalak e ia pas ku lebe-lebe Jesus erkiteken nterem kel jelma. Emaka iaguina atap si lit i datas Jesus, kenca si e ibanna lubang i je, jenari ipenusurna kalak lumpuh e tare ingan medemna.
5 Ngidah kiniteken kalak e, ikataken Jesus man si lumpuh e, “Nakku, dosandu nggo iampuni.”
6 Lit piga-piga ahli Undang-Undang Musa sangana kundul i je, janah ngeranai i bas pusuhna,
7 “Engkai maka bage nina ngerana? Ihinana kap Dibata. Ise kin si banci ngampuni dosa selain Dibata?”
8 Tapi mis iteh Jesus kai si lit i bas ukur kalak enda, emaka nina, “Engkai maka bage perukuren kena?
9 Apai kin nukahen ngatakenca man si lumpuh e, ‘Dosandu nggo iampuni,’ asangken, ‘Cinderken, angkat ingan medemndu jenari erdalanlah’?
10 Tapi, gelah iteh kena maka Anak manusia erkuasa i doni guna ngampuni dosa—” Jenari nina man kalak si lumpuh e,
11 “Cinderken, angkat ingan medemndu, janah mulihlah ku rumahndu.”
12 Emaka cinder ia janah mis iangkatna ingan medemna, kenca si e erdalan ia ku darat i lebe-lebe jelma si nterem. Emaka jengang kalak e kerina janah imuliaken kalak e Dibata, nina, “Lenga pernah siidah si bagenda rupana.”
13 Lawes ka Jesus ku tepi lawit, janah kalak si nterem rehen ndahi ia, emaka iajarina kalak e.
14 Sanga ia erdalan, idahna Lewi anak Alpeus kundul i bas kantor pajak. Nina Jesus man bana, “Jadilah pengikutku.” Tedis ia jenari ikutkenna Jesus.
15 I bas pudi wari, sanga Jesus man i rumah Lewi, nterem pengalo cuke ras kalak perdosa man ras Jesus bage pe ras murid-muridna, sebap nterem i bas kalak e nari nggo jadi pengikutna.
16 Tapi sanga ahli-ahli Undang-Undang Musa i bas kalak Parisi nari ngidah Jesus man ras kalak perdosa bage pe ras pengalo cuke, nina man murid-murid Jesus, “Engkai maka ia man ras pengalo cuke bage pe ras kalak perdosa?”
17 Megi si e nina Jesus, “Kalak si sehat labo perlu dokter, tapi kalak si sakit nge. Aku reh labo ndilo kalak si benar, tapi kalak perdosa.”
18 Paksa si e murid-murid Johanes ras kalak Parisi erpuasa. Emaka reh kalak e janah nina man Jesus, “Engkai maka murid-murid Johanes ras murid-murid kalak Parisi erpuasa, tapi murid-muridndu la erpuasa?”
19 Ngaloi Jesus, “Me labo lit alasen teman-teman penganten si dilaki erpuasa adi kalak e paksana ras penganten e? Sanga kalak e ras penganten si dilaki, kalak e la banci erpuasa.
20 Tapi reh me paksana penganten e ibuat i bas kalak e nari janah i je me kalak e erpuasa.
21 Labo ise pe nambal uis si nggo male alu uis si mbaru. Sebap adi bage, reh belangna me rigatna iban penambalna e.
22 Bage ka pe labo itamaken kalak lau anggur si mbaru ku bas kantong kulit si male. Sebap adi bage, pecah me kantong e, janah anggur e pe mambur ras kantong e pe ceda. Tapi lau anggur si mbaru itamaken ku bas kantong kulit si mbaru.”
23 Paksa erdalan Jesus ngelewati perjuman gandum i bas wari Sabat, iputikken murid-muridna gandum e janahna erdalan.
24 Emaka nina kalak Parisi bana, “Nenlah! Engkai maka kalak e ngelakoken kai si ilarang i bas wari Sabat?”
25 Nina Jesus ngaloi, “Lenga kin pernah ibaca kena kerna kai si ilakoken Daud sanga la lit panganna janah melihe ia ras teman-temanna?
26 I bas cerita kerna Imam Kepala Abiatar, masuk Daud ku rumah Dibata, ipanna roti persembahen si arusna la banci ise pe mansa selain imam-imam, janah iberekenna ka man teman-temanna.”
27 Kenca si e nina Jesus, “Wari Sabat iban guna manusia, tapi manusia labo iban guna wari Sabat.
28 Emaka Anak manusia pe Tuan nandangi wari Sabat.”
