Markus 6:1-56
6 Lawes Jesus je nari janah seh ia i kutana, murid-muridna pe ikut ras ia.
2 Sanga wari Sabat, mulai ia ngajar i bas ingan pulung kalak Jahudi,* janah jengang kalak si nterem si megiken ia, nina, “Janari nge datna kerina enda? Engkai maka kepentaren si bagenda ibereken man bana, ras perbahanen si dem kuasa enda icidahken arah tanna?
3 La kin ia tukang kayu, anak Maria, janah seninana Jakup, Jusup,* Judas ras Simon? Janah la kin turangna pe ras kita nge?” Emaka la ialoken kalak e Jesus.*
4 Tapi nina Jesus, “I japa pe nabi ihamati tapi i kutana, keluargana, ras i bas jabuna lang.”
5 Emaka la ia banci ngelakoken perbahanen si dem kuasa i je, selain namaken tanna ku datas piga-piga kalak si sakit janah mpepalem kalak e.
6 Mamang kel atena ngidah kurangna kiniteken kalak e. Jenari isiarina kuta-kuta guna ngajar.
7 Ilebuhna 12 rasulna, isuruhna lawes dua-dua kalak, janah iberena man kalak e kuasa nandangi malekat-malekat jahat.
8 Iperentahkenna gelah ula kai pe ibaba kalak e i bas perdalanen selain tongkat. Ula maba roti, ingan pangan, bage pe sen,*
9 tapi make selop janah ula make baju dua lapis.*
10 Nina ka, “Ku rumah ise pe kena masuk, tadinglah i je ngayak kena lawes je nari.
11 I japa pe kari kena adi la ialoken ntah la ibegiken, paksa kena lawes i je nari, kisamken abu si lit bas nahe kena gelah jadi kesaksin man kalak e.”
12 Kenca si e, lawes rasul-rasul e janah iberitakenna gelah kalak ertobat,*
13 ipelawesna ka melala malekat jahat ras isapukenna minak man nterem kalak sakit janah ipepalemna kalak e.
14 Ibegi Raja Herodes me kerna si enda, sebap gelar Jesus nggo terberita, janah lit si ngataken, “Johanes Peridiken nggo ipekeke i bas si mate nari, eme sebapna perbahanen-perbahanen si dem kuasa e banci ilakokenna.”
15 Tapi si deban ngataken, “Ia Elia.” Si debanna ka ngataken, “Ia nabi bali ras nabi si nai.”
16 Tapi sanga ibegi Herodes kerna si e, nina, “Johanes si kupotong kerahungna mbarenda nggo ipekeke.”
17 Sebap nggo isuruh Herodes kalak nangkap Johanes ras nggariken ia i bas penjara erkiteken nggo iempoi Herodes me Herodias, diberu Pilipus seninana.
18 Perban nggo rusur ikataken Johanes man Herodes, “La banci iempoindu diberu seninandu.”
19 Emaka dendam kel Herodias man Johanes janah ibunuhna atena ia, tapi la banci.
20 Sebap mbiar Herodes man Johanes, itehna maka ia kalak si benar ras badia, emaka ijagana ia. Kenca ibegikenna Johanes, lanai itehna kai si arus ilakokenna tapi lalap meriah akapna megikensa.
21 Seh me wari si cocok paksa Herodes erban pesta ulang tahunna guna pejabat tinggi ras komandan-komandan militerna bage pe kalak si pentingna i Galilea.
22 Janah reh me anak Herodias si diberu, landek ia, emaka meriah kel ukur Herodes bage pe kalak si man ras ia. Nina raja man anak e, “Kai pe si ipindondu, pasti kubereken.”
23 Ersumpah ka ia, “Kai pe si ipindondu, pasti kubereken, seh asa setengah kerajanku enda pe kubere.”
24 Emaka idahina nandena, nina, “Kai si arus kupindo?” Ijawap nandena, “Takal Johanes Peridiken.”
25 Mis idahi anakna e raja janah mindo ia, nina, “Bereken bangku gundari takal Johanes Peridiken tare talam.”
26 Aminna pe ceda kel ate raja, la atena itulakna pemindonna e, erkiteken sumpahna ras tamu-tamuna.
27 Emaka mis isuruh raja sekalak pengawal janah iperentahkenna gelah ibaba takal Johanes. Jenari lawes ia janah ipotongna kerahung Johanes i bas penjara,
28 ibabana takalna e tare talam. Iberekenna man anak si diberu ndai, jenari iberekenna man nandena.
29 Sanga ibegi murid-murid Johanes kerna si e, reh kalak e janah ibabana mayatna jenari ikuburkenna.
30 Pulung rasul-rasul i sekeliling Jesus janah iceritaken kalak e man bana kerina si nggo ilakoken ras si iajarken kalak e.
31 Nina Jesus man kalak e, “Ota kita ku ingan si melungen, ngadi kita kentisik.” Erkiteken nterem jelma si reh ras lawes, la lit waktu kalak enda ngadi-ngadi janah man pe la sempat.
32 Jenari inangkihi kalak e perahu ku ingan si melungen guna nerapken bana.
33 Tapi lit si ngidah kalak e lawes janah nterem ka si metehsa. Emaka kiam jelma si nterem e i bas kerina kota nari janah leben ia seh i je.
34 Kenca nusur i bas perahu nari, idah Jesus nterem kel jelma janah mekuah atena nandangi kalak e, erkiteken kalak e bagi biri-biri si la lit permakanna. Emaka mulai ia ngajar janah melala si iajarkenna.
35 Paksa si e, nggo ben wari, idahi murid-muridna ia janah nina, “Ingan enda melungen janah wari pe nggo ben.
36 Suruhlah kalak e lawes gelah itukurna panganna i kuta-kuta si ndeher jenda nari.”
37 Nina Jesus, “Kena saja si mere kalak e man.” Ngaloi murid-muridna, “Arus kin kami lawes nukur roti si ergana 200 dinar* janah ibereken kami kalak enda man?”
38 Nina Jesus, “Piga roti si lit i bas kena? Cuba nen!” Kenca inen kalak e, nina, “Lima, ras dua ikan.”
39 Emaka isuruh Jesus kerina kalak e gelah kundul erkelompok-kelompok i datas dukut.
40 Kundul me kalak enda erkelompok-kelompok, lit si 100, lit ka si 50.
41 Ibuat Jesus lima roti ras dua ikan e, jenari itatapna ku langit janah ertoto ia. Kenca si e, icepik-cepikkenna roti e janah mulai iberekenna man murid-murid gelah ibagiken man kalak si i je, janah ibagi-bagina ka dua ikan e man kerinana.
42 Emaka kerina kalak e man ngayak besur.
43 Janah ipepulung kalak e sisana, dem 12 keranjang buena, lenga termasuk ikan.
44 Lit 5.000 dilaki teremna si man roti e.
45 Kenca si e, mis isuruh Jesus murid-muridna nangkih ku perahu gelah leben kalak e nyebrang ku Betsaida, asum si e isuruhna jelma si nterem e mulih.
46 Kenca kalak e lawes, nangkih ia ku deleng guna ertoto.
47 Wari nggo ben, sisada Jesus i je, tapi perahu nggo seh i tengah lawit.
48 Emaka sanga idahna mesera iakap kalak e ngkayuh perahu perban ientam angin, reh ia ndahi kalak e paksa erpagi-pagi,* erdalan ia i datas lawit. Tapi tempa-tempa ilewatina atena kalak e.
49 Sanga idah kalak e ia erdalan i datas lawit, serko kalak e, “Begu!”
50 Kerina kalak e mbiar ngidah ia. Tapi mis ia ngerana man kalak e, “Petetap ukurndu! Aku nge enda, ula mbiar.”
51 Jenari nangkih ia ku bas perahu, dungna ngadi me angin e. Ngidah si e jengang kel kalak enda,
52 sebap erti mukjizat roti ndai pe lenga iangkaina. Pusuh kalak e terus la erpengangka.
53 Sanga kalak e nyebrang, seh me ia i Genesaret janah itambatkenna perahuna i je.
54 Tapi nusur kenca kalak e i bas perahu nari, minter itandai jelma si nterem e Jesus.
55 Kiam kalak e mpebetehkenca man kalak si deban si lit i bas kerina daerah e. Ibabana kalak si sakit tare ingan medemna ku Jesus.
56 Ku kuta ntah ku kota si apai pe ia masuk, itaruhken kalak e me kalak si sakit ku pajak-pajak, janah mindo kalak e man Jesus gelah banci idadapna ujung uisna si arah darat sajalah gia. Kerina si ndadapsa malem.
Cataten i teruh
^ As. “sinagoga.” Nen Kamus.
^ Ntah “Joses.”
^ As. “Emaka mulai kalak e tertuktuk erkiteken ia.”
^ As. “tembaga.”
^ Ntah “ula baba baju ganti.”
^ Ntah “jera dingen robah.”
^ Sen logam pirak kalak Roma.
^ I bas kalak Jahudi, enda “giliren jaga si peempatken,” kira-kira jam 3-6 erpagi-pagi.
