Markus 7:1-37
7 Piga-piga kalak Parisi ras ahli Undang-Undang Musa si reh Jerusalem nari pulung ngkelilingi Jesus.
2 Janah idah kalak e piga-piga murid Jesus man alu tan si najis, eme tan si lenga iburihi.*
3 (Sebap kalak Parisi ras kerina kalak Jahudi la man adi la iburihina lebe tanna seh ku siku-siku, erkiteken ikutkenna kel adat kalak si nai.
4 Janah sanga kalak e reh pajak nari, la kalak e man adi la ibersihkenna lebe dirina. Melala adat si deban si ialoken kalak e janah ikutkenna kel, contohna ngerendam mangkok, teko, ras kudin tembaga.)
5 Emaka nungkun kalak Parisi ras ahli Undang-Undang Musa e man Jesus, “Engkai maka la ikutken murid-muridndu adat nini bulangta, janah man ia alu tan si najis?”
6 Ngaloi ia, “Tuhu kel si inubuatken Jesaya kerna kena, o kalak munapik, bagi si tertulis, ‘Ihamati bangsa enda Aku alu biberna, tapi pusuhna ndauh i bas Aku nari.
7 Sia-sia ia terus nembah Aku, erkiteken si iajarkenna perentah manusia.’
8 Itadingken kena perentah Dibata janah ikutken kena kel adat manusia.”
9 Nina Jesus ka, “Beluh kel kena nulak perentah Dibata guna ngikutken adat kena.
10 Contohna nina Musa, ‘Hamatilah bapakndu ras mamakndu,’ janah, ‘Ise pe si ngisakken* bapakna ntah pe mamakna arus ibunuh.’
11 Tapi ning kena, ‘Adi lit kalak si ngataken man bapakna ntah pe mamakna, “Kai pe si lit bas aku si banci erguna man kena eme korban (maksudna, pemere si ipersembahken man Dibata),”’
12 alu bage lanai ipediat kena ia ngelakoken kai pe man bapakna ntah pe man mamakna.
13 Emaka iban kena kata Dibata lanai meherga erkiteken adat si iterusken kena. Janah melala si ilakoken kena bagi si enda.”
14 Jenari ilebuhna mulihi jelma si nterem e, nina, “Kena kerina, begiken aku, janah angkailah enda.
15 Kai pe si masuk ku bas manusia labo erban ia najis, tapi si ndarat i bas manusia e nari me si erbanca ia najis.”
16 *——
17 Kenca itadingken Jesus jelma si nterem e, masuk ia ku sada rumah, mulai nungkun murid-muridna man bana kerna perumpaman* ndai.
18 Ngaloi Jesus, “Kena pe, la ka kin iangkai kena bagi kalak ndai? La kin iteh kena maka kai pe si masuk ku bas manusia labo erbanca ia najis?
19 Sebap, e labo masuk ku bas pusuhna, tapi ku bas beltekna, kenca si e ipedarat ka.” Alu bage ikatakenna maka kerina pangan banci ipan.
20 Nina Jesus ka, “Kai si ndarat i bas manusia nari, eme si erbanca ia najis.
21 Sebap arah bas nari, arah pusuh manusia nari, ndarat perukuren si jahat, perbahanen seks si salah,* nangko, pemunuhen,
22 erlua-lua, merangap, perbahanen si jahat, nipu, perbahanen si la meteh mela,* percian, penghinan, meganjang rukur, ras perukuren si la masuk akal.
23 Kerina si jahat enda rehna i bas pusuh nari janah erban kalak jadi najis.”
24 Lawes Jesus je nari janah berkat ku daerah Tirus ras Sidon. I je masuk ia ku bas sada rumah janah la atena ise pe metehsa, tapi tetap nge iteh kalak.
25 Kenca Jesus seh, sekalak diberu si anakna* irasuki malekat jahat megi kerna ia, emaka reh diberu e janah erjimpuh i nahena.
26 Diberu e kalak Junani, bangsa* Siropenesia. Terus ipindona gelah ipelawes Jesus malekat jahat i bas anakna nari.
27 Tapi nina man diberu e, “Pediat lebe anak-anak besur, sebap la patut ibuat roti i bas anak-anak nari jenari iambekken man anak-anak biang.”
28 Ngaloi diberu e, “Tuhu Pak, tapi anak-anak biang si i teruh meja pe man rimah-rimah i bas anak-anak e nari nge.”
29 Emaka nina Jesus, “Erkiteken bage nindu, laweslah, malekat jahat e nggo ndarat i bas anakndu nari.”
30 Jenari, lawes ia ku rumahna, idapetina anakna tayang i bas ingan medem, janah malekat jahat e nggo lawes.
31 Kenca itadingken Jesus daerah Tirus, lawes ia ku Lawit Galilea arah Sidon, ilewatina daerah Dekapolis.*
32 I je, itaruhken kalak man bana sekalak dilaki si pasek ras mesera akapna ngerana. Mindo kel kalak e gelah itamaken Jesus tanna ku datasna.
33 Emaka ipisahken Jesus ia arah jelma si nterem nari. Imasukkenna jari-jarina ku cuping dilaki e, kenca icidurina, ikuitna dilah kalak ndai.
34 Sanga inen Jesus ku langit, gedang itarikna kesahna janah nina, “Eppata,” si ertina, “Terbukalah.”
35 Minter terbuka cupingna, lanai mesera iakapna ngerana, dungna mulai jelas ia ngerana.
36 Ilarang Jesus kalak e cerita man ise pe, tapi reh rusurna ilarang, reh rusurna kalak e nceritakenca.
37 Tuhu-tuhu jengang kel kalak e, janah nina, “Luar biasa kel kerina si ilakokenna. Ibanna kalak pasek erpemegi, ras kalak bisu pe banci ngerana.”
Cataten i teruh
^ Maksudna, lenga iburihi menurut kebiasan Jahudi.
^ Ntah “nghina.”
^ Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
^ Ntah “anding-andingen.”
^ Bahasa Junani, porneia. Nen Kamus.
^ As. aselgeia. Nen Kamus.
^ As. “anakna si diberu.”
^ Ntah “si lahir i.”
^ Ntah “Wilayah Sepuluh Kota.”
